ಸ್ಪ್ರಿಂಕ್ಲರ್ ವಿಚಾರಣಾ ಸಮಿತಿಗೆ ಹೊಸಮುಖ ಸೇರ್ಪಡೆ-ರಾಜೀವ್ ಸದಾನಂದನ್ ಬದಲಿಗೆ ಗುಲ್ಶನ್ ರಾಯ್-; ಅಕ್ಟೋಬರ್ 10 ರ ಮೊದಲು ವರದಿ

    

        ತಿರುವನಂತಪುರ:ಭಾರೀ ವಿವಾದಕ್ಕೆ ಕಾರಣವಾದ ಸ್ಪಿಂಕ್ಲರ್ ವಿಚಾರಣಾ ಸಮಿತಿಯನ್ನು ಸರ್ಕಾರ ಮರುಸಂಘಟಿಸಿದೆ. ರಾಜೀವ್ ಸದಾನಂದನ್ ಅವರನ್ನು ಮುಖ್ಯಮಂತ್ರಿಯ ಕೋವಿಡ್ ಸಲಹೆಗಾರರನ್ನಾಗಿ ನೇಮಿಸಿದ ಹಿನ್ನೆಲೆಯಲ್ಲಿ ತನಿಖಾ ತಂಡದ ನೇತೃತ್ವಕ್ಕೆ ಹೊಸಬರನ್ನು ನೇಮಿಸಲಾಗಿದೆ. 

       ಮಾಜಿ ಸೈಬರ್ ಭದ್ರತಾ ಸಂಯೋಜಕ ಡಾ. ಗುಲ್ಶನ್ ರಾಯ್ ಅವರಿಗೆ ಹೊಸ ಜವಾಬ್ದಾರಿ ನೀಡಲಾಗಿದೆ. ಅಕ್ಟೋಬರ್ 10 ರೊಳಗೆ ವರದಿ ಸಲ್ಲಿಸುವಂತೆ ಸೂಚಿಸಲಾಗಿದೆ.  ಮಾಜಿ ಕೇಂದ್ರ ನಾಗರಿಕ ವಿಮಾನಯಾನ ಕಾರ್ಯದರ್ಶಿ ಮಾಧವನ್ ನಂಬಿಯಾರ್ ಅವರು ಸಮಿತಿಯಲ್ಲಿ ಉಳಿಯಲಿದ್ದಾರೆ.

        ಕೋವಿಡ್ ಡೇಟಾವನ್ನು ನಿರ್ವಹಿಸಲು ಯುಎಸ್ ಕಂಪನಿ ಸ್ಪ್ರಿಂಕ್ಲರ್ ಗೆ ವಹಿಸಿಕೊಡಲಾಗಿದ್ದುದು ಅಕ್ರಮಗಳ ಆರೋಪದ ಹಿನ್ನೆಲೆಯಲ್ಲಿ ಕೋಲಾಹಲ ಸೃಷ್ಟಿಸಿತ್ತು.  ಮುಖ್ಯಮಂತ್ರಿ ಪಿಣರಾಯಿ ವಿಜಯನ್ ಅವರ ಮಾಜಿ ಪ್ರಧಾನ ಕಾರ್ಯದರ್ಶಿ ಎಂ.ಶಿವಶಂಕರ್ ಅವರ ಪಾತ್ರ, ಸಂಸ್ಥೆಯ ಇತರ ವ್ಯವಹಾರಗಳು, ಡಾಟಾ ದುರುಪಯೋಗ ಮೊದಲಾದವುಗಳ ಬಗ್ಗೆ ವಿವಾದವಿದ್ದ ಹಿನ್ನೆಲೆಯಲ್ಲಿ ತನಿಖೆಗಾಗಿ ರಾಜೀವ್ ಸದಾನಂದನ್ ಅವರನ್ನೊಳಗೊಂಡ ಎರಡು ಸದಸ್ಯರ ಸಮಿತಿಯನ್ನು ನೇಮಿಸಲಾಗಿತ್ತು. 

        ರಾಜೀವ್ ಸದಾನಂದನ್ ಅವರನ್ನು ಕೋವಿಡ್ ರಕ್ಷಣೆಯ ಭಾಗವಾಗಿ ಸಲಹೆಗಾರರ ಶ್ರೇಣಿಯ ಮುಖ್ಯಮಂತ್ರಿಗಳ ಆರೋಗ್ಯ ಸಲಹೆಗಾರರಾಗಿ ನೇಮಿಸಲಾಗಿದೆ. ದೀರ್ಘಕಾಲದ ಆರೋಗ್ಯ ಕಾರ್ಯದರ್ಶಿಯಾಗಿ ಅವರ ಅನುಭವದ ಸಂಪತ್ತನ್ನು ಆಧರಿಸಿ ಈ ನೇಮಕಾತಿ ಮಾಡಲಾಗಿತ್ತು.