1,000 ಕಿ.ಮೀ. ನಡೆದು ಬಂದ ಅಭಿಮಾನಿ ಜೊತೆ ಸಂವಾದ; ಜನರ ಮನಗೆದ್ದ ಹಾರ್ದಿಕ್ ಪಾಂಡ್ಯ

ನವದೆಹಲಿ: ಲಕ್ನೋ ಮೂಲದ ರವಿ ಎಂಬ ಅಭಿಮಾನಿಯನ್ನು ಗಾಯದಿಂದ ಚೇತರಿಸಿಕೊಳ್ಳುತ್ತಿರುವ ಹಾರ್ದಿಕ್ ಪಾಂಡ್ಯ ಆತ್ಮೀಯವಾಗಿ ಸ್ವಾಗತಿಸಿದರು.

ಭಾರತೀಯ ಕ್ರಿಕೆಟ್ ನಿಯಂತ್ರಣ ಮಂಡಳಿಯ (BCCI) 'ಸೆಂಟರ್ ಆಫ್ ಎಕ್ಸಲೆನ್ಸ್'ನಲ್ಲಿರುವ ಭಾರತದ ಆಲ್‌ರೌಂಡರ್ ಹಾರ್ದಿಕ್ ಪಾಂಡ್ಯ ಅವರನ್ನು ಭೇಟಿಯಾಗಲು ಅಭಿಮಾನಿಯೊಬ್ಬರು 1,000 ಕಿ.ಮೀ.ಗೂ ಹೆಚ್ಚು ದೂರವನ್ನು ಕಾಲ್ನಡಿಗೆಯಲ್ಲಿ ಕ್ರಮಿಸಿದ್ದಾರೆ.

ಲಕ್ನೋ ಮೂಲದ ರವಿ ಎಂಬ ಈ ಅಭಿಮಾನಿಯನ್ನು ಗಾಯದಿಂದ ಚೇತರಿಸಿಕೊಳ್ಳುತ್ತಿರುವ ಹಾರ್ದಿಕ್ ಪಾಂಡ್ಯ ಆತ್ಮೀಯವಾಗಿ ಸ್ವಾಗತಿಸಿದರು. ವಿಶೇಷವೆಂದರೆ, ಅಭಿಮಾನಿಯ ವಾಪಸಾತಿಗಾಗಿ ರೈಲು ಟಿಕೆಟ್‌ ಗಳನ್ನು ವ್ಯವಸ್ಥೆ ಮಾಡಿಕೊಡುವುದಾಗಿ ಹಾರ್ದಿಕ್ ಭರವಸೆ ನೀಡಿದರು. ಈ ಹೃದಯಸ್ಪರ್ಶಿ ಕ್ಷಣದ ವಿಡಿಯೊ ಈಗ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ.

ವಿಡಿಯೊದಲ್ಲಿ ಹಾರ್ದಿಕ್ ಅವರು ಅಭಿಮಾನಿಯನ್ನು ಉದ್ದೇಶಿಸಿ, "ನಿಮಗೆ ಬೇರೇನಾದರೂ ಬೇಕೆ? ನಾನು ನಿಮಗಾಗಿ ಏನಾದರೂ ಮಾಡಬಹುದೆ?" ಎಂದು ಕೇಳುವುದನ್ನು ಕಾಣಬಹುದು. ಕೈಯಲ್ಲಿ ಫಲಕವೊಂದನ್ನು ಹಿಡಿದಿದ್ದ ಆ ಅಭಿಮಾನಿಯನ್ನು ಶೀಘ್ರದಲ್ಲೇ ಮತ್ತೆ ಸಂಪರ್ಕಿಸುವುದಾಗಿಯೂ 33 ವರ್ಷದ ಹಾರ್ದಿಕ್ ಭರವಸೆ ನೀಡಿದರು.

ಮತ್ತೆ ಗಾಯದ ಸಮಸ್ಯೆಗೆ ಒಳಗಾಗಿರುವ ಹಾರ್ದಿಕ್ ಪಾಂಡ್ಯ ಸದ್ಯ ಕ್ರಿಕೆಟ್‌ ನಿಂದ ದೂರ ಉಳಿದಿದ್ದಾರೆ. ವರದಿಗಳ ಪ್ರಕಾರ, ಬೌಲಿಂಗ್ ಮಾಡುವಾಗ ಅವರಿಗೆ ನೋವು ಕಾಣಿಸಿಕೊಳ್ಳುತ್ತಿರುವ ಕಾರಣ ಸ್ಪರ್ಧಾತ್ಮಕ ಕ್ರಿಕೆಟ್‌ ಗೆ ಮರಳುವುದು ವಿಳಂಬವಾಗುತ್ತಿದೆ.

ಮೇ ತಿಂಗಳಲ್ಲಿ ನಡೆದ 2026ರ ಐಪಿಎಲ್‌ ವೇಳೆ ಗಾಯಗೊಂಡಿದ್ದ ಅವರು ಅಂದಿನಿಂದ ಆಟದಿಂದ ಹೊರಗುಳಿದಿದ್ದಾರೆ. ನ್ಯೂಝಿಲೆಂಡ್ ಪ್ರವಾಸದಲ್ಲಿ ಭಾರತ ತಂಡವು ಐದು ಟಿ20 ಪಂದ್ಯಗಳು, ಐದು ಏಕದಿನ ಪಂದ್ಯಗಳು ಮತ್ತು ಎರಡು ಟೆಸ್ಟ್ ಪಂದ್ಯಗಳನ್ನು ಆಡಬೇಕಿದ್ದು, ಈ ಪ್ರವಾಸದಿಂದಲೂ ಹಾರ್ದಿಕ್ ಹೊರಗುಳಿದಿದ್ದಾರೆ. ಬಳಿಕ ಝಿಂಬಾಬ್ವೆ ವಿರುದ್ಧದ ಏಕದಿನ ಸರಣಿಯ ವೇಳೆಗೆ ಅವರು ಫಿಟ್ ಆಗುವರೇ ಎಂಬುದನ್ನು ಕಾದು ನೋಡಬೇಕಿದೆ.