ಇರಾನ್ ಮೇಲೆ ಇಸ್ರೇಲ್‌-ಅಮೆರಿಕ ಜಂಟಿ ದಾಳಿ: ಸಾಮಾಜಿಕ ಮಾಧ್ಯಮಗಳಲ್ಲಿ ಹಲವು ಚರ್ಚೆ

ಟೆಹರಾನ್: ಅಮೆರಿಕ ಮತ್ತು ಇಸ್ರೇಲ್ ನಡೆಸಿದ ಜಂಟಿ ದಾಳಿಯಲ್ಲಿ ಇರಾನ್‌ನ ಸರ್ವೋಚ್ಚ ನಾಯಕ ಅಯಾತೊಲ್ಲಾ ಅಲಿ ಖಮೇನಿ ಮೃತಪಟ್ಟಿದ್ದಾರೆ. ಅಮೆರಿಕ ಮತ್ತು ಇಸ್ರೇಲ್ ನಡೆ ಖಂಡಿಸಿ ವಿಶ್ವದ ಹಲವೆಡೆ ಆಕ್ರೋಶ ಭುಗಿಲೆದ್ದಿದೆ.

ಈ ಎಲ್ಲಾ ಬೆಳವಣಿಗೆಗಳ ನಡುವೆ ಇರಾನ್ ಮೇಲೆ ಇಸ್ರೇಲ್-ಅಮೆರಿಕ ಜಂಟಿಯಾಗಿ ದಾಳಿ ನಡೆಸಲು ಏನು ಕಾರಣ ಎಂಬುದರ ಬಗ್ಗೆ ಸಾಮಾಜಿಕ ಮಾಧ್ಯಮಗಳಲ್ಲಿ ಹಲವು ಬಗೆಯ ಚರ್ಚೆಗಳು ನಡೆಯುತ್ತಿವೆ.

ಈಚೆಗೆ ಅಫ್ಗಾನಿಸ್ತಾನವು ಪಾಕಿಸ್ತಾನದ ಮೇಲೆ ದಾಳಿ ಮಾಡಿತ್ತು. ಅದಾದ ಕೆಲವೇ ಗಂಟೆಗಳಲ್ಲಿ ಅಮೆರಿಕ ಮತ್ತು ಇಸ್ರೇಲ್ ಜಂಟಿಯಾಗಿ ಇರಾನ್ ಮೇಲೆ ದಾಳಿ ಮಾಡಿವೆ. ಈ ಹಿಂದೆ ಇಸ್ರೇಲ್, ಇರಾನಿನ ಮೇಲೆ ದಾಳಿ ಮಾಡಿದಾಗ ಪಾಕಿಸ್ತಾನ ಅದರ ಬೆಂಬಲಕ್ಕೆ ನಿಂತಿತ್ತು. ಇಸ್ರೇಲ್ ಚರಿತ್ರೆಯಿಂದ ಪಾಠ ಕಲಿತು ಬಿಟ್ಟಿತ್ತು. ತನ್ನ ಆಪ್ತ ಮಿತ್ರನನ್ನು ಕರೆಸಿಕೊಂಡು ಇರಾನ್ ದೇಶದ ಬಗೆಗಿನ ಮಾಹಿತಿ ಕೊಡಲು, ಓಮನ್ ದೇಶದ ಜೊತೆಗಿನ ಮತ್ತು ಅಫ್ಗಾನ್‌ ಜೊತೆಗಿನ ಸ್ನೇಹವನ್ನು ಬಳಸಿಕೊಂಡಿದೆ ಎಂಬುದು ಕೆಲವರ ವಾದ.

ಅಫ್ಗಾನ್‌ ಈಚೆಗೆ ಪಾಕ್ ಮೇಲೆ ಬಾಂಬ್ ದಾಳಿ ನಡೆಸಿದೆ. ಪಾಕ್ ಇರಾನ್‌ಗೆ ಸಹಾಯ ಮಾಡುವುದು ದೂರದ ಮಾತು, ತನ್ನ ಮನೆ ಉಳಿಸಿಕೊಳ್ಳಲು ಪರದಾಡುತ್ತಿದೆ. ಓಮನ್ ಸೇರಿದಂತೆ ಇತರೆ ದೇಶಗಳು ಇರಾನ್‌ನ ಚಲನವಲನಗಳ ಬಗ್ಗೆ ಮಾಹಿತಿ ಸಂಗ್ರಹಿಸಿ ಇಸ್ರೇಲ್‌ಗೆ ರವಾನೆ ಮಾಡಿವೆ ಎಂಬುದು ಚರ್ಚೆಯ ಭಾಗವಾಗಿದೆ.

