ನಿಮ್ಮ ಬಳಿ ಇನ್ನೂ 2,000 ರೂಪಾಯಿ ನೋಟು ಇದೆಯೇ?; RBI ಹೇಳುವುದೇನು?

 ನಿಮ್ಮ ಕೈಯಲ್ಲಿ ಇನ್ನೂ 2,000 ರೂಪಾಯಿ ಮುಖಬೆಲೆಯ ನೋಟು ಇದ್ದರೆ, ಚಿಂತಿಸಬೇಕಾದ ಅಗತ್ಯವಿಲ್ಲ. ಈ ನೋಟುಗಳಲ್ಲಿ ಬಹುಪಾಲು ಈಗಾಗಲೇ ಬ್ಯಾಂಕಿಂಗ್ ವ್ಯವಸ್ಥೆಗೆ ವಾಪಸ್ ಬಂದಿದ್ದರೂ ಸಹ, ಇವು ಇಂದಿಗೂ ಕಾನೂನುಬದ್ಧವಾಗಿ ಚಲಾವಣೆಯಲ್ಲಿವೆ ಎಂದು ಭಾರತೀಯ ರಿಸರ್ವ್ ಬ್ಯಾಂಕ್ (RBI) ಸ್ಪಷ್ಟಪಡಿಸಿದೆ. 

2023 ಮೇ 19ರಂದು 2,000 ರೂಪಾಯಿ ನೋಟುಗಳನ್ನು ಹಿಂಪಡೆಯುವುದಾಗಿ ಘೋಷಿಸಿದಾಗ ಚಲಾವಣೆಯಲ್ಲಿದ್ದ ನೋಟುಗಳ ಪೈಕಿ ಶೇಕಡಾ 98.47 ರಷ್ಟು ನೋಟುಗಳು ಈಗ ವಾಪಸ್ ಬಂದಿವೆ ಎಂದು ಆರ್‌ಬಿಐ ತಿಳಿಸಿದೆ.

ಕೇವಲ 5,451 ಕೋಟಿ ರೂಪಾಯಿ ಮೌಲ್ಯದ 2,000 ರೂಪಾಯಿ ನೋಟುಗಳು ಮಾತ್ರ ಚಲಾವಣೆಯಲ್ಲಿವೆ.

ಚಲಾವಣೆಯಲ್ಲಿದ್ದ 2,000 ರೂಪಾಯಿ ನೋಟುಗಳ ಒಟ್ಟು ಮೌಲ್ಯವು ಮೇ 2023 ರಲ್ಲಿದ್ದ 3.56 ಲಕ್ಷ ಕೋಟಿ ರೂಪಾಯಿಯಿಂದ 2026 ಎಪ್ರಿಲ್ 30ರ ವೇಳೆಗೆ ಕೇವಲ 5,451 ಕೋಟಿ ರೂಪಾಯಿಗೆ ಇಳಿಕೆಯಾಗಿದೆ ಎಂದು ಆರ್‌ಬಿಐ ಹೇಳಿದೆ.

2023 ಅಕ್ಟೋಬರ್ 7ರಿಂದಲೇ ಬ್ಯಾಂಕುಗಳು 2,000 ರೂಪಾಯಿ ನೋಟುಗಳನ್ನು ಜಮೆ ಮಾಡಿಕೊಳ್ಳುವುದನ್ನು ಮತ್ತು ಬದಲಾಯಿಸಿಕೊಡುವುದನ್ನು ನಿಲ್ಲಿಸಿವೆ. ಆದರೆ, ನೀವು ಈಗಲೂ ಆರ್‌ಬಿಐ ಮೂಲಕ ಇವುಗಳನ್ನು ಬದಲಾಯಿಸಿಕೊಳ್ಳಬಹುದು ಅಥವಾ ಜಮೆ ಮಾಡಬಹುದು.

►ನಿಮ್ಮ ಬಳಿ ಇನ್ನೂ 2,000 ರೂಪಾಯಿ ನೋಟು ಇದ್ದರೆ ನೀವು ಏನು ಮಾಡಬಹುದು?

