ಮುನಂಬಮ್ ವಿಷಯ ಕೇಂದ್ರೀಕರಿಸಿ ವಕ್ಫ್ ಮಸೂದೆಯ ಅಭಿಯಾನ ಆರಂಭಿಸಲಿರುವ ಬಿಜೆಪಿ

ತಿರುವನಂತಪುರಂ: ವಕ್ಫ್ ಮಸೂದೆಗೆ ವಿರೋಧ ವ್ಯಕ್ತವಾಗುವ ಭೀತಿಯಿಂದ ಬಿಜೆಪಿ ದೇಶಾದ್ಯಂತ ಅಭಿಯಾನ ಆರಂಭಿಸುತ್ತಿದೆ. ಕೇರಳ ಸೇರಿದಂತೆ ಎಲ್ಲಾ ರಾಜ್ಯಗಳಲ್ಲಿ ಮನೆ ಮನೆಗೆ ಪ್ರಚಾರಕ್ಕೆ ಪಕ್ಷ ಆದ್ಯತೆ ನೀಡುತ್ತಿದೆ.

ವಿಧಾನಸಭಾ ಚುನಾವಣೆ ನಡೆಯುತ್ತಿರುವ ಬಿಹಾರ ಸೇರಿದಂತೆ ಇತರ ರಾಜ್ಯಗಳಲ್ಲಿ ಹಿನ್ನಡೆ ಎದುರಿಸಬೇಕಾಗುತ್ತದೆ ಎಂಬುದನ್ನು ಅರಿತುಕೊಂಡ ನಂತರ ಬಿಜೆಪಿ ತನ್ನ ಪ್ರಚಾರ ಚಟುವಟಿಕೆಗಳನ್ನು ಪ್ರಾರಂಭಿsಸಲಿದೆ. 

ಮಸೂದೆಯ ಆಧಾರದ ಮೇಲೆ ಬಹುಸಂಖ್ಯಾತ ಮತ್ತು ಕ್ರಿಶ್ಚಿಯನ್ ಸಮುದಾಯಗಳನ್ನು ತಮ್ಮೊಂದಿಗೆ ಒಟ್ಟುಗೂಡಿಸುವ ಪಕ್ಷದ ನಡೆಯ ಭಾಗವಾಗಿ ಈ ಅಭಿಯಾನವನ್ನು ಪರಿಗಣಿಸಲಾಗಿದೆ.

ಗುಜರಾತ್‍ನಲ್ಲಿ ನಡೆದ ಎಐಸಿಸಿ ಸಮ್ಮೇಳನದಲ್ಲಿ ಅಂಗೀಕರಿಸಲಾದ ವಕ್ಫ್ ಮಸೂದೆಯ ವಿರುದ್ಧ ಕಾಂಗ್ರೆಸ್ ಮಂಡಿಸಿದ ನಿರ್ಣಯದಲ್ಲಿಯೂ ಬಿಜೆಪಿಯ ಈ ನಡೆಯನ್ನು ಗಣನೆಗೆ ತೆಗೆದುಕೊಳ್ಳಲಾಗಿದೆ.

ದಕ್ಷಿಣ ಭಾರತದ ರಾಜ್ಯಗಳು ಸೇರಿದಂತೆ ಪ್ರಚಾರ ಚಟುವಟಿಕೆಗಳ ಚುಕ್ಕಾಣಿ ಹಿಡಿಯುವ ಸೂಚನೆಗಳು ಆರ್‍ಎಸ್‍ಎಸ್‍ಗೆ ಲಭಿಸಲಿದೆ. 

ಮುಸ್ಲಿಂ ಧಾರ್ಮಿಕ ನಂಬಿಕೆಗಳನ್ನು ಆಧರಿಸಿದ ವಕ್ಫ್ ಕಾಯ್ದೆಗೆ ತಿದ್ದುಪಡಿ ತರುವ ಮೂಲಕ ದೇಶದ ಇಡೀ ಮುಸ್ಲಿಂ ಮತ್ತು ಹಿಂದುಳಿದ ಸಮುದಾಯಗಳು ತಮ್ಮ ವಿರುದ್ಧ ತಿರುಗಿಬೀಳುವ ಸೂಚನೆಯನ್ನು ಬಿಜೆಪಿ ಗಮನಿಸಿದೆ. 