'ಮೇಲ್ನೋಟಕ್ಕೆ ಇರಾನ್‌ನ ಅಣುಸ್ಥಾವರ ಹೆಚ್ಚು ಅಪಾಯಕಾರಿ. ಹೀಗಾಗಿ ಇರಾನ್‌ ಮೇಲೆ ದಾಳಿ ಅನಿವಾರ್ಯ ಎನ್ನಲಾಗಿದೆ. ನಿಜವಾದ ಕಾರಣ ತೈಲ. ಇಲ್ಲಿ ಒಂದು ಕಲ್ಲಿನಲ್ಲಿ ಎರಡು ಹಕ್ಕಿ ಹೊಡೆಯುವ ಹುನ್ನಾರವಿದೆ. ಒಂದು ತೈಲದ ಮೇಲಿನ ನಿಯಂತ್ರಣ, ಎರಡು ಚೀನಾ ಮೇಲೆ ನಿಯಂತ್ರಣ. ಇರಾನ್‌ನ ಬಹುತೇಕ ತೈಲ ಚೀನಾಕ್ಕೆ ರಫ್ತುಗುತ್ತದೆ. ಇರಾನ್‌ ಸುತ್ತಮುತ್ತಲಿನ ಎಲ್ಲಾ ಮುಸ್ಲಿಂ ದೇಶಗಳನ್ನೂ ಅಮೆರಿಕ ತನ್ನ ಹಿಡಿತದಲ್ಲಿ ಇಟ್ಟುಕೊಂಡಿದೆ. ಆ ದೇಶಗಳ ನೆಲವನ್ನು ಬಳಸಿಕೊಂಡು ಇರಾನ್‌ ಮೇಲೆ ದಾಳಿ ಮಾಡಲಾಗುತ್ತಿದೆ. ಹೀಗಾಗಿ ಇರಾನ್ ಕೋಪದಿಂದ ಬಹರೈನ್, ದುಬೈ, ಅಬುಧಾಬಿ ಮೇಲೆ ಕೂಡ ದಾಳಿ ಮಾಡುತ್ತಿದೆ' ಎಂದು ವರದಿಯಾಗಿದೆ.

ಸದ್ಯಕ್ಕೆ ಚೀನಾದ ನಡೆ ಗೊತ್ತಿಲ್ಲ. ಚೀನಾ ಯಾವ ದೇಶವನ್ನೂ ಮಿತ್ರ ಅಥವಾ ಶತ್ರು ಎಂದು ನೋಡುವುದಿಲ್ಲ. ಲಾಭ ಮತ್ತು ನಷ್ಟ ಅಷ್ಟೇ ಮುಖ್ಯ. ಚೀನಾ ಅಖಾಡಕ್ಕೆ ಇಳಿದರೆ ಅದು ಮೂರನೇ ವಿಶ್ವ ಯುದ್ಧಕ್ಕೆ ಕಾರಣವಾಗುವುದು ಪಕ್ಕಾ. ಚೀನಾ ಏನು ಮಾಡುತ್ತೆ ಎನ್ನುವುದು ನಿರ್ಣಾಯಕ.

ಇರಾನ್‌ ಮೇಲೆ ಅಮೆರಿಕ ಹಾಗೂ ಇಸ್ರೇಲ್‌ ಶನಿವಾರ ರಾತ್ರಿ ದೊಡ್ಡ ಮಟ್ಟದಲ್ಲಿ ದಾಳಿ ನಡೆಸಿವೆ. ಇರಾನ್‌ ಕೂಡ ಪ್ರತಿದಾಳಿ ನಡೆಸಿದ್ದು, ಇದರಿಂದ ಪಶ್ಚಿಮ ಏಷ್ಯಾದಲ್ಲಿ ಉದ್ವಿಗ್ನ ಸ್ಥಿತಿ ಮನೆ ಮಾಡಿದೆ.

ಇರಾನ್ ಪರಮೋಚ್ಚ ನಾಯಕ ಅಯಾತೊಲ್ಲಾ ಅಲಿ ಖಮೇನಿ ಹತ್ಯೆ ಮಾಡಲಾಗಿದೆ ಎಂದು ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಹೇಳಿದ್ದಾರೆ. 'ಖಮೇನಿ ಎಂಬ ಇತಿಹಾಸದ ಅತ್ಯಂತ ಕ್ರೂರ ವ್ಯಕ್ತಿಗಳಲ್ಲಿ ಒಬ್ಬ ಹತನಾಗಿದ್ದಾನೆ' ಎಂದು ಟ್ರಂಪ್ ತನ್ನ ಸಾಮಾಜಿಕ ಜಾಲತಾಣ 'ಟ್ರೂಥ್ ಸೋಶಿಯಲ್'ನಲ್ಲಿ ಬರೆದುಕೊಂಡಿದ್ದಾರೆ.