ರಾಜ್ಯದಲ್ಲಿ ಏ.23 ರಂದು ಮತದಾನ-ವ್ಯವಸ್ಥೆಗಳ ವಿವರ ಇಲ್ಲಿದೆ

ತಿರುವನಂತಪುರ: ಭಾನುವಾರ ಸಂಜೆ ಕೇಂದ್ರ ಚುನಾವಣಾ ಆಯುಕ್ತರು 2019ರ ಲೋಕಸಭಾ ಚುನಾವಣೆಗೆ ದಿನಾಂಕ ಪ್ರಕಟಿಸುತ್ತಿರುವಂತೆ ರಾಜಕೀಯ ವಲಯದಲ್ಲಿ ಸಿದ್ದತೆಗಳು ಗರಿಗೆದರತೊಡಗಿದೆ. ಈ ಬಾರಿ ಒಟ್ಟು 90 ಕೋಟಿ ಮತದಾರರು ಮತದಾನ ಮಾಡುವ ಅವಕಾಶ ಹೊಂದಿದವರಾಗಿದ್ದಾರೆ ಎಂದು ತಿಳಿಸಿರುವ ಮುಖ್ಯ ಚುನಾವಣಾ ಆಯುಕ್ತ ಸುನಿಲ್ ಅರೋರ ಅವರು 10 ಲಕ್ಷ ಮತಗಟ್ಟೆಗಳನ್ನು ಮತದಾನ ಪ್ರಕ್ರಿಯೆಗೆ ಸಿದ್ದಪಡಿಸಲಾಗುವುದೆಂದು ತಿಳಿಸಿದರು. ಈ ಬಾರಿ ಎಂಟೂವರೆ ಕೋಟಿ ಪ್ರಜೆಗಳು ಹೊಸತಾಗಿ ಮೊದಲ ಬಾರಿಗೆ ಮತದಾನಗೈಯ್ಯುವರು ಎಂದೂ ಮಾಹಿತಿ ನೀಡಿದರು.ಮತದಾನ ಯಂತ್ರದಲ್ಲಿ ಚಿಹ್ನೆಗಳ ಜೊತೆಗೆ ಅಭ್ಯರ್ಥಿಗಳ ಭಾವಚಿತ್ರ ಈ ಬಾರಿ ವಿಶೇಷವಾಗಿ ವ್ಯವಸ್ಥೆಗೊಳಿಸಲಾಗಿದೆ. ಒಂದು ಕೋಟಿ ಹತ್ತು ಲಕ್ಷ ಮತದಾನ ಅಧಿಕಾರಿಗಳನ್ನು ವಿವಿಧ ನೆಲೆಗಳಲ್ಲಿ ನೇಮಿಸಲಾಗುವುದೆಂದು ಅರೋರ ತಿಳಿಸಿರುವರು. ಲೋಕಸಭಾ ಚುನಾವಣೆಯ ಜೊತೆಗೆ ಆಂದ್ರಪ್ರದೇಶ, ಅರುಣಾಚಲ ಪ್ರದೇಶ, ಸಿಕ್ಕಿಂ ಹಾಗೂ ಒಡಿಶಾ ರಾಜ್ಯಗಳ ವಿಧಾನ ಮಂಡಲಗಳಿಗೂ ಚುನಾವಣೆ ನಡೆಯಲಿದೆ. ಕೇರಳ ಸಹಿತ 15 ರಾಜ್ಯಗಳಲ್ಲಿ, ಕೇಂದ್ರಾಡಳಿತ ಪ್ರದೇಶದಲ್ಲಿ ಒಂದೇ ಹಂತದಲ್ಲಿ ಏ.23 ರಂದು ಮತದಾನ ನಡೆಯಲಿದೆ. ಏ.4ರ ವರೆಗೆ ನಾಮಪತ್ರ ಸಲಲಿಸಬಹುದಾಗಿದೆ. ಏ.5 ರಂದು ನಾಮಪತ್ರದ ಸೂಕ್ಷ್ಮ ಪರಿಶೀಲನೆ ನಡೆಯಲಿದ್ದು, 8 ರಂದು ನಾಮಪತ್ರ ಹಿಂಪಡೆಯುವ ಅವಕಾಶ ನೀಡಲಾಗಿದೆ. ಮತಗಟ್ಟೆ, ಮತದಾನ ಕ್ಕೆ ಸಂಬಂಧಿಸಿದ ಸಂಶಯಗಳ ನಿವಾರಣೆಗಳೇ ಮೊದಲಾದ ಸಮಸ್ಯೆ ಪರಿಹಾರಕ್ಕೆ 1950 ಎಂಬ ಉಚಿತ ಕರೆಯ ಮೂಲಕ ಮಾಹಿತಿ ಕಲೆಹಾಕುವ ಅವಕಾಶವನ್ನು ಚುನಾವಣಾ ಆಯೋಗ ಕಲ್ಪಿಸಿದೆ. 2014ರ ಲೋಕಸಭಾ ಚುನಾವಣೆ ಏ.7 ರಿಂದ ಮೇ.12ರ ವರೆಗೆ 9 ವಿಭಾಗದಲ್ಲಿ ನಡೆದಿತ್ತು. ಮೇ.16 ರಂದು ಮತ ಎಣಿಕೆ ನಡೆದಿತ್ತು.