ಅರಿಕ್ಕಾಡಿ ಟೋಲ್ ಪ್ಲಾಜಾ ಕೆಡವಲು ಕ್ರಮ ಆರಂಭ; ನಿರ್ಮಾಣ ಕಂಪನಿಯಿಂದ ವೆಚ್ಚದ ಅಂದಾಜು ಮತ್ತು ತಾಂತ್ರಿಕ ಪ್ರಸ್ತಾವನೆ ಸಲ್ಲಿಸಲು ಸೂಚನೆ

ಕುಂಬಳೆ:  ಭಾರತೀಯ ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರ (ಎನ್.ಎಚ್.ಎ.ಐ) ಕುಂಬಳೆಯ ಅರಿಕ್ಕಾಡಿಯಲ್ಲಿ ತಾತ್ಕಾಲಿಕವಾಗಿ ನಿರ್ಮಿಸಿ, ಬಳಿಕ ತೀವ್ರ ಪ್ರತಿಭಟನೆ ಕಾರಣ ಹಿಂತೆಗೆಯಲ್ಪಟ್ಟ ಟೋಲ್ ಪ್ಲಾಜಾ ಕೆಡವಲು ಪ್ರಕ್ರಿಯೆಯನ್ನು ಪ್ರಾರಂಭಿಸಿರುವುದಾಗಿ ತಿಳಿಸಿದೆ. ಎನ್.ಎಚ್.ಎ.ಐಯ ಕಣ್ಣೂರು ಯೋಜನಾ ಅನುಷ್ಠಾನ ಘಟಕವು ನಿರ್ಮಾಣ ಕಾರ್ಯವನ್ನು ಕೈಗೊಂಡ ಕಂಪನಿಗೆ ಟೋಲ್ ಪ್ಲಾಜಾ ಕೆಡವಲು ವಿವರವಾದ ವೆಚ್ಚದ ಅಂದಾಜು ಮತ್ತು ತಾಂತ್ರಿಕ ಪ್ರಸ್ತಾವನೆಯನ್ನು ಸಲ್ಲಿಸುವಂತೆ ನಿರ್ದೇಶಿಸಿದೆ ಎಂದು ತಿಳಿಸಿದೆ. 

ಕುಂಬಳೆ ಮೂಲದ ಅಬ್ದುಲ್‍ಖಾದರ್ ಫಿರ್ಷದ್ ಕೋಟ ಅವರು ಕೇಂದ್ರ ಸಾರ್ವಜನಿಕ ಕುಂದುಕೊರತೆ ಪರಿಹಾರ ಪೋರ್ಟಲ್ ಸಿಪಿಜಿಆರ್.ಎ.ಎಂ.ಎಸ್. ಮೂಲಕ ಸಲ್ಲಿಸಿದ ದೂರಿಗೆ ಪ್ರತಿಕ್ರಿಯೆಯಾಗಿ ಇದನ್ನು ಸ್ಪಷ್ಟಪಡಿಸಲಾಗಿದೆ. ಕುಂಬಳೆ ತಾತ್ಕಾಲಿಕ ಟೋಲ್ ಪ್ಲಾಜಾ ಬಳಿಯ ಹಂಪ್‍ಗಳು ಮತ್ತು ರಸ್ತೆ ವಿಭಜಕಗಳನ್ನು ತೆಗೆದುಹಾಕುವುದು ತಕ್ಷಣ ಸಾಧ್ಯವಿಲ್ಲ ಮತ್ತು ಅಗತ್ಯ ವೆಚ್ಚದ ಅಂದಾಜು ಸಲ್ಲಿಸಿದ ನಂತರ ಮತ್ತು ಸಂಬಂಧಪಟ್ಟ ಅಧಿಕಾರಿಗಳ ಅನುಮತಿಯನ್ನು ಪಡೆದ ನಂತರವೇ ಅಂತಹ ಕ್ರಮಗಳನ್ನು ತೆಗೆದುಕೊಳ್ಳಬಹುದು ಎಂದು ಎನ್.ಎಚ್.ಎ.ಐ ತಿಳಿಸಿದೆ.

ಜುಲೈ 1 ರಂದು ನೀಡಿದ ಅಧಿಕೃತ ಉತ್ತರದಲ್ಲಿ, ಎನ್.ಎಚ್.ಎ.ಐ ಕಣ್ಣೂರು ಯೋಜನಾ ನಿರ್ದೇಶಕ ಉಮೇಶ್ ಕೆ. ಗಾರ್ಗ್ ಅವರು ಟೋಲ್ ಪ್ಲಾಜಾವನ್ನು ಕೆಡವುವ ಪ್ರಕ್ರಿಯೆಯು ಪ್ರಗತಿಯಲ್ಲಿದೆ ಮತ್ತು ಅಗತ್ಯ ಆಡಳಿತಾತ್ಮಕ ಮತ್ತು ತಾಂತ್ರಿಕ ಅನುಮೋದನೆಗಳನ್ನು ಪಡೆದ ನಂತರ ಮುಂದಿನ ಕ್ರಮಗಳನ್ನು ತೆಗೆದುಕೊಳ್ಳಲಾಗುವುದು ಎಂದು ಸ್ಪಷ್ಟಪಡಿಸಿದ್ದಾರೆ. ಕುಂಬಳೆ ಟೋಲ್ ಪ್ಲಾಜಾ ಮುಚ್ಚಿದ ನಂತರವೂ ಉಳಿದಿರುವ ಹಂಪ್‍ಗಳು ಮತ್ತು ವಿಭಾಜಕಗಳು ವಾಹನ ಸವಾರರಿಗೆ ತೊಂದರೆ ಮತ್ತು ಅಪಾಯಗಳನ್ನು ಸೃಷ್ಟಿಸುತ್ತಿವೆ ಎಂಬ ದೂರಿನ ಆಧಾರದ ಮೇಲೆ ದೂರು ದಾಖಲಿಸಲಾಗಿತ್ತು. ಎನ್.ಎಚ್.ಎ.ಐಯ ಹೊಸ ನಿರ್ದೇಶನದೊಂದಿಗೆ, ಟೋಲ್ ಪ್ಲಾಜಾವನ್ನು ಸಂಪೂರ್ಣವಾಗಿ ಕೆಡವಲು ಮತ್ತು ಅಡೆತಡೆಗಳನ್ನು ನಿವಾರಿಸಲು ಕ್ರಮಗಳನ್ನು ತೆಗೆದುಕೊಳ್ಳಲಾಗಿದೆ.

ಯಮ ಸದೃಶ ಹಂಪ್ ಗಳು:

ಟೋಲ್ ನಿಲುಗಡೆಗೊಳಿಸಿ ತಿಂಗಳುಗಳಾದರೂ ಈವರೆಗೆ ಅಲ್ಲಿ ನಿರ್ಮಿಸಿದ್ದ ಹಂಪ್ ಗಳನ್ನು ತೆರೆದಿರಲಿಲ್ಲ. ಇದರಿಂದ ಗೊಂದಲಕ್ಕೊಳಹಾಗುವ ವಾಹನ ಚಾಲಕರು, ಹಲವು ಅಪಘಾತಗಳನ್ನು ಈಗಾಗಲೇ ಎದುರಿಸಿದ್ದಾರೆ. ಜೊತೆಗೆ ಟೋಲ್ ಇದೆಯೆಂದು ಹಾಕಲಾದ ಫಲಕಗಳೂ ಹೊಸ ಪ್ರಯಾಣಿಕರಿಗೆ ಗೊಂದಲ ಸೃಷ್ಟಿಸಿದೆ.