'ಕರಾಳ ಚೀನಾ' ಎದುರು ಭಾರತ, ರಷ್ಯಾವನ್ನು ಕಳೆದುಕೊಂಡೆವು ಎನಿಸುತ್ತಿದೆ: ಟ್ರಂಪ್

ವಾಷಿಂಗ್ಟನ್‌: ಟಿಯಾನ್‌ಜಿನ್‌ನಲ್ಲಿ ಇತ್ತೀಚೆಗೆ ನಡೆದ ಶಾಂಘೈ ಸಹಕಾರ ಸಂಘಟನೆಯ (ಎಸ್‌ಸಿಒ) ವಾರ್ಷಿಕ ಶೃಂಗಸಭೆ ಬಳಿಕ ಚೀನಾ ಎದುರು ಭಾರತ ಹಾಗೂ ರಷ್ಯಾ ಕಳೆದುಹೋಗಿವೆ ಎನಿಸುತ್ತಿದೆ ಎಂದು ಅಮೆರಿಕ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್‌ ಹೇಳಿದ್ದಾರೆ.

ಚೀನಾದ ಟಿಯಾನ್‌ಜಿನ್‌ ನಗರದಲ್ಲಿ ಆಗಸ್ಟ್ 31ರಿಂದ ಸೆಪ್ಟೆಂಬರ್‌ 1ರ ವರೆಗೆ ನಡೆದ ಸಭೆ ವೇಳೆ ಭಾರತದ ಪ್ರಧಾನಿ ನರೇಂದ್ರ ಮೋದಿ, ಚೀನಾ ಅಧ್ಯಕ್ಷ ಷಿ ಜಿನ್‌ ಪಿಂಗ್‌ ಮತ್ತು ರಷ್ಯಾ ಅಧ್ಯಕ್ಷ ವ್ಲಾಡಿಮಿರ್‌ ಪುಟಿನ್‌ ಅವರು ಪರಸ್ಪರ ದ್ವಿಪಕ್ಷೀಯ ಮಾತುಕತೆ ನಡೆಸಿದ್ದರು.

ಆ ವೇಳೆ, ರಾಜತಾಂತ್ರಿಕ ಸಂಬಂಧ, ಪ್ರಾದೇಶಿಕ ಸಹಕಾರ, ಅಮೆರಿಕದ ಸುಂಕ ಸಮರದಿಂದಾಗಿ ವಿಶ್ವ ವ್ಯಾಪಾರದ ಮೇಲೆ ಉಂಟಾಗಿರುವ ಪರಿಣಾಮ, ಜಾಗತಿಕ ಬೆಳವಣಿಗಗಳ ಕುರಿತು ಚರ್ಚಿಸಿದ್ದರು.

ಈ ಕುರಿತು ಸಾಮಾಜಿಕ ಮಾಧ್ಯಮ ವೇದಿಕೆ 'ಟ್ರುತ್‌'ನಲ್ಲಿ ಬರೆದುಕೊಂಡಿರುವ ಟ್ರಂಪ್‌, 'ಅತ್ಯಂತ ಕ್ರೂರ, ಕರಾಳ ಚೀನಾಗಾಗಿ, ನಾವು ಭಾರತ ಮತ್ತು ರಷ್ಯಾವನ್ನು ಕಳೆದುಕೊಂಡಂತೆ ಭಾಸವಾಗುತ್ತಿದೆ. ಜತೆಗೂಡಿ ಅವರು ಬಹುಕಾಲ ಸಮೃದ್ಧಿಯಿಂದಿರಲಿ' ಎಂದಿದ್ದಾರೆ.