ನೆತನ್ಯಾಹುಗೆ ಭಾರಿ ಹಿನ್ನಡೆ: ಪ್ರಧಾನಿ ಸ್ಥಾನಕ್ಕೆ ಬೆಂಬಲ ನೀಡಲ್ಲ ಎಂದ ಮಿತ್ರಪಕ್ಷ; ಐಸನ್‌ಕೋಟ್‌ಗೆ ಪ್ಯಾಲೆಸ್ಟೈನ್ ಅಥಾರಿಟಿ ಸಾಥ್

 ಸರ್ಕಾರ ರಚನೆಗೆ ರಾಜಕೀಯ ಪಕ್ಷಗಳೊಂದಿಗೆ ಅಧ್ಯಕ್ಷ ಐಸಾಕ್ ಹೆರ್ಜಾಗ್ ಮಾತುಕತೆ ಆರಂಭ

ಟೆಲ್ ಅವೀವ್: ಇಸ್ರೇಲ್ ಸಾರ್ವತ್ರಿಕ ಚುನಾವಣೆಯ ಫಲಿತಾಂಶ ಪ್ರಕಟಗೊಂಡ ಬೆನ್ನಲ್ಲೇ ಸರ್ಕಾರ ರಚನೆಯ ಪ್ರಕ್ರಿಯೆಗೆ ಅಧ್ಯಕ್ಷ ಐಸಾಕ್ ಹೆರ್ಜಾಗ್ ಚಾಲನೆ ನೀಡಿದ್ದು, ವಿವಿಧ ರಾಜಕೀಯ ಪಕ್ಷಗಳ ಮುಖಂಡರೊಂದಿಗೆ ಸಮಾಲೋಚನೆ ಆರಂಭಿಸಿದ್ದಾರೆ. 

ಇಸ್ರೇಲ್ ಸಂಸತ್ತಾದ ‘ನೆಸ್ಸೆಟ್’ನಲ್ಲಿ (Knesset) ಯಾವುದೇ ಪಕ್ಷ ಅಥವಾ ಮೈತ್ರಿಕೂಟಕ್ಕೆ ಸ್ಪಷ್ಟ ಬಹುಮತ ಲಭಿಸದ ಕಾರಣ, ಅತಿ ಹೆಚ್ಚು ಪಕ್ಷಗಳ ಬೆಂಬಲ ಯಾರಿಗೆ ಸಿಗಲಿದೆ ಎಂಬುದನ್ನು ಅಧ್ಯಕ್ಷರು ಪರಿಶೀಲಿಸುತ್ತಿದ್ದಾರೆ. ಸಮಾಲೋಚನೆ ವೇಳೆ ಪ್ರತಿಯೊಂದು ಪಕ್ಷವೂ ತಾನು ಬೆಂಬಲಿಸುವ ಪ್ರಧಾನಿ ಅಭ್ಯರ್ಥಿಯ ಹೆಸರನ್ನು ಅಧ್ಯಕ್ಷರ ಮುಂದೆ ಪ್ರಸ್ತಾಪಿಸಬೇಕಾಗುತ್ತದೆ.

ಈ ನಡುವೆ, ಹಾಲಿ ಪ್ರಧಾನಿ ಬೆಂಜಮಿನ್ ನೆತನ್ಯಾಹು ಅವರಿಗೆ ತಮ್ಮದೇ ಮೈತ್ರಿಕೂಟದಿಂದ ತೀವ್ರ ಹಿನ್ನಡೆಯಾಗಿದೆ. ಪ್ರಧಾನಿ ಹುದ್ದೆಗೆ ನೆತನ್ಯಾಹು ಅವರ ಹೆಸರನ್ನು ಶಿಫಾರಸು ಮಾಡುವುದಿಲ್ಲ ಎಂದು ಮೈತ್ರಿಕೂಟದ ‘ಯುನೈಟೆಡ್ ತೋರಾ ಜುದಾಯಿಸಂ’ (UTJ) ಮೈತ್ರಿಯ ಭಾಗವಾಗಿರುವ ‘ದೆಗಲ್ ಹಾತೋರಾ’ (Degel HaTorah) ಪಕ್ಷ ಸ್ಪಷ್ಟಪಡಿಸಿದೆ. ತೀವ್ರ ಸಂಪ್ರದಾಯವಾದಿ ಧೋರಣೆಯ ಈ ಪಕ್ಷವು ಸರ್ಕಾರ ರಚನೆಗೆ ನೆತನ್ಯಾಹು ಅಥವಾ ವಿರೋಧ ಪಕ್ಷದ ನಾಯಕ ಗಾದಿ ಐಸನ್‌ಕೋಟ್— ಇಬ್ಬರಲ್ಲೂ ಯಾರಿಗೂ ಬೆಂಬಲ ನೀಡುವುದಿಲ್ಲ ಎಂದು ಹೇಳಿದೆ.

