ಪಶ್ಚಿಮದಂಡೆಯಲ್ಲಿ ಮಕ್ಕಳ ಸಾವು-ನೋವಿನ ಪ್ರಮಾಣ ಹೆಚ್ಚಳ: ವಿಶ್ವಸಂಸ್ಥೆ ಕಳವಳ

ಜಿನೆವಾ: ಆಕ್ರಮಿತ ಪಶ್ಚಿಮದಂಡೆಯಲ್ಲಿ ಇಸ್ರೇಲಿ ಮಿಲಿಟರಿ ಕಾರ್ಯಾಚರಣೆಗಳು ಮತ್ತು ವಸಾಹತುಗಾರರ ದಾಳಿಯಿಂದ ಮಕ್ಕಳ ಸಾವು-ನೋವಿನ ಪ್ರಮಾಣ ಹೆಚ್ಚುತ್ತಿರುವುದನ್ನು ಮಂಗಳವಾರ ವಿಶ್ವಸಂಸ್ಥೆ ಖಂಡಿಸಿದೆ.

ವಿಶ್ವಸಂಸ್ಥೆಯ ಮಕ್ಕಳ ನಿಧಿಯ(ಯುನಿಸೆಫ್) ಪ್ರಕಾರ, ಜನವರಿ 2025ರಿಂದ ಆಕ್ರಮಿತ ಪಶ್ಚಿಮದಂಡೆಯಲ್ಲಿ ಕನಿಷ್ಠ 70 ಫೆಲೆಸ್ತೀನಿಯನ್ ಮಕ್ಕಳು ಕೊಲ್ಲಲ್ಪಟ್ಟಿದ್ದಾರೆ ಮತ್ತು 850ಕ್ಕೂ ಹೆಚ್ಚು ಮಕ್ಕಳು ಗಾಯಗೊಂಡಿದ್ದಾರೆ.

ಸ್ಥಳಾಂತರ, ಶಾಲಾ ಅಡಚಣೆಗಳು ಮತ್ತು ಮಕ್ಕಳ ಬಂಧನಗಳು ಪ್ರದೇಶದಾದ್ಯಂತ ತೀವ್ರವಾಗಿ ಹೆಚ್ಚಿವೆ. ಹೆಚ್ಚುತ್ತಿರುವ ಇಸ್ರೇಲಿ ಬಾಂಬ್ ದಾಳಿಗಳು ಮತ್ತು ವಸಾಹತುಗಾರರ ದಾಳಿಗಳು ಹೆಚ್ಚುತ್ತಿರುವ ಸಾವು-ನೋವಿಗೆ ಕಾರಣವೆಂದು ಯುನಿಸೆಫ್ ಆರೋಪಿಸಿದೆ.

ಪೂರ್ವ ಜೆರುಸಲೇಂ ಸೇರಿದಂತೆ ಆಕ್ರಮಿತ ಪಶ್ಚಿಮದಂಡೆಯಾದ್ಯಂತ ಹೆಚ್ಚುತ್ತಿರುವ ಮಿಲಿಟರಿ ಕಾರ್ಯಾಚರಣೆಗಳು ಮತ್ತು ವಸಾಹತುಗಾರರ ದಾಳಿಗೆ ಮಕ್ಕಳು ಅಸಹನೀಯ ಬೆಲೆಯನ್ನು ಪಾವತಿಸುತ್ತಿದ್ದಾರೆ. ಪಶ್ಚಿಮದಂಡೆಯಲ್ಲಿ ಇಸ್ರೇಲ್ ದೊಡ್ಡ ಪ್ರಮಾಣದ ಮಿಲಿಟರಿ ಕಾರ್ಯಾಚರಣೆಯನ್ನು ಪ್ರಾರಂಭಿಸಿದಂದಿನಿಂದ ಅಲ್ಲಿ ಪ್ರತೀ ವಾರ ಸರಾಸರಿ ಕನಿಷ್ಠ ಒಂದು ಫೆಲೆಸ್ತೀನಿಯನ್ ಮಗು ಕೊಲ್ಲಲ್ಪಟ್ಟಿದೆ. ಇದೇ ಅವಧಿಯಲ್ಲಿ ಇನ್ನೂ 850 ಮಕ್ಕಳು ಗಾಯಗೊಂಡಿದ್ದಾರೆ. ಗುಂಡೇಟಿನಿಂದ ಹೆಚ್ಚಿನ ಸಾವು-ನೋವು ಸಂಭವಿಸಿದೆ. 93% ಸಾವುಗಳಿಗೆ ಇಸ್ರೇಲಿ ಪಡೆಗಳು ಕಾರಣವಾಗಿವೆ. ಐತಿಹಾಸಿಕ ಮಟ್ಟದ ವಸಾಹತುಗಾರರ ದಾಳಿಯ ನಡುವೆ ಮಿಲಿಟರಿ ಕಾರ್ಯಾಚರಣೆಗಳು ಹೆಚ್ಚಿವೆ ಎಂದು ಯುನಿಸೆಫ್ ವಕ್ತಾರ ಜೇಮ್ಸ್ ಎಲ್ಡರ್ ಹೇಳಿದ್ದಾರೆ.

