ಅದಾನಿ ಸಂಸ್ಥೆಗಳು ತನಿಖೆಯಿಂದ ಹಿಂದೆ ಸರಿದ ಬಳಿಕ ಭಾರತೀಯ ಸೌರ ರಫ್ತಿಗೆ ಅಮೆರಿಕದಿಂದ 126% ಸುಂಕ; ವರದಿ

ನವದೆಹಲಿ: ಕೈಗಾರಿಕಾ ಉದ್ಯಮಿ ಗೌತಮ್ ಅದಾನಿ ಅವರ ಅದಾನಿ ಸಮೂಹಕ್ಕೆ ಸೇರಿದ ಎರಡು ಕಂಪೆನಿಗಳಾದ ಮುಂದ್ರಾ ಸೋಲಾರ್ ಎನರ್ಜಿ ಮತ್ತು ಮುಂದ್ರಾ ಸೋಲಾರ್ ಪಿವಿಯು ಅಮೆರಿಕದ ಸಬ್ಸಿಡಿ ವಿರೋಧಿ ತನಿಖೆಯಿಂದ ಹಿಂದೆ ಸರಿದ ಬಳಿಕ, ಭಾರತೀಯ ಸೌರಶಕ್ತಿ ಉತ್ಪನ್ನಗಳ ರಫ್ತಿನ ಮೇಲೆ ಅಮೆರಿಕ 126% ಸುಂಕ ವಿಧಿಸಿದೆ ಎಂದು indianexpress.com ವರದಿ ಮಾಡಿದೆ.

ಈ ಕಂಪೆನಿಗಳನ್ನು 'ಕಡ್ಡಾಯ ಪ್ರತಿವಾದಿಗಳು' (Mandatory Respondents) ಎಂದು ಗುರುತಿಸಲಾಗಿತ್ತು. ಆದರೆ ತನಿಖಾ ಪ್ರಕ್ರಿಯೆಯಲ್ಲಿ ಭಾಗವಹಿಸದೆ ಅಗತ್ಯ ಮಾಹಿತಿಯನ್ನು ಸಲ್ಲಿಸದ ಕಾರಣ, ಅಮೆರಿಕದ ವಾಣಿಜ್ಯ ಇಲಾಖೆ 'ಲಭ್ಯವಿರುವ ಪ್ರತಿಕೂಲ ವಾಸ್ತವಾಂಶಗಳು' (Adverse Facts Available) ಆಧಾರವಾಗಿ ಈ ಕ್ರಮ ಕೈಗೊಂಡಿದೆ ಎಂದು ಸಬ್ಸಿಡಿ ವಿರೋಧಿ ತನಿಖಾ ವರದಿ ತಿಳಿಸಿದೆ. ವರದಿಯ ಪ್ರಕಾರ, ಫೆಬ್ರವರಿ 20ರಂದು ವಲಯದಾದ್ಯಂತ ಈ ಭಾರೀ ಸುಂಕವನ್ನು ವಿಧಿಸಲಾಯಿತು.

"ಮುಂದ್ರಾ ಸೋಲಾರ್ ಎನರ್ಜಿ ಮತ್ತು ಮುಂದ್ರಾ ಸೋಲಾರ್ ಪಿವಿಯು ವಾಣಿಜ್ಯ ಇಲಾಖೆ ವಿನಂತಿಸಿದ ಅಗತ್ಯ ಮಾಹಿತಿಯನ್ನು ತಡೆಹಿಡಿದಿದ್ದಾರೆ. ನಿಗದಿತ ಗಡುವಿನೊಳಗೆ ಮಾಹಿತಿಯನ್ನು ಒದಗಿಸಲು ವಿಫಲರಾಗಿದ್ದಾರೆ. ಆರಂಭಿಕ ಪ್ರಶ್ನಾವಳಿಗೆ ಸಂಪೂರ್ಣವಾಗಿ ಅಥವಾ ಭಾಗಶಃ ಪ್ರತಿಕ್ರಿಯಿಸದೇ ಪ್ರಕ್ರಿಯೆಗೆ ಗಮನಾರ್ಹವಾಗಿ ಅಡ್ಡಿಪಡಿಸಿದ್ದಾರೆ ಎಂಬುದಾಗಿ ನಾವು ಪ್ರಾಥಮಿಕವಾಗಿ ನಿರ್ಧರಿಸುತ್ತೇವೆ" ಎಂದು ವರದಿ ಉಲ್ಲೇಖಿಸಿದೆ.

