ಎಲ್.ಡಿ.ಎಫ್. ಕೇರಳ ಕಳೆದ ಐದು ವರ್ಷಗಳನ್ನು ವ್ಯರ್ಥ ಮಾಡಿದೆ: ಉಮ್ಮನ್ ಚಾಂಡಿ

         ಕಾಸರಗೋಡು: ಕೇರಳದಲ್ಲಿ ಕಳೆದ ಐದು ವರ್ಷಗಳು ವ್ಯರ್ಥವಾದವು ಎಂದು ಮಾಜಿ ಮುಖ್ಯಮಂತ್ರಿ ಉಮ್ಮನ್ ಚಾಂಡಿ ಹೇಳಿದ್ದಾರೆ. ಪ್ರತಿಪಕ್ಷ ನಾಯಕ ರಮೇಶ್ ಚೆನ್ನಿತ್ತಲ ನೇತೃತ್ವದ ಐಶ್ವರ್ಯ ಕೇರಳ ಯಾತ್ರೆಯನ್ನು ನಿನ್ನೆ ಸಂಜೆ ಕುಂಬಳೆಯಲ್ಲಿ ಉದ್ಘಾಟಿಸಿ ಅವರು ಮಾತನಾಡಿದರು. ಕೇರಳದ ಅಭಿವೃದ್ಧಿ ಚಟುವಟಿಕೆಗಳು ಸ್ಥಗಿತಗೊಂಡಿವೆ ಎಂದು ಅವರು ಆರೋಪಿಸಿದರು.

        ಅಭಿವೃದ್ಧಿಯನ್ನು ಘೋಷಿಸಿದರೆ ಸಾಲದು. ಸಾಕಾರಗೊಳಿಸಬೇಕು. ಪ್ರಸ್ತುತ ಸರ್ಕಾರ ಜನರಿಗೆ ನ್ಯಾಯ ಒದಗಿಸಿಲ್ಲ. ಈ ಸರ್ಕಾರ ಮತಗಳ ಸಲುವಾಗಿ ಕೋಮುವಾದವನ್ನು ಹೇರುತ್ತಿದೆ. ಎಲ್ಡಿಎಫ್ ದ್ವೇಷ, ಕೊಲೆ ಮತ್ತು ಕೋಮುವಾದಿ ರಾಜಕಾರಣವನ್ನು ಹೊಂದಿದೆ ಎಂದು ಉಮ್ಮನ್ ಚಾಂಡಿ ಹೇಳಿದರು.

         ಪ್ರತಿಪಕ್ಷದ ನಾಯಕ ರಮೇಶ್ ಚೆನ್ನಿತ್ತಲ ಅವರು ವಿಧಾನ ಸಭಾ ಅಧಿವೇಶನದಲ್ಲಿ ಮೊಳಗಿಸಿದ ಸರ್ಕಾರದ ವಿರುದ್ಧದ ಆರೋಪಗಳು ನಿಜವೆಂದು ಸಾಬೀತಾಯಿತು. ರಮೇಶ್ ಚೆನ್ನಿತ್ತಲ ಈ ಯಾತ್ರೆಯನ್ನು ಯಶಸ್ವಿಯಾಗಿ ಮುನ್ನಡೆಸಲಿದ್ದಾರೆ  ಎಂದು ಉಮ್ಮನ್ ಚಾಂಡಿ ಹೇಳಿದರು. ರಾಜ್ಯದಲ್ಲಿ ನಿರುದ್ಯೋಗ ತೀವ್ರವಾಗಿ ಏರಿದೆ. ಹಿಂಬದಿಯ ನೇಮಕಾತಿಗಳ ಮೂಲಕ ಎಡ ಸರ್ಕಾರ ಲಕ್ಷಾಂತರ ಜನರನ್ನು ವಂಚಿಸುತ್ತಿದೆ. ಶಬರಿಮಲೆಯ ನಂಬಿಕೆಗಳನ್ನು ರಕ್ಷಿಸಲು ಸರ್ಕಾರ ಪರಿಸ್ಥಿತಿಗಳನ್ನು ರಚಿಸಬೇಕು. ಜನರ ಭಾವನೆಗಳನ್ನು ಅರಿಯದ ಸರ್ಕಾರವನ್ನು ಉಚ್ಚಾಟಿಸುವುದೇ ಈ ಯಾತ್ರೆಯ ಲಕ್ಷ್ಯವಾಗಿದೆ ಎಂದು ಉಮ್ಮನ್ ಚಾಂಡಿ ಹೇಳಿದರು.

     ಹಿಂದಿನ ಯುಡಿಎಫ್ ಸರ್ಕಾರದ ಅವಧಿಯಲ್ಲಿ ನಿರ್ವಹಿಸಲಾದ ಯೋಜನೆಗಳ ಮುಂದುವರಿಕೆಯಾಗಿ ಏನಾದರೊಂದು ಯೋಜನೆಯನ್ನು ಎಡ ಸರ್ಕಾರ ಮಾಡಿದೆಯೇ ಎಂದು ಪ್ರಶ್ನಿಸಿದ ಚಾಂಡಿ ಯುಡಿಎಫ್ ಕಾಲದಲ್ಲಿ ನಿರ್ಮಿಸಲಾದ ಉಕ್ಕಿನಡ್ಕ ವೈದ್ಯಕೀಯ ಕಾಲೇಜನ್ನು ಇಷ್ಟೂ ವರ್ಷ ನೆನೆಗುದಿಗೆ ಬೀಳುವಂತೆ ಮಾಡಿರುವುದು ಮಹತ್ ಸಾಧನೆಯಾಗಿದೆ. ಆದರೆ ಕೋವಿಡ್ ಆರಂಭದ ಕಾಲದಲ್ಲಿ ಮಂಗಳೂರುಸಂಚಾರ ದುಸ್ಥರವಾಗಿ ಇಲ್ಲಿಯ ಜನಸಾಮಾನ್ಯರು ಕನಿಷ್ಠ ಚಿಕಿತ್ಸೆಗೂ ಪರದಾಡುವಂತೆ ಮಾಡಿರುವುದು ಎಡ ಸರ್ಕಾರದ ಮಹತ್ವದ ಸಾಧನೆಯಿಂದಾದ ಪರಿಣಾಮ ಎಂದು ಟೀಕಿಸಿದರು. 

     ಕೊಲೆ, ದ್ವೇಶ, ವೈಷಮ್ಯಗಳನ್ನು ಹಬ್ಬಿಸುವಲ್ಲಿ ನಿರತವಾಗಿರುವ ಎಡರಂಗಕ್ಕೆ ತಕ್ಕಪಾಠವನ್ನು ರಾಜ್ಯದ ಜನರು ನೀಡುವರೆಂದು ಉಮ್ಮನ್ ಚಾಂಡಿ ನಿನ್ನೆಯ ಸಮಾರಂಭದಲ್ಲಿ ಎಚ್ಚರಿಕೆ ನೀಡಿದರು.