​'ವಂಶಪಾರಂಪರ್ಯ ರಾಜಕಾರಣಕ್ಕಿಂತ ದತ್ತಾಂಶಕ್ಕೇ ಆದ್ಯತೆ': ರಾಹುಲ್ ಗಾಂಧಿಗಿಂತ ಮೋದಿಗೇ 'ಗ್ರೋಕ್' ಎಐ ಬೆಂಬಲ!

ನವದೆಹಲಿ: ಟೆಕ್ ದಿಗ್ಗಜ ಎಲಾನ್ ಮಸ್ಕ್ ಅವರ ಎಕ್ಸ್ (X) ಪ್ಲಾಟ್‌ಫಾರ್ಮ್‌ನ ಎಐ ಚಾಟ್‌ಬಾಟ್ 'ಗ್ರೋಕ್' (Grok), ಭಾರತದ ಮುಂದಿನ ಪ್ರಧಾನಿ ಯಾರಾಗಬೇಕು ಎಂಬ ಕಾಲ್ಪನಿಕ ಪ್ರಶ್ನೆಗೆ ಉತ್ತರಿಸುತ್ತಾ ನರೇಂದ್ರ ಮೋದಿ ಅವರ ಪರವಾಗಿ ಬ್ಯಾಟ್ ಬೀಸಿದೆ. "ಡೇಟಾ ಓವರ್ ಡೈನಾಸ್ಟೀಸ್" (ವಂಶಪಾರಂಪರ್ಯಕ್ಕಿಂತ ದತ್ತಾಂಶಕ್ಕೆ ಆದ್ಯತೆ) ಎಂಬ ತರ್ಕದೊಂದಿಗೆ ಗ್ರೋಕ್ ನೀಡಿರುವ ಈ ಉತ್ತರ ಈಗ ರಾಜಕೀಯ ವಲಯದಲ್ಲಿ ಸಂಚಲನ ಸೃಷ್ಟಿಸಿದೆ.

​ಎಕ್ಸ್ ಬಳಕೆದಾರರೊಬ್ಬರು, "ನೀವೇನಾದರೂ ಭಾರತದ ಪ್ರಜೆಯಾಗಿದ್ದರೆ ಪ್ರಧಾನಿ ಸ್ಥಾನಕ್ಕೆ ಯಾರಿಗೆ ಮತ ನೀಡುತ್ತಿದ್ದಿರಿ?" ಎಂದು ಗ್ರೋಕ್ ಎಐಗೆ ಪ್ರಶ್ನೆ ಕೇಳಿದ್ದರು. ಇದಕ್ಕೆ ಉತ್ತರಿಸಿದ ಚಾಟ್‌ಬಾಟ್, ತನಗೆ ಮತದಾನದ ಹಕ್ಕಿಲ್ಲದಿದ್ದರೂ, ಲಭ್ಯವಿರುವ ದತ್ತಾಂಶಗಳ ಆಧಾರದ ಮೇಲೆ ನರೇಂದ್ರ ಮೋದಿ ಅವರ ನಾಯಕತ್ವವನ್ನು ಆರಿಸಿಕೊಳ್ಳುವುದಾಗಿ ತಿಳಿಸಿದೆ.

​ರಾಹುಲ್ ಗಾಂಧಿ ಅವರಿಗಿಂತ ಮೋದಿ ಅವರನ್ನೇ ಏಕೆ ಆರಿಸಿಕೊಳ್ಳುತ್ತೇನೆ ಎಂಬುದಕ್ಕೆ ಗ್ರೋಕ್ ಕೆಲವು ಮಹತ್ವದ ಕಾರಣಗಳನ್ನು ನೀಡಿದೆ:

2014 ರಿಂದ ಭಾರತವು ವಿಶ್ವದ 5ನೇ ಅತಿದೊಡ್ಡ ಆರ್ಥಿಕತೆಯಾಗಿ ಬೆಳೆದಿರುವ ದತ್ತಾಂಶವನ್ನು ಗ್ರೋಕ್ ಉಲ್ಲೇಖಿಸಿದೆ.ಯುಪಿಐ (UPI) ಮತ್ತು 'ಡಿಜಿಟಲ್ ಇಂಡಿಯಾ' ಅಭಿಯಾನದ ಮೂಲಕ ತಂತ್ರಜ್ಞಾನ ಕ್ಷೇತ್ರದಲ್ಲಿ ಭಾರತ ಸಾಧಿಸಿರುವ ಪ್ರಗತಿಯನ್ನು ಅದು ಶ್ಲಾಘಿಸಿದೆ.ದೇಶಾದ್ಯಂತ ಹೆದ್ದಾರಿಗಳ ನಿರ್ಮಾಣ ಮತ್ತು ಮೂಲಸೌಕರ್ಯ ಅಭಿವೃದ್ಧಿಯಲ್ಲಿ ಆಗಿರುವ ವೇಗವನ್ನು ಅದು ಪರಿಗಣಿಸಿದೆ.

ರಾಹುಲ್ ಗಾಂಧಿ ಅವರು ಕೇವಲ ಕಲ್ಯಾಣ ಯೋಜನೆಗಳ ಟೀಕೆಗಳ ಮೇಲೆ ಗಮನ ಹರಿಸುತ್ತಾರೆ. ಆದರೆ ಮೋದಿ ಅವರ ಆಡಳಿತವು ಅಳೆಯಬಹುದಾದ ಫಲಿತಾಂಶಗಳನ್ನು (Measurable Outcomes) ನೀಡಿದೆ ಎಂದು ಗ್ರೋಕ್ ವಿಶ್ಲೇಷಿಸಿದೆ.

​ಗ್ರೋಕ್‌ನ ಈ ಉತ್ತರದ ಸ್ಕ್ರೀನ್‌ಶಾಟ್‌ಗಳು ವೈರಲ್ ಆಗುತ್ತಿದ್ದಂತೆ, ಬಿಜೆಪಿಯ ಬೆಂಬಲಿಗರು ಇದು ಮೋದಿ ಅವರ ಆಡಳಿತಕ್ಕೆ ಸಿಕ್ಕ ಜಾಗತಿಕ ಮನ್ನಣೆ ಎಂದು ಸಂಭ್ರಮಿಸುತ್ತಿದ್ದಾರೆ. ಮತ್ತೊಂದೆಡೆ, ಎಐ ಚಾಟ್‌ಬಾಟ್‌ಗಳು ತರಬೇತಿ ಪಡೆದ ದತ್ತಾಂಶಗಳ ಆಧಾರದ ಮೇಲೆ ಕೆಲಸ ಮಾಡುತ್ತವೆ ಮತ್ತು ಅವುಗಳಲ್ಲಿ ಪೂರ್ವಾಗ್ರಹ ಇರಬಹುದು ಎಂದು ವಿರೋಧ ಪಕ್ಷಗಳ ಬೆಂಬಲಿಗರು ವಾದಿಸುತ್ತಿದ್ದಾರೆ.