ಶಬರಿಮಲೆ ಏಕಸ್ವಾಮ್ಯ ಹರಾಜಿನ ಟೆಂಡರ್ ವಿವರಗಳ ಸೋರಿಕೆ: ಮುಖ್ಯ ಗುಮಾಸ್ತ ಪಿ.ಆರ್. ರೆಜಿಮನ್ ಅಮಾನತು

ಪತ್ತನಂತಿಟ್ಟ: ಶಬರಿಮಲೆಯಲ್ಲಿ ಏಕಸ್ವಾಮ್ಯ ಹರಾಜಿಗೆ ಸಂಬಂಧಿಸಿದ ಅತ್ಯಂತ ಗೌಪ್ಯ ಟೆಂಡರ್ ವಿವರಗಳನ್ನು ಸೋರಿಕೆ ಮಾಡಿದ ಘಟನೆಯಲ್ಲಿ ಮುಖ್ಯ ಗುಮಾಸ್ತ ಪಿ.ಆರ್. ರೆಜಿಮನ್ ಅವರನ್ನು ಸೇವೆಯಿಂದ ಅಮಾನತುಗೊಳಿಸಲಾಗಿದೆ. 

ತಿರುವಾಂಕೂರು ದೇವಸ್ವಂ ಮಂಡಳಿಯ ವಿಜಿಲೆನ್ಸ್ ಇಲಾಖೆ ನಡೆಸಿದ ಪ್ರಾಥಮಿಕ ತನಿಖಾ ವರದಿಯ ಆಧಾರದ ಮೇಲೆ ದೇವಸ್ವಂ ಮಂಡಳಿಯ ತುರ್ತು ಸಭೆಯಲ್ಲಿ ಈ ಕ್ರಮ ಕೈಗೊಳ್ಳಲಾಗಿದೆ ಎಂದು ಅಧ್ಯಕ್ಷ ಕೆ. ಜಯಕುಮಾರ್ ತಿಳಿಸಿದ್ದಾರೆ.

ವಿಜಿಲೆನ್ಸ್ ನಡೆಸಿದ ವೈಜ್ಞಾನಿಕ ಪರೀಕ್ಷೆಯಲ್ಲಿ ಮುಖ್ಯ ಗುಮಾಸ್ತ ರೆಜಿಮನ್ ಅವರ ಮೊಬೈಲ್ ಫೆÇೀನ್‍ನಿಂದ ಟೆಂಡರ್ ವಿವರಗಳು ಸೋರಿಕೆಯಾಗಿವೆ ಎಂದು ಸ್ಪಷ್ಟವಾಗಿ ಕಂಡುಬಂದಿದೆ. ಸೆಪ್ಟೆಂಬರ್ 28 ರಂದು ನಡೆಯಬೇಕಿದ್ದ 110 ಅಂಗಡಿಗಳ ಸಾರ್ವಜನಿಕ ಹರಾಜಿಗೆ ಸಂಬಂಧಿಸಿದ ಪ್ರಮುಖ ಮಾಹಿತಿ ಮತ್ತು ಟೆಂಡರ್ ಪ್ರಕ್ರಿಯೆ ಬಿಡ್ ದಾರರಿಗೆ ಸೋರಿಕೆಯಾಯಿತು.

ಮಾಹಿತಿ ಸೋರಿಕೆಯಾಗಿದೆ ಎಂದು ಆರಂಭದಲ್ಲಿ ದೃಢಪಟ್ಟ ನಂತರ, ದೇವಸ್ವಂ ಮಂಡಳಿಯು ಮೊದಲು ನಡೆಯಬೇಕಿದ್ದ ಟೆಂಡರ್ ಪ್ರಕ್ರಿಯೆಯನ್ನು ಮತ್ತು ನಂತರ ನಡೆಯಬೇಕಿದ್ದ ಇ-ಹರಾಜನ್ನು ತಕ್ಷಣವೇ ರದ್ದುಗೊಳಿಸಿತು.

ಟೆಂಡರ್ ಮಾಹಿತಿ ಸೋರಿಕೆಯಲ್ಲಿ ಹೆಚ್ಚಿನ ಉದ್ಯೋಗಿಗಳು ಅಥವಾ ಹೊರಗಿನವರು ಭಾಗಿಯಾಗಿದ್ದಾರೆಯೇ ಎಂಬುದನ್ನು ವಿಜಿಲೆನ್ಸ್ ವಿವರವಾಗಿ ಪರಿಶೀಲಿಸುತ್ತಿದೆ ಮತ್ತು ತಪ್ಪಿತಸ್ಥರ ವಿರುದ್ಧ ಕಠಿಣ ಮುಂದಿನ ಕ್ರಮ ಕೈಗೊಳ್ಳಲಾಗುವುದು ಎಂದು ಕೆ. ಜಯಕುಮಾರ್ ಸ್ಪಷ್ಟಪಡಿಸಿದರು.

ಅನುಪಯುಕ್ತ ಲೋಹದ ರಚನೆಗಳನ್ನು ತೆಗೆದುಹಾಕಲು ಶಬರಿಮಲೆ ಸನ್ನಿಧಾನವನ್ನು 'ಕ್ಲೀನ್ ಕೇರಳ ಕಂಪನಿ'ಗೆ ಹಸ್ತಾಂತರಿಸಲು ಮಂಡಳಿಯ ಸಭೆ ನಿರ್ಧರಿಸಿದೆ ಎಂದು ಅವರು ಮಾಹಿತಿ ನೀಡಿದರು.