ಇಂಡಿಯಾದ ಮೇಲಿನ ಸುಂಕ ತೆಗೆಯಿರಿ: ಅಮೆರಿಕ ಸಂಸತ್‌ನಲ್ಲಿ ಭಾರತ ಮೂಲದ ಸಂಸದರು

ನ್ಯೂಯಾರ್ಕ್‌/ವಾಷಿಂಗ್ಟನ್‌: ಅಮೆರಿಕ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್‌ ಅವರು ಭಾರತದ ಮೇಲೆ ಹೇರಿರುವ ಹೆಚ್ಚುವರಿ ಸುಂಕವನ್ನು ರದ್ದು ಮಾಡಬೇಕು ಎಂದು ಭಾರತ ಮೂಲದ ರಾಜಾ ಕೃಷ್ಣಮೂರ್ತಿ ಸೇರಿ ಮೂವರು ಪ್ರಭಾವಶಾಲಿ ಸಂಸದರು ಶುಕ್ರವಾರ ಸಂಸತ್ತಿನಲ್ಲಿ ನಿರ್ಣಯ ಮಂಡಿಸಿದ್ದಾರೆ.

ರಾಷ್ಟ್ರೀಯ ತುರ್ತು ಸಂದರ್ಭಗಳಲ್ಲಿ ಇತರೆ ದೇಶಗಳ ಮೇಲೆ ಶೇ 50ರಷ್ಟು ಸುಂಕ ಹೇರುವ ವಿಶೇಷ ಅಧಿಕಾರವನ್ನು ಬಳಸಿಕೊಂಡು ಟ್ರಂಪ್‌ ಅವರು ಭಾರತವೂ ಸೇರಿದಂತೆ ಹಲವು ದೇಶಗಳ ಮೇಲೆ ಸುಂಕ ಹೇರಿದ್ದಾರೆ. ಈ ಅಧಿಕಾರವನ್ನು ಕೊನೆಗೊಳಿಸಲು ನಿರ್ಣಯ ಮಂಡಿಸಲಾಗಿದೆ.

'ಈ ರೀತಿಯ ಸುಂಕ ಹೇರಿಕೆಯಿಂದ ಭಾರತದಂಥ ಮುಖ್ಯ ಪಾಲುದಾರ ದೇಶದೊಂದಿಗಿನ ಸಂಬಂಧವು ಹಳಸಲಿದೆ ಮತ್ತು ಇದು ಅಮೆರಿಕಕ್ಕೆ ಮಾರಕವಾಗಲಿದೆ' ಎಂದು ಕೃಷ್ಣಮೂರ್ತಿ ಅಭಿಪ್ರಾಯಪಟ್ಟಿದ್ದಾರೆ.