ಮಕ್ಕಳಿಂದ ವೈರಸ್ ಪ್ರಸರಣ ಅಧಿಕ!​ ಅಧ್ಯಯನ ವರದಿಯಲ್ಲಿ ಆಘಾತಕಾರಿ ಅಂಶ ಬಯಲು

              ನವದೆಹಲಿ: ಕರೊನಾ ಸೋಂಕಿತ ಮಕ್ಕಳು ಭವಿಷ್ಯದಲ್ಲಿ ವೈರಸ್​ನ ಹೊಸ ಪ್ರಭೇದಗಳನ್ನು ಹರಡುವ ಸಾಧ್ಯತೆ ಹೆಚ್ಚಿದೆ. ಶಿಶುಗಳು, ಮಕ್ಕಳು ಮತ್ತು ಹದಿಹರೆಯದವರು ಸೋಂಕು ವಾಹಕರಾಗುವ ಸಂಭವವಿದೆ ಎಂದು ಹೊಸ ಅಧ್ಯಯನವೊಂದು ಹೇಳಿದೆ.

         ಮಕ್ಕಳ ಉಸಿರಾಟದಿಂದ ಹೊರಬರುವ ಕಣಗಳಲ್ಲಿ ಜೀವಂತ ಹಾಗೂ ರೂಪಾಂತರಿ ವೈರಾಣುಗಳು ಇರುವ ಸಾಧ್ಯತೆ ಇದೆ ಎಂದು 'ರ್ಜನಲ್​ ಆ​ ಇನ್​ೆಕ್ಷಸ್​ ಡಿಸೀಸಸ್​'ನಲ್ಲಿ ಪ್ರಕಟವಾದ ಅಧ್ಯಯನ ವರದಿ ಹೇಳಿದೆ. ಕರೊನಾ ಮಹಾಮಾರಿಯನ್ನು ಸೋಲಿಸುವ ಹೋರಾಟದಲ್ಲಿ ಮಕ್ಕಳು ಮಹತ್ವದ ಭಾಗ ಎಂದು ತಜ್ಞರು ಅಭಿಪ್ರಾಯ ಪಟ್ಟಿದ್ದಾರೆ. ಮಕ್ಕಳ ಸೋಂಕಿನ ಲಕ್ಷಣ ಸಹಿತ ಹಾಗೂ ಲಕ್ಷಣ ರಹಿತ ಈ ಎರಡೂ ವಿಭಾಗಗಳೂ ವೈರಸ್​ ವಾಹಕಗಳಾಗುವ ಸಾಧ್ಯತೆಯಿದೆ ಎಂದು ಅಧ್ಯಯನ ವರದಿ ಹೇಳಿದೆ. ಮೆಸಾಚುಯೆಟ್ಸ್​ ಜನರಲ್​ ಹಾಸ್ಪಿಟಲ್​ (ಎಂಜಿಎಚ್​), ಎಂಐಟಿ ಮತ್ತು ಹಾರ್ವರ್ಡ್​ನ ವಿಮೆನ್ಸ್​ ಹಾಸ್ಪಿಟಲ್​, ರೇಗನ್​ ಸಂಸ್ಥೆಗಳ ಸಂಶೋಧಕರು ಅಧ್ಯಯನ ನಡೆಸಿದ್ದರು.

         ಹೊಸ ಕೇಸ್​ ಇಳಿಕೆ: ಶುಕ್ರವಾರ ದೇಶದಲ್ಲಿ ಕರೊನಾ ಸೋಂಕಿನ 16,862 ಹೊಸ ಪ್ರಕರಣಗಳು ದೃಢಪಟ್ಟಿವೆ. ಇದು ಗುರುವಾರ ಪತ್ತೆಯಾದ 18,987 ಕೇಸ್​ಗಿಂತ ಶೇಕಡ 11 ಕಡಿಮೆಯಾಗಿದೆ. ಈ ಅವಧಿಯಲ್ಲಿ ಕನಿಷ್ಠ 19,391 ಜನರು ಗುಣಮುಖರಾಗಿದ್ದಾರೆ. ಇದುವರೆಗೆ ಒಟ್ಟು 3,33,82,100 ರೋಗಿಗಳು ಚೇತರಿಸಿಕೊಂಡಿದ್ದಾರೆ. ಶುಕ್ರವಾರದವರೆಗೆ 97.14 ಕೋಟಿ ಡೋಸ್​ ಲಸಿಕೆ ನೀಡಲಾಗಿದ್ದು, ಇನ್ನು ಎರಡು ದಿನದಲ್ಲಿ ನೂರು ಕೋಟಿ ಡೋಸ್​ ಗಡಿ ದಾಟುವ ಸಂಭವವಿದೆ.

              ಸಾಮುದಾಯಿಕ ಇಮ್ಯುನಿಟಿ ಸವಾಲು: ಕೋವಿಡ್​ ವೈರಸ್​ನ ಅಪಾಯ ಕಾರಿ ಪ್ರಭೇದವಾದ ಡೆಲ್ಟಾ ವಿರುದ್ಧ ಸಾಮುದಾಯಿಕ ರೋಗನಿರೋಧಕ ಶಕ್ತಿ (ಹರ್ಡ್​ ಇಮ್ಯುನಿಟಿ) ತುಂಬಾ ಕಡಿಮೆಯಿರುತ್ತದೆ ಎಂಬುದು ಸೋಂಕಿನ ಎರಡನೇ ಅಲೆ ವೇಳೆ ಕಂಡು ಬಂದಿದೆ. ಜೆನೊಮಿಕ್​ ಮತ್ತು ಸಾಂಕ್ರಾಮಿರೋಗದ ದತ್ತಾಂಶಗಳ ಮಾದರಿಯನ್ನು ಬಳಸಿ ವಿಜ್ಞಾನಿಗಳ ಅಂತಾರಾಷ್ಟ್ರೀಯ ತಂಡ ಈ ಅಧ್ಯಯನ ನಡೆಸಿತ್ತು. 'ಸೈನ್ಸ್​' ಪತ್ರಿಕೆಯಲ್ಲಿ ಈ ಕುರಿತ ವರದಿ ಪ್ರಕಟವಾಗಿದೆ.

                   3ನೇ ಅಲೆ ತೀವ್ರವಾಗಿರದು ಕರೊನಾ ಮೂರನೇ ಅಲೆ ಮೊದಲೆರಡು ಅಲೆಗಳಷ್ಟು ತೀವ್ರವಾಗಿರದು ಎಂದು ಸಾರ್ವಜನಿಕ ಆರೋಗ್ಯದ ತಜ್ಞರು ಹೇಳಿದ್ದಾರೆ. ಮುಂದಿನ ದಿನಗಳಲ್ಲಿ ಕೆಲವು ಪ್ರದೇಶಗಳಿಗೆ ಸೀಮಿತವಾಗಿ ಸೋಂಕು ಸ್ಫೋಟಗೊಳ್ಳಬಹುದು ಎಂದು ಭಾರತ ಸಾರ್ವಜನಿಕ ಆರೋಗ್ಯ ೌಂಡೇಷನ್​ (ಪಿಎಚ್​ಎ​ಐ) ಅಧ್ಯಕ್ಷ ಕೆ. ಶ್ರೀನಾಥ್​ ರೆಡ್ಡಿ ಹೇಳಿದ್ದಾರೆ.