ವಿಮಾನ ಟರ್ಬುಲೆನ್ಸ್ ಘಟನೆ; ಗಾಂಜಾ ಸೇವಿಸಿದ್ದ ಪೈಲಟ್: ವರದಿ

ನವದೆಹಲಿ: ಥಾಯ್ಲೆಂಡ್‌ನ ಫುಕೆಟ್‌ನಿಂದ ದೆಹಲಿಗೆ ಬರುತ್ತಿದ್ದ ಏರ್‌ ಇಂಡಿಯಾ ವಿಮಾನದ ಮುಖ್ಯ ಪೈಲಟ್ ಅಮಲು ಪದಾರ್ಥ ಸೇವಿಸಿದ್ದರು ಎಂ‌ದು ಮೂಲಗಳು ತಿಳಿಸಿವೆ.‌ 

'ಮುಖ್ಯ ಪೈಲಟ್ ಗಾಂಜಾ ಸೇವಿಸಿದ್ದರು ಎಂಬುದು ಪ್ರಾಥಮಿಕ ಪರೀಕ್ಷೆಯಿಂದ ತಿಳಿದುಬಂದಿದೆ. ದೃಢೀಕರಣಕ್ಕಾಗಿ ನಿಗದಿತ ಪ್ರಯೋಗಾಲಯಕ್ಕೆ ಮಾದರಿಗಳನ್ನು ರವಾನಿಸಲಾಗಿದೆ. ಅಂತಿಮ ವರದಿ ಇನ್ನಷ್ಟೇ ಬರಬೇಕಿದೆ' ಎಂದು ಮಾಹಿತಿ ನೀಡಿವೆ.

ತನಿಖೆ ಮತ್ತು ಪರೀಕ್ಷೆ ಪ್ರಕ್ರಿಯೆ ಪೂರ್ಣಗೊಳ್ಳುವವರೆಗೆ ಇಬ್ಬರೂ ಪೈಲಟ್‌ಗಳನ್ನು ನಾಗರಿಕ ವಿಮಾನಯಾನ ಮಹಾನಿರ್ದೇಶನಾಲಯವು ಸೇವಾ ಸೇವಾಪಟ್ಟಿಯಿಂದ ಕೈಬಿಟ್ಟಿದೆ.

ಆಗಸ್ಟ್ 4ರಂದು ಮಾರ್ಗಮಧ್ಯೆ ಟರ್ಬುಲೆನ್ಸ್ ಉಂಟಾದ ಕಾರಣಕ್ಕೆ ವಿಮಾನವು 300 ಅಡಿಗಳಷ್ಟು ಕೆಳಕ್ಕೆ ಕುಸಿದಿತ್ತು. ಬಳಿಕ ದೆಹಲಿ ನಿಲ್ದಾಣದಲ್ಲಿ ಸುರಕ್ಷಿತವಾಗಿ ಭೂಸ್ಪರ್ಶ ಮಾಡಿತ್ತು. ವಿಮಾನದಲ್ಲಿ ಒಟ್ಟು 137 ಮಂದಿ ಪ್ರಯಾಣಿಕರಿದ್ದರು. ಕೆಲವು ಪ್ರಯಾಣಿಕರಿಗೆ ಮತ್ತು ಕೆಲವು ವಿಮಾನ ಸಿಬ್ಬಂದಿಗೆ ಗಾಯಗಳಾಗಿದ್ದವು.