ಝಾಂಬಿ ಡ್ರಗ್‌ ಅಥವಾ ಝೈಲಾಜಿನ್ ಅಂದರೆ ಏನು? ಆರೋಗ್ಯದ ಮೇಲೆ ಇದು ಯಾವ ರೀತಿ ಪರಿಣಾಮ ಬೀರುತ್ತದೆ?

ವ್ಯಕ್ತಿಯೊಬ್ಬ ಝಾಂಬಿ ಡ್ರಗ್ಸ್ ಸೇವಿಸಿದ್ದಾನೆಂದು ತಪ್ಪು ಮಾಹಿತಿಯುಳ್ಳ ವಿಡಿಯೊವೊಂದನ್ನು ಕೆಲವು ದಿನಗಳಿಂದ ಸಾಮಾಜಿಕ ಮಾಧ್ಯಮಗಳಲ್ಲಿ ವೈರಲ್ ಆಗಿದೆ. ಬಾಗಲೂರು ರಸ್ತೆಯಲ್ಲಿ ವ್ಯಕ್ತಿಯೊಬ್ಬ ಮೈಮೇಲೆ ಪ್ರಜ್ಞೆ ಇಲ್ಲದವನಂತೆ ವಿಚಿತ್ರವಾಗಿ ಕೈ ಕಾಲುಗಳನ್ನು ಆಡಿಸುತ್ತಾ ನಿಂತಿದ್ದ.

ಇದನ್ನು ಗಮನಿಸಿದ ಹೇಮಂತ್ ಎಂಬ ವ್ಯಕ್ತಿ ವಿಡಿಯೊ ಮಾಡಿ ಈ ವ್ಯಕ್ತಿ 'ಝಾಂಬಿ' ಡ್ರಗ್ಸ್‌ ಸೇವನೆ ಮಾಡಿ ಈ ರೀತಿ ವಿಚಿತ್ರ ವರ್ತನೆ ಮಾಡುತ್ತಿರಬಹುದು ಎಂದು ಸಾಮಾಜಿಕ ಮಾಧ್ಯಮದಲ್ಲಿ ವಿಡಿಯೊ ಮಾಡಿ ಹಂಚಿಕೊಂಡಿದ್ದರು.

ವಿಡಿಯೊ ವೈರಲ್ ಆದ ಬೆನ್ನಲ್ಲೇ ಪೊಲೀಸರು ಈ ಬಗ್ಗೆ ತನಿಖೆ ಆರಂಭಿಸಿದ್ದರು. ವಿಡಿಯೊದಲ್ಲಿ ಇರುವ ವ್ಯಕ್ತಿಯನ್ನು ಪತ್ತೆ ಮಾಡಿ ಆತನನ್ನು ವೈದ್ಯಕೀಯ ತಪಾಸಣೆಗೆ ಒಳಪಡಿಸಿದಾಗ ಆತನ ರಕ್ತದ ಮಾದರಿಯಲ್ಲಿ ಯಾವುದೇ ರೀತಿಯ ಡ್ರಗ್ಸ್ ಅಥವಾ ಅಮಲು ಪದಾರ್ಥಗಳ ಅಂಶ ಪತ್ತೆಯಾಗಿರಲಿಲ್ಲ. ವಿಡಿಯೊದಲ್ಲಿರುವ ವ್ಯಕ್ತಿ ಹೊರಗಿನಿಂದ ಬೆಂಗಳೂರಿಗೆ ಬಂದಿದ್ದ. ಆತ ಅನಾರೋಗ್ಯದಿಂದ ಬಳಲುತ್ತಿದ್ದು ಕೆಲವು ಔಷಧಿಗಳನ್ನು ಸೇವಿಸಿದ್ದ. ಇದರ ಜತೆಗೆ ಮದ್ಯ ಸೇವನೆಯೂ ಮಾಡಿದ್ದರಿಂದ ಆ ನಶೆಗೆ ಆತನ ದೇಹದ ಸಮತೋಲನ ತಪ್ಪಿತ್ತು. ಆತ ವಿಚಿತ್ರವಾಗಿ ವರ್ತಿಸುತ್ತಿದ್ದುದಕ್ಕೆ ಸೇವಿಸಿದ ಔಷಧದ ಅಡ್ಡ ಪರಿಣಾಮ ಮತ್ತು ಮದ್ಯದ ಅಮಲು ಎಂಬುದು ಕಂಡು ಬಂದಿದೆ. ಈ ಮಧ್ಯೆ, ಸುಳ್ಳು ಮಾಹಿತಿ ಹರಡಿದ ಆರೋಪದಲ್ಲಿ ಪೊಲೀಸರು ವಿದ್ಯಾರಣ್ಯಪುರದ ನಿವಾಸಿ ಹೇಮಂತ್ ಅವರನ್ನು ಬಂಧಿಸಿದ್ದಾರೆ.

