ದುಬೈನಲ್ಲಿ ನಕಲಿ ಮೊಹರು ಬಳಸಿ ₹38 ಕೋಟಿ ವಂಚನೆ ಆರೋಪ: ಐವರ ವಿರುದ್ಧ ಪ್ರಕರಣ ದಾಖಲು

ಕಾಸರಗೋಡು: ದುಬೈನಲ್ಲಿ ವ್ಯಾಪಾರದ ಹೆಸರಿನಲ್ಲಿ ನಕಲಿ ಮೊಹರು ಬಳಸಿ ಸುಮಾರು ₹38 ಕೋಟಿ ವಂಚನೆ ನಡೆಸಿರುವ ಆರೋಪದಡಿ ಕಾಸರಗೋಡು ಪೊಲೀಸರು ಐವರ ವಿರುದ್ಧ ಪ್ರಕರಣ ದಾಖಲಿಸಿಕೊಂಡಿದ್ದಾರೆ.

ಕಾಸರಗೋಡು ನೆಲ್ಲಿಕುಂಜೆ ನಿವಾಸಿಯಾಗಿದ್ದು, ಪ್ರಸ್ತುತ ಚೆರ್ಕಳ ಬಾಲನಡ್ಕದಲ್ಲಿ ವಾಸಿಸುತ್ತಿರುವ ಅಬ್ದುಲ್ ರೌಫ್ ಎನ್.ಎ. (46) ಅವರು ನೀಡಿದ ದೂರಿನ ಆಧಾರದಲ್ಲಿ ಪ್ರಕರಣ ದಾಖಲಿಸಲಾಗಿದೆ.

ಕಲ್ಲಿಕೋಟೆ ಚುಂಡನ್ ಕಂಡಿಯ ರಮೀಸ್, ಮಲಪ್ಪುರಂ ವಲಾಂಚೇರಿಯ ಯೂಸಫ್, ಕೊಟ್ಟಾಯಂ ಈರಾಟುಪೇಟೆಯ ಸಜಿಲ್ ಮತ್ತು ಫರೀದ್ ಹಾಗೂ ತಿರುವನಂತಪುರಂ ಕಟ್ಟಕ್ಕಡದ ನಿಝಾಮ್ ವಿರುದ್ಧ ಪ್ರಕರಣ ದಾಖಲಾಗಿದೆ.

2022ರ ಅಕ್ಟೋಬರ್ 22ರಿಂದ 2023ರ ಅಕ್ಟೋಬರ್ 28ರ ಅವಧಿಯಲ್ಲಿ ದುಬೈನ ದೇರಾ ಪ್ರದೇಶದಲ್ಲಿ ಈ ವಂಚನೆ ನಡೆದಿದೆ ಎಂದು ದೂರಿನಲ್ಲಿ ಆರೋಪಿಸಲಾಗಿದೆ.

ಅಬ್ದುಲ್ ರೌಫ್ ಅವರು ತಮ್ಮ ಸಂಬಂಧಿಕರೊಬ್ಬರೊಂದಿಗೆ ಪಾಲುದಾರಿಕೆಯಲ್ಲಿ ದುಬೈನ ದೇರಾ ಪ್ರದೇಶದಲ್ಲಿ ಮಿಲಿಯಮ್ ಗಿಫ್ಟ್ ಟ್ರೇಡಿಂಗ್ ಎಲ್‌ಎಲ್‌ಸಿ ಎಂಬ ಸಂಸ್ಥೆಯನ್ನು ನಡೆಸುತ್ತಿದ್ದರು. ಈ ಸಂಸ್ಥೆಯ ನಕಲಿ ಮೊಹರನ್ನು ಸೃಷ್ಟಿಸಿದ ಆರೋಪಿಗಳು, ವಿವಿಧ ಸಂದರ್ಭಗಳಲ್ಲಿ ಸಂಸ್ಥೆಗೆ ಭೇಟಿ ನೀಡಿ ದೊಡ್ಡ ಪ್ರಮಾಣದಲ್ಲಿ ಐಫೋನ್‌ಗಳನ್ನು ಖರೀದಿಸುತ್ತಿದ್ದರು ಎನ್ನಲಾಗಿದೆ.

ಖರೀದಿಯ ಸಂದರ್ಭದಲ್ಲಿ ಮೂಲ ಬಿಲ್‌ಗಳ ಬದಲಿಗೆ ಸಂಸ್ಥೆಯ ನಕಲಿ ಮೊಹರು ಹೊಂದಿರುವ ಬಿಲ್‌ಗಳನ್ನು ಡೆಲಿವರಿ ಕೌಂಟರ್‌ನಲ್ಲಿ ಸಲ್ಲಿಸಿ ಐಫೋನ್‌ಗಳನ್ನು ಪಡೆದುಕೊಳ್ಳುತ್ತಿದ್ದರು. ಬಳಿಕ ಆ ಮೊಬೈಲ್‌ಗಳನ್ನು ದುಬೈನಲ್ಲೇ ಮಾರಾಟ ಮಾಡಿ ಸಂಸ್ಥೆಗೆ ಸುಮಾರು ₹38 ಕೋಟಿ ಆರ್ಥಿಕ ನಷ್ಟ ಉಂಟುಮಾಡಿದ್ದಾರೆ ಎಂದು ಅಬ್ದುಲ್ ರೌಫ್ ದೂರಿನಲ್ಲಿ ಆರೋಪಿಸಿದ್ದಾರೆ.

ದೂರಿನ ಆಧಾರದಲ್ಲಿ ಪ್ರಕರಣ ದಾಖಲಿಸಿಕೊಂಡಿರುವ ಪೊಲೀಸರು ಮುಂದಿನ ತನಿಖೆ ಕೈಗೊಂಡಿದ್ದಾರೆ. ಆರೋಪಗಳು ತನಿಖೆಯಿಂದ ದೃಢಪಡಬೇಕಿದೆ.