ವಕ್ಫ್ ಕಾಯ್ದೆಯ ನಂತರ, ಆರ್‍ಎಸ್‍ಎಸ್ ಮುಖವಾಣಿ ಆರ್ಗನೈಸರ್‍ನಲ್ಲಿ ಕ್ಯಾಥೋಲಿಕ್ ಚರ್ಚ್‍ನ ಆಸ್ತಿಯ ಕುರಿತು ಪ್ರಕಟವಾದ ಲೇಖನವು ಕ್ರಿಶ್ಚಿಯನ್ನರಲ್ಲಿ ಭಯವನ್ನು ಸೃಷ್ಟಿಸಿದೆ.

ವಕ್ಫ್ ಮಸೂದೆಯ ನಂತರ ಕೇಂದ್ರವು ಚರ್ಚ್ ಮಸೂದೆಗೆ ಸಿದ್ಧತೆ ನಡೆಸುತ್ತಿದೆ ಎಂಬ ಊಹಾಪೋಹವೂ ಇದೆ. ಇದನ್ನೆಲ್ಲ ಸ್ಪಷ್ಟಪಡಿಸುವ ಮೂಲಕ ಬಿಜೆಪಿ ತನ್ನ ಪ್ರಚಾರ ಚಟುವಟಿಕೆಗಳನ್ನು ಬಿಗಿಗೊಳಿಸಲಿದೆ. 

ಮುನಂಬಮ್ ವಿಷಯವನ್ನು ಕೇಂದ್ರೀಕರಿಸಿ ವಕ್ಫ್ ಮಸೂದೆಯ ಅಭಿಯಾನವನ್ನು ರಾಜ್ಯದಲ್ಲಿ ಆಯೋಜಿಸಲಾಗುವುದು. ಮೇಲೆ ತಿಳಿಸಲಾದ ವಿಷಯಗಳ ಕುರಿತು ವಿವರಣೆಗಳನ್ನು ನೀಡಲು ಮನೆ ಮನೆಗೆ ಭೇಟಿ ನೀಡಲಿದೆ. 

ಬಿಜೆಪಿ ಮತ್ತು ಸಂಘ ಪರಿವಾರ ಸಂಘಟನೆಗಳು ರಾಜ್ಯದಲ್ಲಿ ರಾಜಕೀಯ ಧ್ರುವೀಕರಣದ ಮೂಲಕ ಹೆಚ್ಚಿನ ಮತಗಳು ಮತ್ತು ಸ್ಥಾನಗಳನ್ನು ಗಳಿಸುವ ಗುರಿಯನ್ನು ಹೊಂದಿದ್ದು, ಗರಿಷ್ಠ ಕ್ರಿಶ್ಚಿಯನ್-ಹಿಂದೂ ಏಕೀಕರಣದ ಗುರಿಯನ್ನು ಹೊಂದಿವೆ ಎಂದು ನಂಬಲಾಗಿದೆ.

ಮುಂಬರುವ ಸ್ಥಳೀಯಾಡಳಿತ ಚುನಾವಣೆಗಳಿಗೆ ಮುನ್ನ, ಬಿಜೆಪಿ ರಾಜ್ಯದಲ್ಲಿ ತನ್ನ ಅಸ್ತಿತ್ವವನ್ನು ಮತ್ತಷ್ಟು ಸುಧಾರಿಸಲು ಮತ್ತು ಪ್ರಸ್ತುತ ಸಹಾನುಭೂತಿ ತೋರಿಸುತ್ತಿರುವ ಕ್ಯಾಥೋಲಿಕ್ ಚರ್ಚ್ ಅನ್ನು ಪಕ್ಷಕ್ಕೆ ಹತ್ತಿರ ತರಲು ಪ್ರಯತ್ನಗಳನ್ನು ಮಾಡುತ್ತಿದೆ.