ʼಕ್ಲಬ್‌ ಹೌಸ್‌ʼ ನಲ್ಲಿ ತನ್ನ ಹೆಸರಿನ ಖಾತೆ ತೆರೆದು ಧ್ವನಿ ಅನುಕರಿಸಿ ಮಾತನಾಡಿದ ಯುವಕನಿಗೆ ನಟ ಪೃಥ್ವಿರಾಜ್‌ ಹಿತನುಡಿ

          ಕೊಚ್ಚಿ: ಇತ್ತೀಚೆಗೆ ನೂತನ ಸಾಮಾಜಿಕ ತಾಣವೊಂದು ಯುವಜನತೆಯ ನಡುವೆ ಸುದ್ದಿಯಾಗುತ್ತಿದೆ. ಕ್ಲಬ್‌ ಹೌಸ್‌ ಎಂಬ ಅಪ್ಲಿಕೇಶನ್‌ ಮೂಲಕ ಪರಸ್ಪರ ಚರ್ಚೆಗಳಲ್ಲಿ ಪಾಲ್ಗೊಳ್ಳುವುದು ಮತ್ತು ಸಮಾನ ಮನಸ್ಕರನ್ನು ಸೇರಿಸಿಕೊಂಡು ಕಾರ್ಯಕ್ರಮಗಳನ್ನು ನಡೆಸಲಾಗುತ್ತಿದೆ. ಈ ಅಪ್ಲಿಕೇಶನ್‌ ನಲ್ಲಿ ಕೇರಳದ ಪ್ರಖ್ಯಾತ ನಟ ಪೃಥ್ವಿರಾಜ್‌ ಹೆಸರಿನಲ್ಲಿ ನಕಲಿ ಖಾತೆ ಸೃಷ್ಟಿಸಿ, ಅವರದ್ದೇ ಧ್ವನಿಯನ್ನು ಅನುಕರಿಸಿ ಮಾತನಾಡಿದ್ದ ಯುವಕನಿಗೆ ಸಾಮಾಜಿಕ ತಾಣದಲ್ಲಿ ನಟ ಪೃಥ್ವಿರಾಜ್‌ ಸೌಮ್ಯ ಭಾಷೆಯಲ್ಲಿ ಪ್ರತಿಕ್ರಿಯೆ ನೀಡಿದ್ದಾರೆ.

        ತಮ್ಮ ಫೇಸ್‌ ಬುಕ್‌ ಮತ್ತು ಇತರ ಸಾಮಾಜಿಕ ತಾಣ ಖಾತೆಗಳಲ್ಲಿ ಬರೆದುಕೊಂಡಿರುವ ಅವರು, "ಆತ್ಮೀಯ ಸೂರಜ್, ಪರವಾಗಿಲ್ಲ. ಇದೆಲ್ಲವೂ ನಿರುಪದ್ರವ ತಮಾಷೆ ಎಂದು ನಾನು ಅರ್ಥಮಾಡಿಕೊಂಡಿದ್ದೇನೆ. ಆದರೆ ಈ ರೀತಿಯ ತಮಾಷೆಗಳು ಏನಾದರೂ ಗಂಭೀರ ಪರಿಣಾಮಗಳನ್ನು ಉಂಟುಮಾಡಬಹುದು ಎಂದು ನೀವು ಈಗ ಅರಿತುಕೊಂಡಿದ್ದೀರಿ ಎಂದು ನಾನು ಭಾವಿಸುತ್ತೇನೆ. ಒಂದು ಹಂತದಲ್ಲಿ, 2500 ಕ್ಕೂ ಹೆಚ್ಚು ಜನರು ನಿಮ್ಮ ಮಾತನ್ನು ಕೇಳುತ್ತಿದ್ದಾರೆ ಮತ್ತು ಅವರಲ್ಲಿ ಹೆಚ್ಚಿನವರು ನಾನು ಮಾತನಾಡುತ್ತಿದ್ದೇನೆ ಎಂದು ಭಾವಿಸಿದ್ದಾರೆಂದು ನಾನು ನಂಬುತ್ತೇನೆ. ಚಿತ್ರರಂಗದ ಮತ್ತು ಹೊರಗಿನ ಅನೇಕ ಜನರಿಂದ ನಾನು ಪದೇ ಪದೇ ಕರೆಗಳು ಮತ್ತು ಸಂದೇಶಗಳನ್ನು ಸ್ವೀಕರಿಸಿದ್ದೇನೆ. ಮತ್ತು ನಾನು ಆ ಕರೆಗಳನ್ನು ತಕ್ಷಣ ನಿಲ್ಲಿಸುವುದು ಅವಶ್ಯವಾಗಿದೆ. ಅದು ತಪ್ಪು ಎಂದು ನೀವು ಒಪ್ಪಿಕೊಂಡಿದ್ದಕ್ಕೆ ನನಗೆ ಸಂತೋಷವಾಗಿದೆ"

