ಐಎನ್‌ಎಸ್‌ ತಾರಿಣಿ ವಿಶ್ವಯಾನ ಅಂತಿಮ ಹಂತಕ್ಕೆ

ನವದೆಹಲಿ: ಐಎನ್‌ಎಸ್‌ ತಾರಿಣಿ ಯುದ್ಧನೌಕೆಯ ವಿಶ್ವ ಪರ್ಯಟನೆ ಅಂತಿಮ ಹಂತಕ್ಕೆ ತಲುಪಿದ್ದು, ನೌಕೆಯನ್ನು ಮುನ್ನಡೆಸಿದ ಇಬ್ಬರು ಮಹಿಳಾ ಅಧಿಕಾರಿಗಳೊಂದಿಗೆ ನೌಕಾಪಡೆಯ ಮುಖ್ಯಸ್ಥ ಅಡ್ಮಿರಲ್ ದಿನೇಶ್‌ ತ್ರಿಪಾಠಿ ಅವರು ಸಂವಾದ ನಡೆಸಿದರು.

ಲೆಫ್ಟಿನೆಂಟ್‌ ಕಮಾಂಡರ್‌ಗಳಾದ ದಿಲ್ನಾ ಕೆ.ಮತ್ತು ರೂಪಾ ಎ. ಅವರ ಅನುಪಮ ಕೌಶಲ ಮತ್ತು ತಂಡದ ಉತ್ಸಾಹವನ್ನು ತ್ರಿಪಾಠಿ ಮಂಗಳವಾರ ಶ್ಲಾಘಿಸಿದರು.

ಈ ವಿಶ್ವ ಪರ್ಯಟನೆಗೆ ಕಳೆದ ವರ್ಷ ಅಕ್ಟೋಬರ್ 2ರಂದು ಗೋವಾದಲ್ಲಿ ನೌಕಾಪಡೆಯ ಮುಖ್ಯಸ್ಥರು ಹಸಿರು ನಿಶಾನೆ ತೋರಿದ್ದರು. ಎಂಟು ತಿಂಗಳ ಯಾತ್ರೆಯಲ್ಲಿ ಐಎನ್‌ಎಸ್‌ ತಾರಿಣಿಯು ಸತತ ಮಳೆ, ಗಾಳಿ ಮತ್ತು ಅಲೆಗಳ ಹೊಡೆತವನ್ನು ಲೆಕ್ಕಿಸದೆ 'ಕೇಪ್ ಆಫ್ ಗುಡ್‌ ಹೋಪ್' ಅನ್ನು ದಾಟಿದೆ.

'ಕಳೆದ ಎಂಟು ತಿಂಗಳಲ್ಲಿ ನೌಕಾಪಡೆ ಮತ್ತು ದೇಶ ಹೆಮ್ಮೆ ಪಡುವಂತೆ ಮಾಡಿರುವಿರಿ. ಈ ಪ್ರಯಾಣ ಅಭೂತಪೂರ್ವವಾದದ್ದು, ನಿಮ್ಮನ್ನು ಸ್ವಾಗತಿಸಲು ನೌಕಾಪಡೆ ಕಾತರದಿಂದ ಕಾಯುತ್ತಿದೆ' ಎಂದು ತ್ರಿಪಾಠಿ ಹೇಳಿದರು.