ಯುನೈಟೆಡ್ ತೋರಾ ಜುದಾಯಿಸಂ ಮೈತ್ರಿಕೂಟವು ಒಟ್ಟು ೭ ಸಂಸದರನ್ನು ಹೊಂದಿದ್ದು, ಇದರಲ್ಲಿ ೪ ಮಂದಿ ‘ದೆಗಲ್ ಹಾತೋರಾ’ ಪಕ್ಷದವರಾಗಿದ್ದಾರೆ. ಇವರು ಬೆಂಬಲ ಹಿಂತೆಗೆದುಕೊಂಡಿದ್ದರಿಂದ ನೆತನ್ಯಾಹು ಅವರ ಸಂಖ್ಯಾಬಲ ೪೯ಕ್ಕೆ ಕುಸಿದಿದೆ. ೧೨೦ ಸದಸ್ಯ ಬಲದ ನೆಸ್ಸೆಟ್‌ನಲ್ಲಿ ಸರ್ಕಾರ ರಚಿಸಲು ೬೧ ಸಂಸದರ ಮ್ಯಾಜಿಕ್ ನಂಬರ್ ಅಗತ್ಯವಿದೆ. ಚುನಾವಣೆಯಲ್ಲಿ ನೆತನ್ಯಾಹು ಮೈತ್ರಿಕೂಟ ೫೩ ಸ್ಥಾನಗಳನ್ನು ಗೆದ್ದಿದ್ದರೆ, ಗಾದಿ ಐಸನ್‌ಕೋಟ್ ನೇತೃತ್ವದ ವಿರೋಧ ಪಕ್ಷಗಳ ಮೈತ್ರಿಕೂಟ ೪೮ ಸ್ಥಾನಗಳನ್ನು ಪಡೆದಿದೆ.

ಇನ್ನೊಂದೆಡೆ, ಅರಬ್ ಪಕ್ಷಗಳು ಇಸ್ರೇಲ್ ಚುನಾವಣೆಯಲ್ಲಿ ಐತಿಹಾಸಿಕ ಸಾಧನೆ ಮಾಡಿದ್ದು, ರಾಮ್ (Ra'am) ಮತ್ತು ಜಾಯಿಂಟ್ ಲಿಸ್ಟ್ ಪಕ್ಷಗಳು ಜಂಟಿಯಾಗಿ ಒಟ್ಟು ೧೯ ಸ್ಥಾನಗಳನ್ನು ಗೆದ್ದುಕೊಂಡಿವೆ. ನೆತನ್ಯಾಹು ನೇತೃತ್ವದ ಸರ್ಕಾರವನ್ನು ಅಧಿಕಾರದಿಂದ ಕೆಳಗಿಳಿಸಲು ವಿರೋಧ ಪಕ್ಷದೊಂದಿಗೆ ಮೈತ್ರಿಗೆ ಸಿದ್ಧವಿರುವುದಾಗಿ ಅರಬ್ ಪಕ್ಷಗಳು ಮುನ್ಸೂಚನೆ ನೀಡಿವೆ. ಅಧ್ಯಕ್ಷರೊಂದಿಗಿನ ಭೇಟಿಯಲ್ಲಿ ಯಾವುದೇ ನಿರ್ದಿಷ್ಟ ಹೆಸರನ್ನು ಪ್ರಸ್ತಾಪಿಸದಿದ್ದರೂ, ವಿಶ್ವಾಸಮತ ಯಾಚನೆ ವೇಳೆ ಐಸನ್‌ಕೋಟ್ ಪರವಾಗಿ ನಿಲ್ಲುವ ಸಾಧ್ಯತೆಯಿದೆ ಎಂದು ವರದಿಯಾಗಿದೆ. ಇದೇ ವೇಳೆ ಪ್ಯಾಲೆಸ್ಟೈನ್ ಅಥಾರಿಟಿ ಕೂಡ ಐಸನ್‌ಕೋಟ್‌ಗೆ ಬಹಿರಂಗ ಬೆಂಬಲ ಸೂಚಿಸಿದೆ.