ಪಂಜಾಬ್‌ನಲ್ಲಿ 2,347ಕ್ಕೆ ಏರಿದ ಕಳೆ-ಹುಲ್ಲು ಸುಡುವ ಪ್ರಕರಣ: ತರಣ್ ತರಣ್‌ನಲ್ಲಿ ಗರಿಷ್ಠ, ಲಕ್ಷಾಂತರ ರೂಪಾಯಿ ದಂಡ ವಸೂಲಿ

 868 ಹೊಲಗಳಲ್ಲಿ ಬೆಂಕಿ ಹಾಕಿರುವುದು ದೃಢ; 647 ಎಫ್‌ಐಆರ್ ದಾಖಲು, ಜಮೀನು ದಾಖಲೆಗಳಲ್ಲಿ 'ರೆಡ್ ಎಂಟ್ರಿ'

ಚಂಡೀಗಢ: ಉತ್ತರ ಭಾರತದಲ್ಲಿ ವಾಯುಮಾಲಿನ್ಯದ ಸಮಸ್ಯೆ ಗಂಭೀರವಾಗಿ ಮುಂದುವರಿದಿರುವ ನಡುವೆಯೇ, ಪಂಜಾಬ್‌ನಲ್ಲಿ ಕೃಷಿ ತ್ಯಾಜ್ಯ ಹಾಗೂ ಭತ್ತದ ಹುಲ್ಲು (ಸ್ಟಬಲ್ ಬರ್ನಿಂಗ್) ಸುಡುವ ಪ್ರಕರಣಗಳು ತೀವ್ರವಾಗಿ ಹೆಚ್ಚುತ್ತಿವೆ. ನವೆಂಬರ್ ೪ ರವರೆಗಿನ ಅಧಿಕೃತ ಅಂಕಿಅಂಶಗಳ ಪ್ರಕಾರ, ರಾಜ್ಯದಲ್ಲಿ ಈವರೆಗೆ ಒಟ್ಟು ೨,೩೪೭ ಬೆಂಕಿ ಹಚ್ಚುವ ಘಟನೆಗಳು ವರದಿಯಾಗಿವೆ. 

ಈ ಪೈಕಿ ತರಣ್ ತರಣ್ ಜಿಲ್ಲೆಯೊಂದರಲ್ಲೇ ಅತಿ ಹೆಚ್ಚು ಅಂದರೆ ೫೫೮ ಪ್ರಕರಣಗಳು ದಾಖಲಾಗಿವೆ. ಭತ್ತ ಕೊಯ್ಲು ಋತುವಿನಲ್ಲಿ ರೈತರು ಹೊಲಗಳಿಗೆ ಬೆಂಕಿ ಹಚ್ಚುತ್ತಿರುವುದು ಆಡಳಿತಕ್ಕೆ ದೊಡ್ಡ ಸವಾಲಾಗಿ ಪರಿಣಮಿಸಿದೆ. ಪಂಜಾಬ್ ಮಾಲಿನ್ಯ ನಿಯಂತ್ರಣ ಮಂಡಳಿಯ (PPCB) ವರದಿಯ ಪ್ರಕಾರ, ಈವರೆಗೆ ನಿಯಮ ಉಲ್ಲಂಘಿಸಿದವರ ವಿರುದ್ಧ ₹೪೦.೩೭ ಲಕ್ಷ ದಂಡ ವಿಧಿಸಲಾಗಿದ್ದು, ಅದರಲ್ಲಿ ₹೨೩.೦೫ ಲಕ್ಷ ಮೊತ್ತವನ್ನು ವಸೂಲಿ ಮಾಡಲಾಗಿದೆ.

ರಾಜ್ಯಾದ್ಯಂತ ಪರಿಶೀಲನೆ ನಡೆಸಲಾದ ೧,೯೪೨ ಹೊಲಗಳ ಪೈಕಿ ೮೬೮ ಸ್ಥಳಗಳಲ್ಲಿ ಬೆಂಕಿ ಹಾಕಿರುವುದು ಖಚಿತಪಟ್ಟಿದೆ. ಈ ಹಿನ್ನೆಲೆಯಲ್ಲಿ ೮೦೧ ಪ್ರಕರಣಗಳಲ್ಲಿ ಪರಿಸರ ಪರಿಹಾರ ದಂಡವನ್ನು ವಿಧಿಸಲಾಗಿದೆ.

ಆಡಳಿತಾತ್ಮಕ ಕಠಿಣ ಕ್ರಮದ ಭಾಗವಾಗಿ ೬೪೭ ಎಫ್‌ಐಆರ್‌ಗಳನ್ನು ದಾಖಲಿಸಲಾಗಿದ್ದು, ೭೨೩ ಪ್ರಕರಣಗಳಲ್ಲಿ ರೈತರ ಕಂದಾಯ ದಾಖಲೆಗಳಲ್ಲಿ (ಪಹಣಿ/ಆರ್‌ಟಿಸಿ) 'ರೆಡ್ ಎಂಟ್ರಿ' (Red Entry) ಗುರುತು ಹಾಕಲಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಉಳಿದಂತೆ ಫಿರೋಜ್‌ಪುರದಲ್ಲಿ ೩೧೬, ಅಮೃತಸರದಲ್ಲಿ ೨೦೭, ಬಟಿಂಡಾದಲ್ಲಿ ೧೬೭, ಸಂಗ್ರೂರ್‌ನಲ್ಲಿ ೧೬೩ ಹಾಗೂ ಪಟಿಯಾಲದಲ್ಲಿ ೧೧೦ ಪ್ರಕರಣಗಳು ವರದಿಯಾಗಿವೆ. ರಾಜ್ಯದ ವಿವಿಧ ಜಿಲ್ಲೆಗಳಲ್ಲಿ ಹೊಲಗಳಿಗೆ ಬೆಂಕಿ ಹಚ್ಚುವ ಪ್ರವೃತ್ತಿ ಎಗ್ಗಿಲ್ಲದೆ ಮುಂದುವರಿದಿರುವುದು ವಾಯುಮಾಲಿನ್ಯವನ್ನು ಮತ್ತಷ್ಟು ಉಲ್ಬಣಗೊಳಿಸಿದೆ ಎಂದು ಅಧಿಕಾರಿಗಳು ತೀವ್ರ ಕಳವಳ ವ್ಯಕ್ತಪಡಿಸಿದ್ದಾರೆ.