ನಿಮ್ಮ ಬಳಿ ಇನ್ನೂ 2,000 ರೂಪಾಯಿ ನೋಟು ಇದ್ದರೆ, ನಿಮಗಾಗಿ ಈ ಕೆಳಗಿನ ಆಯ್ಕೆಗಳಿವೆ:

- ನೋಟು ಇಂದಿಗೂ ಮಾನ್ಯವಾಗಿದೆ: 2,000 ರೂಪಾಯಿ ನೋಟುಗಳು ಕಾನೂನುಬದ್ಧ ಚಲಾವಣೆಯಲ್ಲಿ ಮುಂದುವರಿದಿದ್ದು, ಇವುಗಳನ್ನು ಮಾನ್ಯವಾದ ಹಣವಾಗಿ ಬಳಸಬಹುದು.

- ಆರ್‌ಬಿಐ ಕಚೇರಿಗಳಲ್ಲಿ ಬದಲಾಯಿಸಿಕೊಳ್ಳಿ: ದೇಶಾದ್ಯಂತ ಇರುವ ಆರ್‌ಬಿಐನ 19 ವಿತರಣಾ ಕಚೇರಿಗಳಲ್ಲಿ ನೀವು ನಿಮ್ಮ 2,000 ರೂಪಾಯಿ ನೋಟುಗಳನ್ನು ಬದಲಾಯಿಸಿಕೊಳ್ಳಬಹುದು.

- ನಿಮ್ಮ ಬ್ಯಾಂಕ್ ಖಾತೆಗೆ ಜಮೆ ಮಾಡಿ: ನಿಮ್ಮ ಬ್ಯಾಂಕ್ ಖಾತೆಗೆ ನೇರವಾಗಿ ಜಮೆ ಮಾಡಲು ಆರ್‌ಬಿಐನ ವಿತರಣಾ ಕಚೇರಿಗಳು 2,000 ರೂಪಾಯಿ ನೋಟುಗಳನ್ನು ಸ್ವೀಕರಿಸುತ್ತವೆ.

- ಇಂಡಿಯಾ ಪೋಸ್ಟ್ ಮೂಲಕ ಕಳುಹಿಸಿ: ಭಾರತದ ಯಾವುದೇ ಅಂಚೆ ಕಚೇರಿಯಿಂದ ಇಂಡಿಯಾ ಪೋಸ್ಟ್ ಮೂಲಕ ಆರ್‌ಬಿಐನ ಯಾವುದೇ ವಿತರಣಾ ಕಚೇರಿಗೆ ನಿಮ್ಮ 2,000 ರೂಪಾಯಿ ನೋಟುಗಳನ್ನು ರವಾನಿಸಿ, ನಿಮ್ಮ ಬ್ಯಾಂಕ್ ಖಾತೆಗೆ ಹಣವನ್ನು ಜಮೆ ಮಾಡಿಸಿಕೊಳ್ಳಬಹುದು.

►ಆರ್‌ಬಿಐ 2,000 ರೂಪಾಯಿ ನೋಟುಗಳನ್ನು ಹಿಂಪಡೆದಿದ್ದೇಕೆ?

ತನ್ನ ಕರೆನ್ಸಿ ನಿರ್ವಹಣಾ ಪ್ರಕ್ರಿಯೆಯ ಭಾಗವಾಗಿ ಆರ್‌ಬಿಐ ಮೇ 19, 2023 ರಂದು 2,000 ರೂಪಾಯಿ ಮುಖಬೆಲೆಯ ನೋಟುಗಳನ್ನು ಚಲಾವಣೆಯಿಂದ ಹಿಂಪಡೆಯುವುದಾಗಿ ಘೋಷಿಸಿತು. ಈ ನೋಟುಗಳನ್ನು ಹೊಸದಾಗಿ ವಿತರಿಸಲಾಗುತ್ತಿಲ್ಲ. ಆದರೆ, ಇವು ಇಂದಿಗೂ ಮಾನ್ಯವಾಗಿವೆ ಮತ್ತು ಇವುಗಳನ್ನು ಬದಲಾಯಿಸಲು ಹಾಗೂ ಜಮೆ ಮಾಡಲು ಆರ್‌ಬಿಐ ಸೌಲಭ್ಯಗಳನ್ನು ಒದಗಿಸುತ್ತಿದೆ.