ಯುದ್ಧದ ಕಾರ್ಮೋಡ, 3,100ಕ್ಕೆ ಜಿಗಿದ ವಾಣಿಜ್ಯ ಸಿಲಿಂಡರ್: ಉದ್ಯಮಗಳ ಉಳಿವಿಗೆ ದೇಶದ ಮೊದಲ ಎಲ್‌ಪಿಜಿ ಪಾಲಿಸಿಗೆ ಬೇಡಿಕೆ!

ಪುಣೆ: ಮಧ್ಯಪ್ರಾಚ್ಯದಲ್ಲಿ ಹೆಚ್ಚುತ್ತಿರುವ ಭೌಗೋಳಿಕ ರಾಜಕೀಯ ಉದ್ವಿಗ್ನತೆ ಮತ್ತು ಇಂಧನ ಪೂರೈಕೆ ಜಾಲದಲ್ಲಿನ ವ್ಯತ್ಯಯದಿಂದಾಗಿ ಜಾಗತಿಕ ಇಂಧನ ಮಾರುಕಟ್ಟೆ ತಲ್ಲಣಗೊಂಡಿದೆ. ಈ ಹಿನ್ನೆಲೆಯಲ್ಲಿ, ದೇಶದಲ್ಲಿ ಎಲ್‌ಪಿಜಿ ಬಳಕೆಯ ದಕ್ಷತೆಯನ್ನು ಹೆಚ್ಚಿಸಲು ಸೂಕ್ತ ನೀತಿಯೊಂದನ್ನು ಜಾರಿಗೆ ತರುವಂತೆ ಭಾರತೀಯ ಇಂಧನ ಕಂಪನಿಯೊಂದು ಕೇಂದ್ರ ಸರ್ಕಾರಕ್ಕೆ ಮಹತ್ವದ ಪ್ರಸ್ತಾವನೆ ಸಲ್ಲಿಸಿದೆ.

ಪುಣೆಯ ಪ್ರಮುಖ ಎಲ್‌ಪಿಜಿ ಪರಿಹಾರಗಳ ಸಂಸ್ಥೆಯಾದ 'ಪುಣೆ ಗ್ಯಾಸ್', ದೇಶದ ಮೊದಲ 'ಎಲ್‌ಪಿಜಿ ದಕ್ಷತಾ ನೀತಿ ಚೌಕಟ್ಟು' ರೂಪಿಸುವಂತೆ ಕೋರಿ ಕೇಂದ್ರ ಪೆಟ್ರೋಲಿಯಂ ಮತ್ತು ನೈಸರ್ಗಿಕ ಅನಿಲ ಸಚಿವಾಲಯಕ್ಕೆ ಮನವಿ ಪತ್ರ ಸಲ್ಲಿಸಿದೆ. ಇರಾನ್ ಸಂಘರ್ಷ ಸೇರಿದಂತೆ ಜಾಗತಿಕ ವಿದ್ಯಮಾನಗಳಿಂದಾಗಿ ವಾಣಿಜ್ಯ ಬಳಕೆಯ ಎಲ್‌ಪಿಜಿ ಸಿಲಿಂಡರ್ ಬೆಲೆಗಳು ಗಗನಕ್ಕೇರಿದ್ದು, ಕೈಗಾರಿಕೆಗಳ ಮೇಲಿನ ಆರ್ಥಿಕ ಹೊರೆಯನ್ನು ತಗ್ಗಿಸಲು ಈ ನೀತಿ ಅತ್ಯಗತ್ಯ ಎಂದು ಕಂಪನಿ ಪ್ರತಿಪಾದಿಸಿದೆ.

