ಕೋವಿಡ್ ಬಳಿಕ ಯುವಜನರ ಸಾವು ಹೆಚ್ಚಳ

ನವದೆಹಲಿ: ಕೋವಿಡ್-19 ಸಾಂಕ್ರಾಮಿಕತೆಯ ನಂತರದಲ್ಲಿ ಜಾಗತಿಕವಾಗಿ ಯುವ ವಯಸ್ಕರ ಸಾವಿನ ಪ್ರಮಾಣದಲ್ಲಿ ಏರಿಕೆಯಾಗಿದೆ ಎಂದು ಅಮೆರಿಕದ ಅಧ್ಯಯನ ವರದಿಯೊಂದು ಹೇಳಿದೆ. ಈಗಲೂ ಮುಂದುವರಿದಿರುವ ಕೋವಿಡ್ ಸಾಂಕ್ರಾಮಿಕತೆಯ ಪರಿಣಾಮಗಳ ಬಗ್ಗೆ ಇನ್ನೂ ಹೆಚ್ಚು ಸಂಶೋಧನೆ ನಡೆಸುವ ಅಗತ್ಯವಿದೆ ಎಂದು ವಿಜ್ಞಾನಿಗಳು ಅಭಿಪ್ರಾಯ ಪಟ್ಟಿದ್ದಾರೆ.

ದ ಜರ್ನಲ್ ಆಫ್ ದ ಅಮೆರಿಕನ್ ಮೆಡಿಕಲ್ ಅಸೋಸಿಯೇಶನ್ (ಜೆಎಎಂಎ) ನೆಟ್​ವರ್ಕ್ ಓಪನ್​ನಲ್ಲಿ ಅಧ್ಯಯನ ವರದಿ ಪ್ರಕಟವಾಗಿದೆ.

33 ಲಕ್ಷ ಸಾವಿನ ವಿಶ್ಲೇಷಣೆ: ಅಮೆರಿಕದ ಯುವ ವಯಸ್ಕರಲ್ಲಿ (25ರಿಂದ 44 ವರ್ಷ ಪ್ರಾಯದವರು) 1999ರಿಂದ 2023ರ ವರೆಗೆ ಸಂಭವಿಸಿದ 33 ಲಕ್ಷಕ್ಕೂ ಅಧಿಕ ಸಾವನ್ನು ವಿಶ್ಲೇಷಿಸಿ ಈ ವರದಿ ಸಿದ್ಧಪಡಿಸಲಾಗಿದೆ. ಮಿನ್ನಸೋಟಾ ವಿಶ್ವವಿದ್ಯಾಲಯಸಹಿತ ಅನೇಕ ಸಂಸ್ಥೆಗಳ ಸಂಶೋಧಕರು ಅಧ್ಯಯನದಲ್ಲಿ ಭಾಗವಹಿಸಿದ್ದರು.

ಸಾಂಕ್ರಾಮಿಕತೆಯ ಅವಧಿಯಲ್ಲಿ ಸಾವಿನ ದರ ತೀವ್ರವಾಗಿ ಏರಿದ್ದು ಸಾಂಕ್ರಾಮಿಕೋತ್ತರದಲ್ಲಿ ನಿರೀಕ್ಷೆಗಿಂತ ಹೆಚ್ಚಾಗಿಯೇ ಉಳಿದಿದೆ ಎಂದು ಸಂಶೋಧಕರು ಹೇಳಿದ್ದಾರೆ.

ಇತರ ಕಾರಣಗಳು: ಕಾರ್ಡಿಯೋಮೆಟಾಬಾಲಿಕ್ ಮತ್ತು ಪೌಷ್ಟಿಕತೆಗೆ ಸಂಬಂಧಿಸಿದ ಕಾರಣಗಳಸಹಿತ ಇನ್ನೂ ಹಲವು ನೈಸರ್ಗಿಕ ಕಾರಣಗಳು ಕೂಡ ಅಧಿಕ ಸಾವಿಗೆ ಕೊಡುಗೆ ನೀಡಿವೆ. ಅಪಘಾತಗಳ ಸಹಿತ ಇತರ ಕೆಲವು ಬಾಹ್ಯ ಅಂಶಗಳೂ ಕಾರಣವಾಗಿವೆ ಎಂದು ಬಾಸ್ಟನ್ ಯುನಿವರ್ಸಿಟಿ ಸ್ಕೂಲ್ ಆಫ್ ಪಬ್ಲಿಕ್ ಹೆಲ್ತ್​ನ ಜಾಗತಿಕ ಆರೋಗ್ಯದ ಸಹ ಪ್ರಾಧ್ಯಾಪಕ ಆಂಡ್ರ್ಯೂ ಸ್ಟೋಕ್ಸ್ ಹೇಳಿದ್ದಾರೆ.