ಯುಎಸ್ ವಾಣಿಜ್ಯ ಇಲಾಖೆ ಕಂಡುಕೊಂಡಂತೆ, ಈ ಕಂಪೆನಿಗಳು ಅಲ್ಪಾವಧಿಯಲ್ಲಿ ದೊಡ್ಡ ಪ್ರಮಾಣದಲ್ಲಿ ಸೌರ ಕೋಶಗಳನ್ನು ರಫ್ತು ಮಾಡಿದ್ದು, ಹಲವು ಭಾರತೀಯ ಸರ್ಕಾರಿ ಯೋಜನೆಗಳ ಅಡಿಯಲ್ಲಿ ಪ್ರಯೋಜನಗಳನ್ನು ಪಡೆದಿವೆ. ಅವುಗಳಲ್ಲಿ ಆಮದುಗಳಿಗೆ ಮುಂಗಡ ಅನುಮತಿ ನೀಡುವ ಯೋಜನೆ, ಸುಂಕ ರಹಿತ ಆಮದು ಯೋಜನೆ, ಸುಂಕ ಕಡಿತ ಕಾರ್ಯಕ್ರಮ ಹಾಗೂ ರಫ್ತು ಪ್ರಚಾರ ಬಂಡವಾಳ ಸರಕುಗಳ (EPCG) ಯೋಜನೆ ಸೇರಿವೆ.

ಇದಲ್ಲದೆ, ಭಾರತವು ಸೌರ ಆಮದುಗಳಿಗಾಗಿ ಚೀನಾದ ಮೇಲೆ ಹೆಚ್ಚಿನ ಅವಲಂಬನೆ ಹೊಂದಿದೆ ಎಂಬುದನ್ನೂ ಯುಎಸ್ ಸೂಚಿಸಿದೆ. "ಅರ್ಜಿದಾರರು ಒದಗಿಸಿದ ಮಾಹಿತಿಯ ಪ್ರಕಾರ, ಭಾರತೀಯ ಸೌರ ಉದ್ಯಮವು ಚೀನಾದಿಂದ ಆಮದುಗಳ ಮೇಲೆ ಹೆಚ್ಚು ಅವಲಂಬಿತವಾಗಿದೆ. ಭಾರತದಲ್ಲಿನ ಚೀನಾದ ಹೂಡಿಕೆಗಳು ಕಾಂಬೋಡಿಯಾ, ಮಲೇಷ್ಯಾ, ಥೈಲ್ಯಾಂಡ್ ಮತ್ತು ವಿಯೆಟ್ನಾಂನಲ್ಲಿನ ಉತ್ಪಾದನಾ ಘಟಕಗಳಲ್ಲಿ ಕಂಡುಬರುವ ಹೂಡಿಕೆ ಪ್ರವೃತ್ತಿಯನ್ನು ಅನುಸರಿಸುತ್ತಿವೆ" ಎಂದು ವರದಿ ಹೇಳಿದೆ.

ಹೊಸದಿಲ್ಲಿಯಲ್ಲಿನ ಥಿಂಕ್ ಟ್ಯಾಂಕ್ GTRI ಮುಖ್ಯಸ್ಥ ಹಾಗೂ ಮಾಜಿ ವಾಣಿಜ್ಯ ಅಧಿಕಾರಿ ಅಜಯ್ ಶ್ರೀವಾಸ್ತವ ಅವರು, ಕಳೆದ ವರ್ಷ ನವೆಂಬರ್ ನಲ್ಲಿ ಅದಾನಿ-ಸಂಬಂಧಿತ ಸಂಸ್ಥೆಗಳು ತನಿಖೆಯಿಂದ ಹಿಂದೆ ಸರಿದ ನಂತರ ಪ್ರಕರಣ ಹೆಚ್ಚು ಶಿಕ್ಷಾರ್ಹ ವಾಗಿದೆ ಎಂದು ತಿಳಿಸಿದ್ದಾರೆ.