ಕೈಗಾರಿಕೆಗಳ ಮೇಲೆ ಬೆಲೆ ಏರಿಕೆಯ ಬಿಸಿ

ಪ್ರಸ್ತುತ ಮಾರುಕಟ್ಟೆಯಲ್ಲಿ ವಾಣಿಜ್ಯ ಎಲ್‌ಪಿಜಿ ಸಿಲಿಂಡರ್ ಬೆಲೆಗಳು ಈ ವರ್ಷದ ಆರಂಭದಲ್ಲಿದ್ದ ಅಂದಾಜು ರೂ. 1,884 ರಿಂದ ಬರೋಬ್ಬರಿ ರೂ. 3,100ರ ಆಸುಪಾಸಿಗೆ ತಲುಪಿವೆ. ಈ ಭಾರಿ ದರ ಏರಿಕೆಯು ಎಲ್‌ಪಿಜಿ ಇಂಧನವನ್ನೇ ಪ್ರಮುಖವಾಗಿ ನೆಚ್ಚಿಕೊಂಡಿರುವ ಹೋಟೆಲ್‌ಗಳು, ರೆಸ್ಟೋರೆಂಟ್‌ಗಳು, ಆಸ್ಪತ್ರೆಗಳು, ಆಹಾರ ಸಂಸ್ಕರಣಾ ಘಟಕಗಳು, ಲಾಂಡ್ರಿ ಉದ್ಯಮ ಹಾಗೂ ಸಣ್ಣ ಮತ್ತು ಮಧ್ಯಮ ಕೈಗಾರಿಕೆಗಳಿಗೆ (MSMEs) ದೊಡ್ಡ ಹೊಡೆತ ನೀಡಿದೆ.
ಸದ್ಯಕ್ಕೆ ಭಾರತ ಸರ್ಕಾರವು ಮಧ್ಯಪ್ರವೇಶಿಸಿ ದೇಶೀಯ ಮಾರುಕಟ್ಟೆಗೆ ಎಲ್‌ಪಿಜಿ ಸರಬರಾಜಿನಲ್ಲಿ ವ್ಯತ್ಯಯವಾಗದಂತೆ ನೋಡಿಕೊಳ್ಳುತ್ತಿದೆ. ಆದರೆ, ಕೇವಲ ಪೂರೈಕೆ ವ್ಯವಸ್ಥೆಯನ್ನು ಸುಧಾರಿಸುವುದಷ್ಟೇ ಸಾಲದು, ಇಂಧನ ಭದ್ರತೆಯನ್ನು ಗಟ್ಟಿಗೊಳಿಸಲು ಲಭ್ಯವಿರುವ ಎಲ್‌ಪಿಜಿಯನ್ನು ಎಷ್ಟು ಜಾಣ್ಮೆಯಿಂದ ಬಳಸುತ್ತೇವೆ ಎಂಬುದು ಮುಖ್ಯ ಎಂದು ಪುಣೆ ಗ್ಯಾಸ್ ಅಭಿಪ್ರಾಯಪಟ್ಟಿದೆ.

ಪ್ರಸ್ತಾವಿತ ನೀತಿಯ ಪ್ರಮುಖ ಶಿಫಾರಸುಗಳು

ಕೇಂದ್ರ ಪೆಟ್ರೋಲಿಯಂ ಸಚಿವ ಹರ್ದೀಪ್ ಸಿಂಗ್ ಪುರಿ ಅವರಿಗೆ ಸಲ್ಲಿಸಿರುವ ಪ್ರಸ್ತಾವನೆಯಲ್ಲಿ ಈ ಕೆಳಗಿನ ಪ್ರಮುಖ ಅಂಶಗಳನ್ನು ಉಲ್ಲೇಖಿಸಲಾಗಿದೆ.
ದೊಡ್ಡ ಸಿಲಿಂಡರ್‌ಗಳ ಬಳಕೆ ಪ್ರೋತ್ಸಾಹಿಸುವುದು: ಕೈಗಾರಿಕೆಗಳು ಮತ್ತು ವಾಣಿಜ್ಯ ಘಟಕಗಳಲ್ಲಿ ಸಾಮಾನ್ಯ ಸಿಲಿಂಡರ್‌ಗಳ ಬದಲು 47.5 ಕೆಜಿ ತೂಕದ LOT (Liquid Off-Take) ಸಿಲಿಂಡರ್‌ಗಳನ್ನು ಬಳಸಲು ತೈಲ ಮಾರಾಟ ಕಂಪನಿಗಳು (OMCs) ಪ್ರೋತ್ಸಾಹ ನೀಡಬೇಕು. ಇದರಿಂದ ಇಂಧನ ವ್ಯರ್ಥವಾಗುವುದನ್ನು ತಡೆಯಬಹುದು ಹಾಗೂ ಕಳವು ತಡೆದು ಸುರಕ್ಷತೆಯನ್ನು ಹೆಚ್ಚಿಸಬಹುದು.
ದಕ್ಷ ಮೂಲಸೌಕರ್ಯ ಅಳವಡಿಕೆ: ದೇಶಾದ್ಯಂತ ಇರುವ ಕೈಗಾರಿಕೆಗಳಲ್ಲಿ ಅತ್ಯಾಧುನಿಕ ಹಾಗೂ ದಕ್ಷ ಎಲ್‌ಪಿಜಿ ತಂತ್ರಜ್ಞಾನ ಮತ್ತು ಮೂಲಸೌಕರ್ಯಗಳನ್ನು ಅಳವಡಿಸಲು ಉತ್ತೇಜನ ನೀಡಬೇಕು.ಜಾಗೃತಿ ಮತ್ತು ನೀತಿ ಪ್ರೋತ್ಸಾಹಕಗಳು: ಎಲ್‌ಪಿಜಿ ಉಳಿತಾಯದ ಬಗ್ಗೆ ದೇಶಾದ್ಯಂತ ಜಾಗೃತಿ ಮೂಡಿಸುವುದು ಹಾಗೂ ದಕ್ಷ ಇಂಧನ ವ್ಯವಸ್ಥೆ ಬಳಸುವ ಕೈಗಾರಿಕೆಗಳಿಗೆ ಆರ್ಥಿಕ ಅಥವಾ ನೀತಿಪೂರ್ವಕ ರಿಯಾಯಿತಿಗಳನ್ನು ಒದಗಿಸುವುದು.