ದಾಖಲಿತ ಘಟನೆಗಳಲ್ಲಿ ಮಕ್ಕಳ ಮೇಲೆ ಗುಂಡು ಹಾರಿಸಿರುವುದು, ಇರಿತ, ಮಕ್ಕಳನ್ನು ಹೊಡೆಯುವುದು ಮತ್ತು ಮಕ್ಕಳಿಗೆ ಪೆಪ್ಪರ್ ಸ್ಪ್ರೇ ಮಾಡುವುದು ಸೇರಿದೆ. ಮಕ್ಕಳು ಬೆಳೆಯಲು ಮತ್ತು ಬದುಕಲು ಅಗತ್ಯವಿರುವ ಪರಿಸ್ಥಿತಿಗಳನ್ನು ಶಾಶ್ವತವಾಗಿ ಕಿತ್ತುಹಾಕುವ ಉದ್ದೇಶದಿಂದ ಇಂತಹ ಘಟನೆಗಳು ನಡೆಯುತ್ತವೆ. ಮನೆಗಳನ್ನು ಕೆಡವಲಾಗಿದೆ, ಶಿಕ್ಷಣವನ್ನು ನಾಶಪಡಿಸಲಾಗಿದೆ, ನೀರಿನ ವ್ಯವಸ್ಥೆಗಳ ಮೇಲೆ ದಾಳಿ ಮಾಡಲಾಗಿದೆ, ಆರೋಗ್ಯ ರಕ್ಷಣೆಗೆ ಪ್ರವೇಶಕ್ಕೆ ಅಡ್ಡಿಪಡಿಸಲಾಗಿದೆ ಮತ್ತು ಚಲನೆಯನ್ನು ನಿರ್ಬಂಧಿಸಲಾಗಿದೆ. ಅದೇ ಸಮಯದಲ್ಲಿ ಪಶ್ಚಿಮ ದಂಡೆಯಾದ್ಯಂತ ಹೇರಲಾದ ಅಡೆತಡೆಗಳು ಮತ್ತು ನಿರ್ಬಂಧಗಳ ಪ್ರಮಾಣದಲ್ಲಿ ನಾಟಕೀಯ ಏರಿಕೆ ಕಂಡುಬಂದಿದೆ. ಫೆಲೆಸ್ತೀನಿಯನ್ ಪ್ರದೇಶದ ಮಕ್ಕಳು ಶಾಲೆಗಳಿಂದ, ಆಸ್ಪತ್ರೆಗಳಿಂದ ಮತ್ತು ಇತರ ಅಗತ್ಯ ಸೇವೆಗಳಿಂದ ವಂಚಿತರಾಗುತ್ತಿದ್ದಾರೆ.

ಈ ಎಲ್ಲಾ ಪರಿಸ್ಥಿತಿಗಳು ಸಾಮೂಹಿಕ ಸ್ಥಳಾಂತರಕ್ಕೆ ಕಾರಣವಾಗಿದ್ದು ಈ ವರ್ಷದ ಪ್ರಥಮ ನಾಲ್ಕು ತಿಂಗಳಲ್ಲೇ 1,100 ಮಕ್ಕಳು ಸೇರಿದಂತೆ 2,500ಕ್ಕೂ ಹೆಚ್ಚು ಫೆಲೆಸ್ತೀನೀಯರು ಸ್ಥಳಾಂತರಗೊಂಡಿದ್ದಾರೆ. ಇದು 2025ರಲ್ಲಿ ದಾಖಲಾದ ಒಟ್ಟು ಸ್ಥಳಾಂತರವನ್ನು ಮೀರಿಸುತ್ತದೆ. 2023ರ ಅಕ್ಟೋಬರ್‌ನಲ್ಲಿ ಗಾಝಾದಲ್ಲಿ ಸಂಘರ್ಷ ಭುಗಿಲೆದ್ದ ನಂತರ ಪಶ್ಚಿಮ ದಂಡೆಯಲ್ಲಿಯೂ ಹಿಂಸಾಚಾರ ಉಲ್ಬಣಿಸಿದೆ. ಇಸ್ರೇಲ್‌ ಯೋಧರು ಅಥವಾ ವಸಾಹತುಗಾರರು ಕನಿಷ್ಠ 1070 ಫೆಲೆಸ್ತೀನೀಯರನ್ನು ಹತ್ಯೆ ಮಾಡಿರುವುದಾಗಿ ಫೆಲೆಸ್ತೀನಿಯನ್ ಪ್ರಾಧಿಕಾರ(ಪಿಎ)ದ ಅಂಕಿಅಂಶವನ್ನು ಉಲ್ಲೇಖಿಸಿ ಎಎಫ್‍ಪಿ ಸುದ್ದಿಸಂಸ್ಥೆ ವರದಿ ಮಾಡಿದೆ.