ತೇಜಸ್ವಿನಿ ಸಹೋದಯ ಶಾಲಾ ಕಲೋತ್ಸವ ಸಮಾಪ್ತಿ

ಕಾಸರಗೋಡು: ಕಾಸರಗೋಡು ಚಿನ್ಮಯ ವಿದ್ಯಾಲಯದಲ್ಲಿ ನಡೆದ ತೇಜಸ್ವಿನಿ ಸಹೋದಯ ಶಾಲಾ ಕಲೋತ್ಸವ ವೈವಿಧ್ಯಮಯ ಕಲಾ ರೂಪಗಳೊಂದಿಗೆ  ಯಶಸ್ವಿಯಾಗಿ ಮುಕ್ತಾಯಗೊಂಡಿತು. ಎರಡು ದಿನಗಳ ಕಾಲ ನಡೆದ ಈ ಮಹೋತ್ಸವವು ತೇಜಸ್ವಿನಿ ಸಹೋದಯ ಕಾಂಪ್ಲೆಕ್ಸ್‍ನ ವಿವಿಧ ಸಿಬಿಎಸ್.ಇ. ಶಾಲೆಯ ವಿದ್ಯಾರ್ಥಿಗಳ ಕಲಾತ್ಮಕ ಪ್ರತಿಭೆಗಳಿಗೆ ವೇದಿಕೆಯಾಯಿತು. 

ವಿವಿಧ ವಿಭಾಗಗಳಲ್ಲಿ ನಡೆದ ಸ್ಪರ್ಧೆಗಳಲ್ಲಿ ವಿದ್ಯಾರ್ಥಿಗಳ ಸಕ್ರಿಯ ಭಾಗವಹಿಸುವಿಕೆ, ಆರೋಗ್ಯಕರ ಸ್ಪರ್ಧೆ ಮತ್ತು ವಿದ್ಯಾರ್ಥಿಗಳ ಪ್ರತಿಭೆಯನ್ನು ಉತ್ತೇಜಿಸುವುದರಲ್ಲಿ ಯಶಸ್ವಿಯಾಯಿತು.

ಪ್ರತಿಭಾಸಂಪನ್ನವಾದ ಈ ಮೇಳದ ಕೊನೆಯಲ್ಲಿ ಚಿನ್ಮಯ ವಿದ್ಯಾಲಯ ತಳಿಪರಂಬ 1023 ಅಂಕಗಳೊಂದಿಗೆ  ಚಾಂಪಿಯನ್‍ಶಿಪ್ ಟ್ರೋಫಿಯನ್ನು ಗಳಿಸಿ ಜಯಭೇರಿಯನ್ನು ಬಾರಿಸಿತು. ಚಿನ್ಮಯ ವಿದ್ಯಾಲಯ ಕಾಸರಗೋಡು 648 ಅಂಕಗಳೊಂದಿಗೆ  ಎರಡನೇ ಸ್ಥಾನವನ್ನೂ, ಪಿ. ಇ. ಎಸ್ ವಿದ್ಯಾಲಯ  ಪಯ್ಯನ್ನೂರ್ 524 ಅಂಕಗಳನ್ನು ಪಡೆದು ಮೂರನೇ ಸ್ಥಾನವನ್ನು  ಪಡೆಯಿತು.

ವಿಭಾಗ- 2 ರಲ್ಲಿ 168 ಅಂಕಗಳು, ವಿಭಾಗ-3 ರಲ್ಲಿ 326 ಅಂಕಗಳು, ವಿಭಾಗ- 4 ರಲ್ಲಿ  357 ಅಂಕಗಳು ಮತ್ತು ಸಾಮಾನ್ಯ ವಿಭಾಗದಲ್ಲಿ 142 ಅಂಕಗಳನ್ನು ಪಡೆದು ಚಿನ್ಮಯ ವಿದ್ಯಾಲಯ ತಳಿಪರಂಬ ಮುನ್ನಡೆಯನ್ನು ಸಾಧಿಸಿತು. ವಿಭಾಗ -1 ರಲ್ಲಿ  67 ಅಂಕಗಳೊಂದಿಗೆ ಚಿನ್ಮಯ ವಿದ್ಯಾಲಯ ಕಾಞಂಗಾಡ್  ಮೊದಲ ಸ್ಥಾನವನ್ನು  ಗಳಿಸಿತು.