ಗುರುವಾರ ಹೇಮಂತ್‌ ಗೆ ವಿಚಾರಣೆಗೆ ಬರುವಂತೆ ನೋಟಿಸ್ ಜಾರಿ ಮಾಡಿದ್ದು, ಇದನ್ನು ಅರಿತ ಹೇಮಂತ್ ಸಾಮಾಜಿಕ ಮಾಧ್ಯಮದ ಮೂಲಕ ಕ್ಷಮೆ ಕೇಳಿದ್ದರು. ಈ ರೀತಿ 'ಅಪಪ್ರಚಾರ ನಡೆಸುವವರ ವಿರುದ್ಧ ಕಠಿಣ ಕ್ರಮ ತೆಗೆದುಕೊಳ್ಳಲಾಗುವುದು' ಎಂದು ನಗರ ಪೊಲೀಸ್ ಕಮಿಷನರ್ ಸೀಮಂತ್ ಕುಮಾರ್ ಸಿಂಗ್ ಎಚ್ಚರಿಕೆ ನೀಡಿದ್ದಾರೆ.

ಈ ಬಗ್ಗೆ ಹೇಳಿಕೆ ನೀಡಿ ಗೃಹ ಸಚಿವ ಜಿ. ಪರಮೇಶ್ವರ ಅವರು, ವಿಡಿಯೊದಲ್ಲಿರುವ ಆ ವ್ಯಕ್ತಿ ಕೆಲಸಕ್ಕಾಗಿ ನಗರಕ್ಕೆ ಬಂದು ಮದ್ಯ ಸೇವಿಸಿದ್ದರು ಎಂದು ಸ್ಪಷ್ಟಪಡಿಸಿದರು. ಆತ ಪಂಜಾಬ್‌ನವರು. ಅವರು ಔಷಧಿಗಳ ಜೊತೆಗೆ ಮದ್ಯ ಸೇವಿಸಿದ್ದರು, ಇದು ಅವರ ದೇಹದ ಮೇಲೆ ಪರಿಣಾಮ ಬೀರಿತು. ಅಂತಹ ಯಾವುದೇ ಝಾಂಬಿ ಡ್ರಗ್ ಇದರಲ್ಲಿ ಒಳಗೊಂಡಿಲ್ಲ. ವಿಡಿಯೊ ಪೋಸ್ಟ್ ಮಾಡಿದ ವ್ಯಕ್ತಿಯನ್ನು ಬಂಧಿಸಲಾಗಿದೆ ಎಂದಿದ್ದಾರೆ.

ಕಳೆದ ತಿಂಗಳು, ಚಂಡೀಗಢದಲ್ಲಿ ಇದೇ ರೀತಿಯ ಘಟನೆ ವರದಿಯಾಗಿತ್ತು. ಅಲ್ಲಿ ಬ್ಲಿಂಕಿಟ್ ಡಿಲಿವರಿ ಬಾಯ್ ಸುಮಾರು ಎರಡು ಗಂಟೆಗಳ ಕಾಲ ವಸತಿ ಪ್ರದೇಶದಲ್ಲಿ ಚಲನೆ ಇಲ್ಲದೆ ನಿಂತಿರುವುದು ಕಂಡುಬಂದಿದೆ. ಪ್ರತ್ಯಕ್ಷದರ್ಶಿಗಳು ಹೇಳುವಂತೆ ಅವನು ಯಾವುದೇ ಪ್ರತಿಕ್ರಿಯೆ ನೀಡದೆ, ಬಾಯಿಯಲ್ಲಿ ಬೀಡಿ ಇಟ್ಟುಕೊಂಡು ಸುಮ್ಮನೆ ನೋಡುತ್ತಿದ್ದನು. ಆತನಿಗೆ ಸುತ್ತಮುತ್ತಲಿನ ಬಗ್ಗೆ ಯಾವುದೇ ಅರಿವಿರಲಿಲ್ಲ. ಸ್ಥಳೀಯರು ಪೊಲೀಸರಿಗೆ ಕರೆ ಮಾಡಿದ ನಂತರ ಆತನನ್ನು ವೈದ್ಯಕೀಯ ಪರೀಕ್ಷೆಗೆ ಕರೆದೊಯ್ಯಲಾಗಿತ್ತು. ಆದರೆ ಆತನ ಆ ಸ್ಥಿತಿಗೆ ನಿಖರವಾದ ಕಾರಣ ಏನು ಎಂಬುದರ ಬಗ್ಗೆ ಯಾವುದೇ ಮಾಹಿತಿ ಇಲ್ಲಿವರೆಗೆ ಸಿಕ್ಕಿಲ್ಲ.

