ಇಂಧನ ಖರೀದಿಯು ಭಾರತದ ಹಿತಾಸಕ್ತಿ ಆಧರಿಸಿದೆ: ರಷ್ಯಾ ರಾಯಭಾರಿ ಡೆನಿಸ್‌

ನವದೆಹಲಿ: 'ರಷ್ಯಾದಿಂದ ಕಚ್ಚಾತೈಲ ಖರೀದಿಯು ಜಾಗತಿಕ ಮಾರುಕಟ್ಟೆಯಲ್ಲಿ ಅತ್ಯಂತ ಪರಿಣಾಮಕಾರಿ ಆಯ್ಕೆಯಾಗಿ ಉಳಿದಿದೆ. ಭಾರತವು ತನ್ನ ಹಿತಾಸಕ್ತಿ ಗಮನದಲ್ಲಿರಿಸಿಕೊಂಡು, ರಷ್ಯಾದ ಜೊತೆಗೆ ಇಂಧನ ಒಪ್ಪಂದ ಮಾಡಿಕೊಂಡಿದೆ' ಎಂದು ಭಾರತದಲ್ಲಿನ ರಷ್ಯಾ ರಾಯಭಾರಿ ಡೆನಿಸ್‌ ಅಲಿಪೊವ್‌ ತಿಳಿಸಿದ್ದಾರೆ.

ರಷ್ಯಾದಿಂದ ಭಾರತವು ಕಚ್ಚಾತೈಲ ಖರೀದಿಯನ್ನು ನಿಲ್ಲಿಸಲಿದೆ ಎಂದು ಡೊನಾಲ್ಡ್‌ ಟ್ರಂಪ್ ಹೇಳಿಕೆ ನೀಡಿದ ಬೆನ್ನಲ್ಲೇ, ಅವರು ಈ ಪ್ರತಿಕ್ರಿಯೆ ನೀಡಿದ್ದಾರೆ.

'ಸರಕು ಸಾಗಾಣಿಕೆ ಹಾಗೂ ಪಾವತಿ ವ್ಯವಸ್ಥೆಗೆ ರಷ್ಯಾದಿಂದ ತೈಲ ಖರೀದಿಯು ಸಹಕಾರಿ ಆಗಿದೆ. ಭಾರತವು ತನ್ನ ಹೈಡ್ರೋಕಾರ್ಬನ್‌ಗಳ ಮೂರನೇ ಒಂದರಷ್ಟು ಪ್ರಮಾಣವನ್ನು ರಷ್ಯಾದಿಂದಲೇ ಖರೀದಿಸುತ್ತಿದೆ' ಎಂದು ಡೆನಿಸ್‌ ಅವರು ತಿಳಿಸಿದ್ದಾರೆ.

ಟ್ರಂಪ್‌ ಹೇಳಿಕೆ ಬಳಿಕವೂ ರಷ್ಯಾವು ತೈಲ ಮಾರಾಟವನ್ನು ಮುಂದುವರಿಸಲಿದೆಯೇ ಎಂಬ ಪ್ರಶ್ನೆಗೆ ಉತ್ತರಿಸಿದ ಅವರು, 'ಇದು ಭಾರತ ಸರ್ಕಾರಕ್ಕೆ ಸಂಬಂಧಿಸಿದ ವಿಚಾರ' ಎಂದು ಹೇಳಿದ್ದಾರೆ.