ಯೂಕ್ರೇನ್​ನಲ್ಲಿ ಸಿಲುಕಿರುವ ಭಾರತೀಯರಿಗೆ ಭಾರತದ ಸಲಹೆಗಳಿವು; ಗೂಗಲ್​ ನೆರವು ಪಡೆಯಲೂ ಸೂಚನೆ

         ನವದೆಹಲಿ: ರಷ್ಯಾ-ಯೂಕ್ರೇನ್​ ಯುದ್ಧದಿಂದಾಗಿ ವಿಮಾನ ಸಂಚಾರ ಸ್ಥಗಿತಗೊಂಡಿದ್ದು, ಭಾರತದ ಹಲವರು ಯೂಕ್ರೇನ್​ನಲ್ಲಿ ಸಿಲುಕಿಕೊಂಡಿದ್ದಾರೆ. ಅವರನ್ನು ಸುರಕ್ಷಿತವಾಗಿ ದೇಶಕ್ಕೆ ಕರೆಸಿಕೊಳ್ಳುವ ನಿಟ್ಟಿನಲ್ಲಿ ಕೇಂದ್ರ ಸರ್ಕಾರ ಅಗತ್ಯ ಕ್ರಮಗಳನ್ನು ಕೈಗೊಳ್ಳುತ್ತಿದೆ.

          ಮತ್ತೊಂದೆಡೆ ಯೂಕ್ರೇನ್​ನಲ್ಲಿರುವ ಭಾರತೀಯ ರಾಯಭಾರ ಕಚೇರಿಯು ಭಾರತೀಯರಿಗೆ ಒಂದಷ್ಟು ಸಲಹೆಗಳನ್ನು ನೀಡಿದೆ. ಯೂಕ್ರೇನ್​ನಲ್ಲಿರುವ ಭಾರತೀಯ ಪ್ರಜೆಗಳು ತಮ್ಮ ಸುತ್ತಮುತ್ತಲ ವಾತಾವರಣದ ಕುರಿತು ಎಚ್ಚರಿಕೆಯಿಂದಿರಿ ಎಂಬ ಕಿವಿಮಾತಿನೊಂದಿಗೆ ಒಂದಷ್ಟು ಮಾರ್ಗದರ್ಶನವನ್ನೂ ಮಾಡಿದೆ.

          ಎಲ್ಲರೂ ಎಚ್ಚರಿಕೆಯಿಂದಿರಿ, ಅನಗತ್ಯವಾಗಿ ಮನೆಯಿಂದ ಹೊರಬರಬೇಡಿ, ಯಾವುದಕ್ಕೂ ನಿಮ್ಮೊಂದಿಗೆ ಎಲ್ಲ ದಾಖಲೆಗಳನ್ನು ಇಟ್ಟುಕೊಂಡಿರಿ. ಇನ್ನು ಕೆಲವು ಪ್ರದೇಶಗಳಲ್ಲಿ ಬಾಂಬ್​ ದಾಳಿ ಎಚ್ಚರಿಕೆ ಸಂದೇಶಗಳೂ ಇವೆ. ಹೀಗಾಗಿ ಗೂಗಲ್ ಮ್ಯಾಪ್​ ನೆರವಿನಿಂದ ಹತ್ತಿರದ ಬಾಂಬ್​ ಶೆಲ್ಟರ್​ಗಳ ಬಗ್ಗೆ ತಿಳಿದುಕೊಂಡಿರಿ ಎಂದೂ ಅದು ಸಲಹೆಯನ್ನು ರವಾನಿಸಿದೆ. ಗೂಗಲ್​ ಮ್ಯಾಪ್​ ಬಾಂಬ್​ ಶೆಲ್ಟರ್​ಗಳ ಮಾಹಿತಿ ನೀಡುತ್ತಿದ್ದು, ಅವುಗಳಲ್ಲಿ ಬಹುತೇಕವು ಅಂಡರ್​​​ಗ್ರೌಂಡ್​ ಮೆಟ್ರೋಗಳಲ್ಲಿವೆ ಎಂಬ ಮಾರ್ಗದರ್ಶನವನ್ನೂ ಮಾಡಿದೆ.

             ಭಾರತೀಯ ವಿದೇಶಾಂಗ ಸಚಿವಾಲಯದ ಮಾಹಿತಿ ಪ್ರಕಾರ 18 ಸಾವಿರ ಭಾರತೀಯರು ಯೂಕ್ರೇನ್​​ನಲ್ಲಿ ಸಿಲುಕಿಕೊಂಡಿದ್ದು, ಅವರೆಲ್ಲರನ್ನೂ ಸುರಕ್ಷಿತವಾಗಿ ಕರೆಸಿಕೊಳ್ಳುವ ಕುರಿತ ಪ್ರಯತ್ನ ಜಾರಿಯಲ್ಲಿ ಇರುವುದಾಗಿ ಅದು ಹೇಳಿಕೊಂಡಿದೆ.