ಇಂಧನ ದಕ್ಷತೆಯೇ ರಾಷ್ಟ್ರೀಯ ಆದ್ಯತೆಯಾಗಲಿ

ಇದುವರೆಗೆ ಭಾರತವು ಎಲ್‌ಪಿಜಿ ಕೊರತೆಯನ್ನು ಕೇವಲ ಖರೀದಿ ಮತ್ತು ಪೂರೈಕೆಯ ಆಧಾರದ ಮೇಲೆ ಅಳೆಯುತ್ತಿತ್ತು. ಆದರೆ, ಈಗ ನಮ್ಮಲ್ಲಿರುವ ಇಂಧನವನ್ನು ಎಷ್ಟು ದಕ್ಷತೆಯಿಂದ ಬಳಸುತ್ತಿದ್ದೇವೆ ಎಂಬುದನ್ನು ವಿಶ್ಲೇಷಿಸುವ ಸಮಯ ಬಂದಿದೆ. ಇಂಧನ ಭದ್ರತೆಯ ಮುಂದಿನ ಯಶಸ್ಸು ಕೇವಲ ಪೂರೈಕೆ ಹೆಚ್ಚಿಸುವುದರಲ್ಲಿ ಇಲ್ಲ, ಬದಲಿಗೆ ಪ್ರತಿಯೊಂದು ಕಿಲೋಗ್ರಾಂ ಇಂಧನ ವ್ಯರ್ಥವಾಗದಂತೆ ತಡೆಯುವುದರಲ್ಲಿದೆ. ಇಂಧನ ದಕ್ಷತೆಯು ಕೇವಲ ತಾಂತ್ರಿಕತೆಯಲ್ಲ, ಅದು ದೇಶದ ಆರ್ಥಿಕತೆಗೆ ಪೂರಕವಾದ ರಾಷ್ಟ್ರೀಯ ನೀತಿಯಾಗಬೇಕು ಎಂದು ಪುಣೆ ಗ್ಯಾಸ್​ ನಿರ್ದೇಶಕ ಜೇಸಲ್​ ಸಂಪತ್​ ಹೇಳಿಕೆ ನೀಡಿದ್ದಾರೆ.

ಆತ್ಮನಿರ್ಭರ ಭಾರತಕ್ಕೆ ಪೂರಕವಾದ LPGenius

ಈ ನಿಟ್ಟಿನಲ್ಲಿ ಪುಣೆ ಗ್ಯಾಸ್ ಕಂಪನಿಯು ಸ್ವಾವಲಂಬಿ ಭಾರತದ ಪರಿಕಲ್ಪನೆಯಡಿಯಲ್ಲಿ ದೇಶೀಯವಾಗಿಯೇ LPGenius ಎಂಬ ಸುಧಾರಿತ ಎಲ್‌ಪಿಜಿ ನಿರ್ವಹಣಾ ತಂತ್ರಜ್ಞಾನ ವ್ಯವಸ್ಥೆಯನ್ನು ಅಭಿವೃದ್ಧಿಪಡಿಸಿದೆ. ಈ ವ್ಯವಸ್ಥೆಯು ಕೈಗಾರಿಕಾ ಬಳಕೆದಾರರಲ್ಲಿ ಇಂಧನ ಉಳಿತಾಯ, ಕಾರ್ಯಾಚರಣೆಯ ಸುರಕ್ಷತೆ ಮತ್ತು ವೆಚ್ಚ ನಿಯಂತ್ರಣಕ್ಕೆ ದಾರಿ ಮಾಡಿಕೊಡುತ್ತದೆ.
ಭಾರತದಲ್ಲಿ ಸುಸ್ಥಿರ ಹಾಗೂ ದಕ್ಷ ಎಲ್‌ಪಿಜಿ ವ್ಯವಸ್ಥೆಯನ್ನು ನಿರ್ಮಿಸಲು ಸರ್ಕಾರದೊಂದಿಗೆ ಕೈಜೋಡಿಸಲು ಪುಣೆ ಗ್ಯಾಸ್ ಮುಂದೆ ಬಂದಿದ್ದು, ತನ್ನ ಪ್ರಾಯೋಗಿಕ ಯೋಜನೆಗಳ ವರದಿ ಹಾಗೂ ಕ್ಷೇತ್ರಮಟ್ಟದ ದತ್ತಾಂಶಗಳನ್ನು ಹಂಚಿಕೊಳ್ಳಲು ಸಿದ್ಧವಿರುವುದಾಗಿ ತಿಳಿಸಿದೆ.