ಬೂಸ್ಟರ್‌ ಡೋಸ್‌: ಸ್ಪಷ್ಟ ಮಾರ್ಗಸೂಚಿ ಹೊರಡಿಸಲು ಶಿವಸೇನಾ ಸಂಸದೆ ಒತ್ತಾಯ

           ನವದೆಹಲಿ: 60 ವರ್ಷದೊಳಗಿನವರಿಗೆ ಬೂಸ್ಟರ್‌ ಡೋಸ್‌ ನೀಡುವ ಬಗ್ಗೆ ಸ್ಪ‍ಷ್ಟ ಮಾರ್ಗಸೂಚಿ ಹೊರಡಿಸಬೇಕು ಎಂದು ಶಿವಸೇನಾ ರಾಜ್ಯಸಭಾ ಸದಸ್ಯೆ ಪ್ರಿಯಾಂಕಾ ಚತುರ್ವೇದಿ ಕೇಂದ್ರ ಸರ್ಕಾರವನ್ನು ಆಗ್ರಹಿಸಿದರು.

             ರಾಜ್ಯಸಭೆಯಲ್ಲಿ ಶೂನ್ಯವೇಳೆಯಲ್ಲಿ ಮಾತನಾಡಿದ ಅವರು, ಲಸಿಕೆ ವಿಚಾರದಲ್ಲಿ ನಾನಾ ದೇಶಗಳು ವಿದೇಶಿ ಪ್ರಯಾಣಿಕರ ಮೇಲೆ ಕಟ್ಟುನಿಟ್ಟಿನ ಷರತ್ತುಗಳನ್ನು ವಿಧಿಸುತ್ತಿವೆ.

             ನಿಗದಿತ ಅವಧಿಯೊಳಗೆ ಎರಡನೇ ಡೋಸ್‌ ಪಡೆದಿರಬೇಕೆಂದು ಹಲವು ದೇಶಗಳು ಬಯಸುತ್ತಿವೆ. ಸಮಯ ಮೀರಿ ಲಸಿಕೆ ಪಡೆದ ಪ್ರಮಾಣ ಪತ್ರಗಳನ್ನು ಪರಿಗಣಿಸುತ್ತಿಲ್ಲ. 270 ದಿನಗಳ ಅಂತರದಲ್ಲಿ ಲಸಿಕೆ ಪಡೆದಿದ್ದರೆ ಮಾತ್ರ ಯುರೋಪ್‌ ರಾಷ್ಟ್ರಗಳು ಪ್ರಮಾಣ ಪತ್ರವನ್ನು ಮಾನ್ಯ ಮಾಡುತ್ತಿವೆ. ಹೀಗಾಗಿಯೇ ವಿದೇಶ ಪ್ರಯಾಣಕ್ಕೆ ಸಿದ್ಧರಾಗಿರುವ ಜನರು ಮೂರನೇ ಡೋಸ್ ಬಗ್ಗೆ ಸ್ಪಷ್ಟ ಮಾರ್ಗಸೂಚಿ ಇಲ್ಲದೆ ಗೊಂದಲಕ್ಕೆ ಸಿಲುಕಿದ್ದಾರೆ ಎಂದರು.

           ಪ್ರಯಾಣಿಕರ ಹಿತದೃಷ್ಟಿಯಿಂದ 60 ವರ್ಷದೊಳಗಿನವರಿಗೆ 3ನೇ ಡೋಸ್‌ ಪಡೆಯುವುದರ ಬಗ್ಗೆ ಸ್ಪಷ್ಟ ಮಾರ್ಗಸೂಚಿ ಹೊರಡಿಸಬೇಕೆಂದು ಆರೋಗ್ಯ ಸಚಿವರನ್ನು ಪ್ರಿಯಾಂಕ ಚತುರ್ವೇದಿ ಒತ್ತಾಯಿಸಿದರು.‌