►ಏನಿದು ಝಾಂಬಿ ಡ್ರಗ್?

ಝಾಂಬಿ ಡ್ರಗ್ ಅಥವಾ ಝೈಲಾಜಿನ್ ಎಂದು ಕರೆಯಲ್ಪಡುವ ಈ ಔಷಧವು ಅಕ್ರಮ ಡ್ರಗ್ ಸರಬರಾಜುಗಳಲ್ಲಿ ಹೆಚ್ಚಾಗಿ ಪತ್ತೆಯಾಗುತ್ತಿದೆ. ಇದು ತೀವ್ರ ಆರೋಗ್ಯ ಪರಿಣಾಮಗಳಿಗೆ ಕಾರಣವಾಗುತ್ತದೆ. ಮೂಲತಃ ಪ್ರಾಣಿಗಳ ಟ್ರ್ಯಾಂಕ್ವಿಲೈಜರ್ (ದೊಡ್ಡ ಪ್ರಾಣಿಗಳಿಗೆ ಶಸ್ತ್ರಚಿಕಿತ್ಸೆಯ ಸಮಯದಲ್ಲಿ ನೋವು ನಿವಾರಿಸಲು ಬಳಸುವ ಔಷಧಿ) ಆಗಿದ್ದ ಝೈಲಾಜಿನ್, ಇತರ ಡ್ರಗ್ಸ್ ಜತೆ ಬೆರೆಸಿದರೆ ತೀವ್ರ ಆರೋಗ್ಯ ಪರಿಣಾಮಗಳನ್ನು ಉಂಟುಮಾಡಬಹುದು. ಇದನ್ನು ಮಾನವ ಬಳಕೆಗೆ ಅನುಮೋದಿಸಲಾಗಿಲ್ಲ. ಆದರೂ ಇದನ್ನು ಅಕ್ರಮ ಮಾರುಕಟ್ಟೆಗಳಲ್ಲಿ ಹೆರಾಯಿನ್ ಅಥವಾ ಫೆಂಟನಿಲ್ ನಂತಹ ಒಪಿಯಾಡ್‌ ಗಳೊಂದಿಗೆ ಬೆರೆಸಲಾಗುತ್ತಿದೆ. ಈ ಸಂಯೋಜನೆಯು ಅಮಲಾಗಿಸುತ್ತಿದ್ದು ಇದು ಹೆಚ್ಚು ಅಪಾಯಕಾರಿಯಾಗಿದೆ.

"ಝಾಂಬಿ ಡ್ರಗ್" ಎಂಬ ಅಡ್ಡಹೆಸರು ಅದರ ಅಡ್ಡಪರಿಣಾಮಗಳಿಂದ ಬಂದಿದೆ. ಇದನ್ನು ಸೇವಿಸಿದ ವ್ಯಕ್ತಿಗಳು ದಿಗ್ಭ್ರಮೆಗೊಂಡು, ಪ್ರತಿಕ್ರಿಯಿಸದ ಅಥವಾ ಟ್ರಾನ್ಸ್-ತರಹದ ಸ್ಥಿತಿಯಲ್ಲಿ ಕಾಣಿಸಿಕೊಳ್ಳಬಹುದು.

►ಭಾರತದಲ್ಲಿ ಪ್ರಕರಣಗಳು ಹೆಚ್ಚುತ್ತಿವೆಯೇ?