"ವಾರೀ ಎನರ್ಜೀಸ್ ನಂತಹ ಇತರ ಭಾರತೀಯ ಉತ್ಪಾದಕರು ಆಸಕ್ತಿ ವಹಿಸಿದ ತನಿಖೆಯಲ್ಲಿ ಭಾಗವಹಿಸಿದ್ದವು. ಆದರೆ ಪ್ರತ್ಯೇಕವಾಗಿ ತನಿಖೆ ಮಾಡದ ರಫ್ತುದಾರರು ಸಹ ಈಗ 125.9% ಪ್ರಾಥಮಿಕ ದರಕ್ಕೆ ಒಳಪಟ್ಟಿದ್ದಾರೆ. ವಾಣಿಜ್ಯ ಇಲಾಖೆ ಮುಂಗಡ, ಸುಂಕ ರಹಿತ ಆಮದು ಅಧಿಕಾರ, ಸುಂಕದ ಕೊರತೆ, RoDTEP ಮತ್ತು ರಫ್ತು ಪ್ರಚಾರ ಬಂಡವಾಳ ಸರಕುಗಳ ಯೋಜನೆ ಸೇರಿದಂತೆ ರಫ್ತು-ಸಂಬಂಧಿತ ಹಾಗೂ ಸುಂಕ ವಿನಾಯಿತಿ ಕಾರ್ಯಕ್ರಮಗಳನ್ನು ಪರಿಶೀಲಿಸಿದೆ. ರಫ್ತು ಕಾರ್ಯಕ್ಷಮತೆಯೊಂದಿಗೆ ನೇರ ಸಂಬಂಧ ಹೊಂದಿರುವ ಈ ಯೋಜನೆಗಳು ಸಾಮಾನ್ಯವಾಗಿ ಪ್ರತಿಸುಂಕ ತನಿಖೆಗಳಿಗೆ ಗುರಿಯಾಗುತ್ತವೆ" ಎಂದು ಅವರು ಹೇಳಿದ್ದಾರೆ.

ಸಬ್ಸಿಡಿ ವಿರೋಧಿ ವರದಿಯ ಪ್ರಕಾರ, ಕಳೆದ ವರ್ಷದ ಆಗಸ್ಟ್ 6ರಂದು ಅಮೆರಿಕದ ಸೌರ ತಯಾರಕರ ಒಕ್ಕೂಟ ಸಲ್ಲಿಸಿದ ಅರ್ಜಿಗೆ ಪ್ರತಿಕ್ರಿಯೆಯಾಗಿ ಕೌಂಟರ್ವೈಲಿಂಗ್ ಡ್ಯೂಟಿ CVD ತನಿಖೆಯನ್ನು ಪ್ರಾರಂಭಿಸಲಾಯಿತು.

ಭಾರತ ಸರ್ಕಾರ ಮತ್ತು ಅದಾನಿ ಗುಂಪಿನ ವಿನಂತಿಯ ಮೇರೆಗೆ, ತನಿಖಾ ಅವಧಿಯನ್ನು ಜನವರಿ 1, 2024ರಿಂದ ಡಿಸೆಂಬರ್ 31, 2024ರವರೆಗೆ ನಿಗದಿಪಡಿಸಿದ್ದನ್ನು ಬದಲಿಸಿ, ಎಪ್ರಿಲ್ 1, 2024ರಿಂದ ಮಾರ್ಚ್ 31, 2025ರವರೆಗೆ ಪರಿಷ್ಕರಿಸಲಾಯಿತು ಎಂದು ವರದಿಯಾಗಿದೆ.