NoCAPಫೇಸ್‍ಬುಕ್ ಪುಟ ನಿಷೇಧ; ಮೋದಿ ಸರ್ಕಾರದ ಮಾಧ್ಯಮ ಬೇಟೆಯನ್ನು ಕೇರಳದಲ್ಲೂ ಅನುಸರಿಸಲಾಗುತ್ತಿದೆ: ಪಿಣರಾಯಿ ವಿಜಯನ್

ತಿರುವನಂತಪುರಂ: ಮುಖ್ಯಮಂತ್ರಿ ವಿ.ಡಿ. ಸತೀಶನ್ ಮತ್ತು ಯುಡಿಎಫ್ ಸರ್ಕಾರ ಪ್ರಧಾನಿ ನರೇಂದ್ರ ಮೋದಿ ಮತ್ತು ಸಂಘ ಪರಿವಾರ ನಡೆಸುತ್ತಿರುವ ಅದೇ ಮಾಧ್ಯಮ ಬೇಟೆಯನ್ನು ನಡೆಸುತ್ತಿದೆ ಎಂದು ವಿರೋಧ ಪಕ್ಷದ ನಾಯಕ ಪಿಣರಾಯಿ ವಿಜಯನ್ ಹೇಳಿದ್ದಾರೆ. ಡಿಜಿಟಲ್ ಮಾಧ್ಯಮ ಸಂಸ್ಥೆ NoCAP ನ ಫೇಸ್‍ಬುಕ್ ಪುಟವನ್ನು ಮುಚ್ಚಿದ ಬಗ್ಗೆ ಅವರು ಪ್ರತಿಕ್ರಿಯಿಸುತ್ತಿದ್ದರು. 

NoCAP ಎದುರಿಸುತ್ತಿರುವ ಫೇಸ್‍ಬುಕ್ ನಿಷೇಧವು UDF ಸರ್ಕಾರದ ಅಭಿವ್ಯಕ್ತಿ ಸ್ವಾತಂತ್ರ್ಯವನ್ನು ಹತ್ತಿಕ್ಕುವ ಪ್ರಯತ್ನಗಳ ಇತ್ತೀಚಿನ ಉದಾಹರಣೆಯಾಗಿದೆ.

ಸಾಮಾಜಿಕ ಮಾಧ್ಯಮಗಳ ಮೇಲಿನ ಸೆನ್ಸಾರ್‍ಶಿಪ್‍ನಲ್ಲಿ ತನ್ನ ಪಾತ್ರವಿಲ್ಲ ಎಂದು ಸರ್ಕಾರ ನಿರಂತರವಾಗಿ ಒತ್ತಾಯಿಸುತ್ತಿದ್ದರೂ, ಈ ನಿಷೇಧದ ಹಿಂದೆ ಸರ್ಕಾರದ ನೇರ ಹಸ್ತಕ್ಷೇಪವಿದೆ ಎಂದು ಮೆಟಾ ಸ್ವತಃ ಬಹಿರಂಗಪಡಿಸಿದೆ.

ಐಟಿ ಕಾಯ್ದೆಯ ಸೆಕ್ಷನ್ 79(3)(b) ಬಳಸಿ ಸರ್ಕಾರದ ನಿರ್ದೇಶನದ ಪ್ರಕಾರ ಪುಟವನ್ನು ಮುಚ್ಚಲಾಗಿದೆ ಎಂದು ಮೆಟಾ ವಿವರಿಸಿದರೂ, ನೋಕ್ಯಾಪ್ (NoCAP) ನಿಜವಾಗಿ ಯಾವ ಕಾನೂನು ಉಲ್ಲಂಘನೆ ಮಾಡಿದೆ ಎಂಬುದನ್ನು ಎರಡೂ ಇನ್ನೂ ಸ್ಪಷ್ಟಪಡಿಸಿಲ್ಲ. ಇದು ಟೀಕೆ ಮತ್ತು ಪತ್ರಿಕಾ ಸ್ವಾತಂತ್ರ್ಯದ ಬಗ್ಗೆ ಸರ್ಕಾರದ ತೀವ್ರ ಅಸಹಿಷ್ಣುತೆಯನ್ನು ಬಹಿರಂಗಪಡಿಸುತ್ತದೆ.

ಎಲ್ಲಾ ವಿರೋಧಿಗಳನ್ನು ತೊಡೆದುಹಾಕಲು ಇಂತಹ ಕ್ರಮಗಳು ತುರ್ತು ಪರಿಸ್ಥಿತಿಯ ಕರಾಳ ದಿನಗಳನ್ನು ನೆನಪಿಸುತ್ತವೆ. ಆ ಸಮಯದಲ್ಲಿ ಫ್ಯಾಸಿಸ್ಟ್ ದಬ್ಬಾಳಿಕೆಯ ವಿರುದ್ಧ ಹೋರಾಡುವ ಮತ್ತು ಸೋಲಿಸುವ ಸಂಪ್ರದಾಯವನ್ನು ಹೊಂದಿರುವ ಕೇರಳದಲ್ಲಿ ಇಂತಹ ಕ್ರಮಗಳನ್ನು ಎಂದಿಗೂ ಸಹಿಸಲಾಗುವುದಿಲ್ಲ.

ಸರ್ಕಾರದ ತಪ್ಪುಗಳನ್ನು ಎತ್ತಿ ತೋರಿಸುವುದು ಅಪರಾಧವಲ್ಲ; ಬದಲಿಗೆ, ಅದು ಯಾವುದೇ ಮಾಧ್ಯಮದ ಕರ್ತವ್ಯ. ಆದ್ದರಿಂದ, ವಿರೋಧ ಧ್ವನಿಗಳನ್ನು ತೊಡೆದುಹಾಕಲು ಪ್ರಯತ್ನಿಸುತ್ತಿರುವವರಿಗೆ ಬಲವಾದ ಉತ್ತರವನ್ನು ನೀಡಲು ಜನರು ಸಿದ್ಧರಾಗಿರಬೇಕು ಎಂದು ಪಿಣರಾಯಿ ವಿಜಯನ್ ಹೇಳಿದರು. ನಿಬರ್ಂಧಗಳ ಹೊರತಾಗಿಯೂ ತಮ್ಮ ಪತ್ರಿಕೋದ್ಯಮವನ್ನು ಮುಂದುವರಿಸಲು ನಿರ್ಧರಿಸಿದ್ದಕ್ಕಾಗಿ ನೋಕ್ಯಾಪ್ ತಂಡವನ್ನು ಅವರು ವಿಶೇಷವಾಗಿ ಅಭಿನಂದಿಸಿದರು.