ಭಾರತದಲ್ಲಿ ಪಾಶ್ಚಿಮಾತ್ಯ ದೇಶಗಳಿಗೆ ಹೋಲಿಸಬಹುದಾದ ಯಾವುದೇ ಮಟ್ಟಗಳು ಇನ್ನೂ ಕಂಡುಬಂದಿಲ್ಲ. ಇಲ್ಲಿಯವರೆಗೆ ಯಾವುದೇ ಪ್ರಕರಣಗಳನ್ನು ಅಧಿಕಾರಿಗಳು ದೃಢಪಡಿಸಿಲ್ಲ. ಇದನ್ನು ಮಾದಕವಸ್ತು ಕಳ್ಳಸಾಗಣೆದಾರರು ಒಪಿಯಾಯ್ಡ್‌ ಗಳ ಪರಿಣಾಮಗಳನ್ನು ಹೆಚ್ಚಿಸಲು ಅಥವಾ ನಶೆ ಹೆಚ್ಚು ಹೊತ್ತು ಇರುವುದಕ್ಕಾಗಿ ಬಳಸುತ್ತಾರೆ. ಪ್ರಮಾಣಿತ ಡ್ರಗ್ ಟೆಸ್ಟ್‌ಗಳು ಹೆಚ್ಚಾಗಿ ಝೈಲಾಜಿನ್ ಅನ್ನು ಗುರುತಿಸುವಲ್ಲಿ ವಿಫಲವಾಗುತ್ತವೆ. ಹೆಚ್ಚುತ್ತಿರುವ ಮಾದಕವಸ್ತು ದುರುಪಯೋಗವು ಅದರ ಹರಡುವಿಕೆಗೆ ಕೊಡುಗೆ ನೀಡುತ್ತದೆ.

►ಝೈಲಾಜಿನ್‌ ಗೆ ಸಂಬಂಧಿಸಿದ ಆರೋಗ್ಯ ಅಪಾಯಗಳು

ಝೈಲಾಜಿನ್‌ ಗೆ ಸಂಬಂಧಿಸಿದ ಆರೋಗ್ಯ ಅಪಾಯಗಳು ತೀವ್ರವಾಗಿರುತ್ತವೆ ಮತ್ತು ಹೆಚ್ಚಾಗಿ ಜೀವಕ್ಕೆ ಅಪಾಯಕಾರಿಯಾಗಿರುತ್ತವೆ. ಅದರ ಸೇವನೆಯಿಂದ ಚರ್ಮದಲ್ಲಿ ಭಾರೀ ನೋವಿನ ಗಾಯಗಳುಂಟಾಗಬಹುದು. ಇದು ಬೇಗನೆ ಉಲ್ಬಣವಾಗುತ್ತದೆ. ತೀವ್ರತರವಾದ ಸಂದರ್ಭಗಳಲ್ಲಿ ಅಂಗವನ್ನೇ ಕತ್ತರಿಸಬೇಕಾಗುತ್ತದೆ.

►ವೈದ್ಯರ ಪ್ರಕಾರ ಇದರ ಸೇವನೆಯಿಂದಾಗಿ ಈ ರೀತಿ ಪರಿಣಾಮಗಳು ಕಾಣಿಸುತ್ತವೆ:

ಅಮಲು ಮತ್ತು ಪ್ರಜ್ಞಾಹೀನತೆ

ನಿಧಾನಗೊಂಡ ಉಸಿರಾಟ ಮತ್ತು ಹೃದಯ ಬಡಿತ

ತೀವ್ರ ಚರ್ಮದ ಹುಣ್ಣುಗಳು ಮತ್ತು ಸೋಂಕುಗಳು

ಹೆಚ್ಚೆಚ್ಚು ಸೇವನೆಗೆ ತುಡಿತ

ಹೆಚ್ಚಿನ ಅವಲಂಬನೆ ಮತ್ತು ಅದಿಲ್ಲದೆ ಆಗುವುದೇ ಇಲ್ಲ ಎನ್ನುವ ಸ್ಥಿತಿ

►ಚಿಕಿತ್ಸೆ ನೀಡುವುದು ಏಕೆ ಕಷ್ಟ?

