ಮಾರಿಷಸ್‌ನ 192ನೇ ಆಪ್ರವಾಸಿ ದಿನಾಚರಣೆಯಲ್ಲಿ ಪಾಲ್ಗೊಳ್ಳಲು ಐಎನ್‌ಎಸ್ ತರ್ಕಶ್ ಪೋರ್ಟ್ ಲೂಯಿಸ್‌ಗೆ ಭೇಟಿ; ಉಭಯ ದೇಶಗಳ ಐತಿಹಾಸಿಕ ಮತ್ತು ನೌಕಾ ಸಂಬಂಧ ಮತ್ತಷ್ಟು ಬಲವರ್ಧನೆ

ಪೋರ್ಟ್ ಲೂಯಿಸ್: ದಕ್ಷಿಣ ಹಿಂದೂ ಮಹಾಸಾಗರ ವ್ಯಾಪ್ತಿಯ ಕಾರ್ಯಾಚರಣಾ ನಿಯೋಜನೆಯ ಅಂಗವಾಗಿ ಭಾರತೀಯ ನೌಕಾಪಡೆಯ ಯುದ್ಧನೌಕೆ 'ಐಎನ್‌ಎಸ್ ತರ್ಕಶ್' ಮಾರಿಷಸ್‌ನ ಪೋರ್ಟ್ ಲೂಯಿಸ್‌ಗೆ ತಲುಪಿದೆ. 

 ಭಾರತ ಮತ್ತು ಮಾರಿಷಸ್ ನಡುವಿನ ಬಲಿಷ್ಠ ನೌಕಾ ಪಾಲುದಾರಿಕೆ ಹಾಗೂ ಸಹಯೋಗವನ್ನು ಮತ್ತಷ್ಟು ಗಟ್ಟಿಗೊಳಿಸುವ ಉದ್ದೇಶದಿಂದ ಈ ಭೇಟಿ ನಡೆದಿದೆ. ಪೋರ್ಟ್ ಲೂಯಿಸ್ ತಲುಪಿದ ನೌಕೆ ಹಾಗೂ ಅದರ ಸಿಬ್ಬಂದಿಗೆ ಮಾರಿಷಸ್ ಕೋಸ್ಟ್ ಗಾರ್ಡ್ ಆತ್ಮೀಯ ಸ್ವಾಗತ ಕೋರಿತು. 

 ಮಾರಿಷಸ್‌ನ 192ನೇ ಆಪ್ರವಾಸಿ ದಿನದ ಅಂಗವಾಗಿ ನವೆಂಬರ್ 2 ರಂದು ನಡೆಯಲಿರುವ ಅಧಿಕೃತ ಸ್ಮರಣಾರ್ಥ ಸಮಾರಂಭದಲ್ಲಿ ಐಎನ್‌ಎಸ್ ತರ್ಕಶ್ ಭಾಗವಹಿಸಲಿದೆ. 1834ರ ನವೆಂಬರ್ 2 ರಂದು ಭಾರತದಿಂದ ಗುತ್ತಿಗೆ ಕಾರ್ಮಿಕರ ಮೊದಲ ತಂಡ ಪೋರ್ಟ್ ಲೂಯಿಸ್‌ನ ಆಪ್ರವಾಸಿ ಘಾಟ್‌ಗೆ ಬಂದಿಳಿದ ನೆನಪಿಗಾಗಿ ಈ ದಿನವನ್ನು ಆಚರಿಸಲಾಗುತ್ತದೆ. 

 ತನ್ನ ಉಪಸ್ಥಿತಿಯ ಮೂಲಕ ಉಭಯ ರಾಷ್ಟ್ರಗಳ ನಡುವಿನ ಐತಿಹಾಸಿಕ ಹಾಗೂ ಸಾಂಸ್ಕೃತಿಕ ಬಾಂಧವ್ಯದ ಆಳವನ್ನು ಭಾರತೀಯ ನೌಕಾಪಡೆ ಎತ್ತಿಹಿಡಿದಿದೆ. ಭೇಟಿಯ ಅವಧಿಯಲ್ಲಿ ಮಾರಿಷಸ್ ಕೋಸ್ಟ್ ಗಾರ್ಡ್ ಜೊತೆಗೆ ಜಂಟಿ ತರಬೇತಿ, ಕಾರ್ಯಾಚರಣಾ ಅನುಭವಗಳ ವಿನಿಮಯ, ಸಾಂಸ್ಕೃತಿಕ ವಿನಿಮಯ ಮತ್ತು ಕಡಲ ಭದ್ರತಾ ಸಹಕಾರ ಚಟುವಟಿಕೆಗಳು ಜರುಗಲಿವೆ. ಪ್ರಾದೇಶಿಕ ಭದ್ರತೆ ಮತ್ತು ಬೆಳವಣಿಗೆಯನ್ನು ಗುರಿಯಾಗಿಸಿಕೊಂಡ ಭಾರತದ 'ಮಹಾಸಾಗರ' ದೂರದೃಷ್ಟಿಯ ಭಾಗವಾಗಿ ಈ ನಿಯೋಜನೆ ಕೈಗೊಳ್ಳಲಾಗಿದೆ ಎಂದು ರಕ್ಷಣಾ ಸಚಿವಾಲಯ ಸ್ಪಷ್ಟಪಡಿಸಿದೆ.