ಇನ್ನು ಗೋಡೆಗಳ ಮೇಲೆ ಬರೆಯಲು ರೋಬೋಟ್; 'ವಾಲ್ ಬಾಟ್' ಮಲಯಾಳಂ ಸೇರಿದಂತೆ ಯಾವುದೇ ಭಾಷೆಯಲ್ಲಿ ಬರೆಯಬಲ್ಲ ಸಾಮಥ್ರ್ಯ ಪ್ರಾಯೋಗಿಕ ನೆಲೆಯಲ್ಲಿ ಆರಂಭ

ಪಾಲಕ್ಕಾಡ್: ಗೋಡೆ ಬರವಣಿಗೆ ಇಲ್ಲದೆ ಚುನಾವಣಾ ಪ್ರಚಾರ ಪೂರ್ಣಗೊಳ್ಳುವುದಿಲ್ಲ. ಪ್ರಚಾರಕ್ಕೆ ಉತ್ತೇಜನ ನೀಡಲು ಮುಂಚಿತವಾಗಿ ಸ್ಥಳವನ್ನು ಕಾಯ್ದಿರಿಸುವುದು ಮತ್ತು ಗೋಡೆಗಳ ಮೇಲೆ ತ್ವರಿತವಾಗಿ ಬರೆಯುವುದು ರಾಜಕೀಯ ಪಕ್ಷಗಳ ತಂತ್ರವಾಗಿದೆ. ಪ್ರಚಾರ ಕ್ಷೇತ್ರದಲ್ಲಿ ಆ ತಂತ್ರವನ್ನು ವೇಗಗೊಳಿಸಲು ಈಗ ಯಂತ್ರಗಳನ್ನು ನಿಯೋಜಿಸಲಾಗುತ್ತಿದೆ. 'ವಾಲ್ ಬಾಟ್' ಎಂಬ ರೋಬೋಟ್ ತಂತ್ರಜ್ಞಾನದ ಸಹಾಯದಿಂದ ಹೊಸ ಗೋಡೆ ಬರವಣಿಗೆಯನ್ನು ಆರಂಭಿಸಲಾಗಿದೆ. ಯುಡಿಎಫ್ ಅಭ್ಯರ್ಥಿ ರಮೇಶ್ ಪಿಶಾರಡಿಗಾಗಿ ಪ್ರಾಯೋಗಿಕ ಆಧಾರದ ಮೇಲೆ ಕೊಡುಂತೀರಪುಳ್ಳಿಯಲ್ಲಿ ಗೋಡೆಗಳ ಮೇಲೆ ಬರೆಯಲು ಪ್ರಾರಂಭಿಸಿದ 'ವಾಲ್ ಬಾಟ್' ವೀಕ್ಷಕರನ್ನು ಅಚ್ಚರಿಗೊಳಿಸುತ್ತಿದೆ. 

'ವಾಲ್ ಬಾಟ್' ಅನ್ನು ಕೇರಳ ಸ್ಟಾರ್ಟಪ್ ಮಿಷನ್ ಅಡಿಯಲ್ಲಿ ಪಾಲಕ್ಕಾಡ್ ಮೂಲದ ಟೆವನೋವಾ ಟೆಕ್ಟ್ರೇಡ್ ಪ್ರೈವೇಟ್ ಲಿಮಿಟೆಡ್ ಅಭಿವೃದ್ಧಿಪಡಿಸಿದೆ. ಸಿಎನ್‍ಸಿ ವಾಲ್ ಸ್ಪ್ರೇ ಪ್ರಿಂಟಿಂಗ್ ನಿರ್ವಹಿಸುವ ರೋಬೋಟ್, ಗಣಕೀಕೃತ ಸಂಖ್ಯಾತ್ಮಕ ನಿಯಂತ್ರಣ ತಂತ್ರಜ್ಞಾನವನ್ನು ಬಳಸಿ ಕಾರ್ಯನಿರ್ವಹಿಸುತ್ತದೆ.

ಇದು ಮಲಯಾಳಂ ಸೇರಿದಂತೆ ಯಾವುದೇ ಭಾಷೆಯಲ್ಲಿ, ಯಾವುದೇ ಬಣ್ಣದಲ್ಲಿ ಬರೆಯಬಲ್ಲುದು. ಇದು ಯಾವುದೇ ಚಿತ್ರಗಳನ್ನು ಬಿಡಿಸಬಹುದು. ರೋಬೋಟ್‍ನ ಕಾರ್ಯಾಚರಣೆಯು ಪದಗಳು ಮತ್ತು ರೇಖೆಗಳ ಗಾತ್ರವನ್ನು ಅವಲಂಬಿಸಿರುತ್ತದೆ ಮತ್ತು ಇದು ಎರಡರಿಂದ ಮೂರು ಮೀಟರ್ ಉದ್ದದ ಗೋಡೆಯ ಮೇಲೆ ಭಿತ್ತಿಚಿತ್ರವನ್ನು 15-20 ನಿಮಿಷಗಳಲ್ಲಿ ಪೂರ್ಣಗೊಳಿಸಬಹುದು ಎಂದು ಕಂಪನಿಯ ಸಿಇಒ ಶಕೀಬ್ ಗೀತಾಂಜಲಿ ಹೇಳಿದರು. ಈ ರೋಬೋಟ್ ಅನ್ನು ತಂತ್ರಜ್ಞ ಮತ್ತು ವಿನ್ಯಾಸಕ ಸೇರಿದಂತೆ ಇಬ್ಬರು ಉದ್ಯೋಗಿಗಳು ನಿರ್ವಹಿಸುತ್ತಾರೆ.