ತಜ್ಞರ ಪ್ರಕಾರ, ಒಪಿಯಾಯ್ಡ್‌ ಗಳಂತಲ್ಲದೆ ಝೈಲಾಜಿನ್ ಮಿತಿಮೀರಿದ ಸೇವನೆಯನ್ನು ಹಿಮ್ಮೆಟ್ಟಿಸಲು ಬಳಸುವ ಪ್ರಮಾಣಿತ ಔಷಧಿಯಾದ ನಲೋಕ್ಸೋನ್‌ ಗೆ ಪ್ರತಿಕ್ರಿಯಿಸುವುದಿಲ್ಲ. ಇದು ತುರ್ತು ಚಿಕಿತ್ಸೆಯನ್ನು ಹೆಚ್ಚು ಸಂಕೀರ್ಣಗೊಳಿಸುತ್ತದೆ ಮತ್ತು ಅಪಾಯವನ್ನು ಹೆಚ್ಚಿಸುತ್ತದೆ. ಹೆಚ್ಚುವರಿಯಾಗಿ, ಬಳಕೆದಾರರು ತಾವು ಝೈಲಾಜಿನ್ ಅನ್ನು ಸೇವಿಸುತ್ತಿದ್ದೇವೆ ಎಂದು ತಿಳಿದಿರುವುದಿಲ್ಲ, ಏಕೆಂದರೆ ಇದನ್ನು ಹೆಚ್ಚಾಗಿ ಇತರ ಔಷಧಿಗಳೊಂದಿಗೆ ತಿಳಿಯದೆ ಬೆರೆಸಲಾಗುತ್ತದೆ.

►ಝೈಲಾಜಿನ್ ಸೇವಿಸಿದ ವ್ಯಕ್ತಿಯಲ್ಲಿ ಕಾಣುವ ಲಕ್ಷಣಗಳು

ಅಸಾಮಾನ್ಯ ಅರೆನಿದ್ರಾವಸ್ಥೆ ಅಥವಾ ನಶೆ

ಗೊಂದಲ ಅಥವಾ ದಿಗ್ಭ್ರಮೆ

ನಿಧಾನ ಉಸಿರಾಟ

ತೆರೆದ ಚರ್ಮದ ಹುಣ್ಣುಗಳು ಅಥವಾ ಅಲ್ಸರ್ಸ್

ಪ್ರಜ್ಞೆ ತಪ್ಪುವುದು

ಈ ಲಕ್ಷಣಗಳು ಕಾಣಿಸಿಕೊಂಡರೆ, ತಕ್ಷಣದ ವೈದ್ಯಕೀಯ ಆರೈಕೆ ನಿರ್ಣಾಯಕವಾಗಿದೆ. ಬಲವಾದ ಔಷಧ ಕಣ್ಗಾವಲು ವ್ಯವಸ್ಥೆಗಳು, ಸಾರ್ವಜನಿಕ ಜಾಗೃತಿ ಅಭಿಯಾನಗಳು, ಸುಧಾರಿತ ಪರೀಕ್ಷಾ ವಿಧಾನಗಳು, ವ್ಯಸನ ಚಿಕಿತ್ಸೆ ಮತ್ತು ಪುನರ್ವಸತಿಗೆ ಪ್ರವೇಶ ಮೊದಲಾದ ತುರ್ತು ಕ್ರಮಗಳ ಅಗತ್ಯವನ್ನು ತಜ್ಞರು ಒತ್ತಿ ಹೇಳುತ್ತಾರೆ.

ಜನರು ಈ ಬಗ್ಗೆ ತಿಳಿದುಕೊಳ್ಳುವುದು ಮುಖ್ಯ. ಅಪರಿಚಿತ ಪದಾರ್ಥಗಳನ್ನು ಪ್ರಯೋಗ ಮಾಡುವುದನ್ನು ತಪ್ಪಿಸಿ ಅಂತಾರೆ ಆರೋಗ್ಯ ತಜ್ಞರು. ಝಾಂಬಿ ಡ್ರಗ್ಸ್ ನಿರ್ಲಕ್ಷಿಸಲಾಗದ ಗಂಭೀರ ಸಾರ್ವಜನಿಕ ಆರೋಗ್ಯ ಕಾಳಜಿಯಾಗಿದೆ. ಅದರ ಅನಿರೀಕ್ಷಿತ ಪರಿಣಾಮಗಳು ಮತ್ತು ತೊಡಕುಗಳೊಂದಿಗೆ ಹೆಚ್ಚಿನ ಅಪಾಯದ ಹಿನ್ನೆಲೆ, ಝೈಲಾಜಿನ್ ಮಾದಕವಸ್ತು ದುರುಪಯೋಗದ ವಿರುದ್ಧದ ಹೋರಾಟದಲ್ಲಿ ಹೊಸ ಸವಾಲನ್ನು ಒಡ್ಡುತ್ತದೆ.