               "ಮಿಮಿಕ್ರಿ ಒಂದು ಅದ್ಭುತ ಕಲಾ ಪ್ರಕಾರವಾಗಿದೆ ಮತ್ತು ಮಲಯಾಳಂ ಸಿನೆಮಾದ ಸಾರ್ವಕಾಲಿಕ ಶ್ರೇಷ್ಠ ನಟರು ಮಿಮಿಕ್ರಿ ಪ್ರಪಂಚದಿಂದ ಚಿತ್ರರಂಗಕ್ಕೆ ಕಾಲಿಟ್ಟಿದ್ದಾರೆ ಎಂದು ನಿಮಗೆ ತಿಳಿದಿದೆ. ದೊಡ್ಡ ಕನಸುಗಳನ್ನು ಬೆಳೆಸಿ, ಕಷ್ಟಪಟ್ಟು ಕೆಲಸ ಮಾಡಿ ಮತ್ತು ಕಲಿಯುವುದನ್ನು ಎಂದಿಗೂ ನಿಲ್ಲಿಸಬೇಡಿ. ನೀವು ಭವಿಷ್ಯದಲ್ಲಿ ಸುಪ್ರಸಿದ್ಧ ವೃತ್ತಿ ಜೀವನವನ್ನು ಹೊಂದುತ್ತೀರಿ ಮತ್ತು ನಿಮಗೆ ಶುಭ ಹಾರೈಸುತ್ತೇನೆ."

ವಿಶೇಷ ಸೂಚನೆ: ನನ್ನ ಎಲ್ಲ ಹಿತೈಷಿಗಳಿಗೆ ಮತ್ತು ಇತರರಿಗೆ, ನಾನು ಆನ್‌ಲೈನ್ ನಿಂದನೆಯನ್ನು ಕ್ಷಮಿಸುವುದಿಲ್ಲ. ಆದ್ದರಿಂದ ದಯವಿಟ್ಟು ಅದನ್ನು ನಿಲ್ಲಿಸಿ. ಮತ್ತು ಮತ್ತೊಮ್ಮೆ ಹೇಳುತ್ತಿದ್ದೇನೆ..ನಾನು ಕ್ಲಬ್‌ಹೌಸ್‌ ನಲ್ಲಿಲ್ಲ. ಎಂದು ಪೃಥ್ವಿರಾಜ್‌ ಬರೆದುಕೊಂಡಿದ್ದಾರೆ.

ತಾನು ಮಾಡಿದ್ದು ಪ್ರಮಾದವಾಗಿದೆ ಎಂದು ಸೂರಜ್‌ ಎಂಬ ಯುವಕ ತಮ್ಮ ಸಾಮಾಜಿಕ ತಾಣದಲ್ಲಿ ಒಪ್ಪಿಕೊಂಡಿರುವ ಸ್ಕ್ರೀನ್‌ ಶಾಟ್‌ ಅನ್ನು ಅವರು ಪ್ರಕಟಿಸಿದ್ದಾರೆ. ಅವರ ಸೌಮ್ಯರೂಪದ ಮಾತುಗಳಿಗೆ ಹಲವಾರು ಬಳಕೆದಾರರು ಮತ್ತು ಪೃಥ್ವಿರಾಜ್‌ ಅಭಿಮಾನಿಗಳು ತಲೆದೂಗಿದ್ದಾರೆ.