ಮುಂಬೈ: ಮಂಗಳವಾರ ರೂಪಾಯಿ ಮೌಲ್ಯದಲ್ಲಿ 38 ಪೈಸೆ ಇಳಿಕೆಯಾಗಿದ್ದು, ಅಮೆರಿಕದ ಪ್ರತಿ ಡಾಲರ್ಗೆ 79.33 ರೂಪಾಯಿಗೆ ವಿನಿಮಯವಾಗಿದೆ. ಈ ಮೂಲಕ ಸಾರ್ವಕಾಲಿಕ ಪತನ ಕಂಡಿದೆ. ಕರೆನ್ಸಿ ವಿನಿಮಯ ಮಾರುಕಟ್ಟೆಯಲ್ಲಿ ಡಾಲರ್ ಬಲಿಷ್ಠವಾಗಿರುವುದು ಹಾಗೂ ವಿದೇಶಿ ಬಂಡವಾಳದ ನಿರಂತರ ಹೊರಹರಿವಿನ ಪರಿಣಾಮವಾಗಿ ರೂಪಾಯಿ ಮೌಲ್ಯ ಕುಸಿಯುತ್ತಿದೆ.
11 ವರ್ಷಗಳಲ್ಲೇ ಅಧಿಕ: ಭಾರತದಲ್ಲಿ ಜೂನ್ ತಿಂಗಳ ಸೇವೆಗಳಲ್ಲಿನ ಬೆಳವಣಿಗೆ ಕಳೆದ 11 ವರ್ಷಗಳಲ್ಲೇ ಅಧಿಕವಾಗಿದೆ. ಎಸ್ ಆಂಡ್ ಪಿ ಗ್ಲೋಬಲ್ ಇಂಡಿಯಾ ಸರ್ವಿಸಸ್ ಪರ್ಚೇಸಿಂಗ್ ಮ್ಯಾನೇಜರ್ಸ್ ಇಂಡೆಕ್ಸ್ ಮೇ ತಿಂಗಳಲ್ಲಿ 58.9 ಇದ್ದದ್ದು ಜೂನ್ನಲ್ಲಿ 59.2 ಆಗಿದೆ. ಜೂನ್ನಲ್ಲಿ ನಿರುದ್ಯೋಗ ಪ್ರಮಾಣ ಶೇ. 7.8 %ಕ್ಕೆ ಏರಿಕೆ ಆಗಿದೆ ಎಂದು ವರದಿಯೊಂದು ತಿಳಿಸಿದೆ.
ಪ್ರಯಾಣಿಕ ವಾಹನ ಮಾರಾಟ ವೃದ್ಧಿ: ಭಾರತದಲ್ಲಿ ಜೂನ್ ಮಾಹೆಯಲ್ಲಿ ಪ್ರಯಾಣಿಕ ವಾಹನಗಳ ಚಿಲ್ಲರೆ ಮಾರಾಟದಲ್ಲಿ ಶೇಕಡ 40 ಏರಿಕೆ ದಾಖಲಾಗಿದೆ ಎಂದು ಭಾರತೀಯ ಆಟೊಮೊಬೈಲ್ ವರ್ತಕರ ಸಂಘ (ಎಫ್ಎಡಿಎ) ತಿಳಿಸಿದೆ. ಸೆಮಿಕಂಡಕ್ಟರ್ಗಳ ಸರಬರಾಜಿನಲ್ಲಿ ಸುಧಾರಣೆ ಆಗಿರುವುದನ್ನು ಇದು ಸೂಚಿಸುತ್ತದೆ ಎಂದು ಎಫ್ಎಡಿಎ ಅಭಿಪ್ರಾಯ ಪಟ್ಟಿದೆ. ಜೂನ್ ಅಂತ್ಯದ ವರೆಗೆ 2,60,683 ಪ್ರಯಾಣಿಕ ವಾಹನಗಳ ನೋಂದಣಿ ಆಗಿದೆ. 2021ರ ಜೂನ್ನಲ್ಲಿ ಈ ಸಂಖ್ಯೆ 1,85,998 ಆಗಿತ್ತು. ಒಟ್ಟಾರೆಯಾಗಿ ಶೇಕಡ 40 ಹೆಚ್ಚಳವಾಗಿದೆ ಎಂದು ವಾಹನೋದ್ಯಮ ಪ್ರಮುಖರು ತಿಳಿಸಿದ್ದಾರೆ.
ಚಿನ್ನ 65 ರೂಪಾಯಿ ಏರಿಕೆ: ದೆಹಲಿ ಚಿನಿವಾರ ಪೇಟೆಯಲ್ಲಿ ಮಂಗಳವಾರ ಚಿನ್ನದ ಬೆಲೆಯಲ್ಲಿ 65 ರೂಪಾಯಿ ಏರಿಕೆಯಾಗಿ 10 ಗ್ರಾಂಗೆ 52,050 ರೂಪಾಯಿ ಆಗಿತ್ತು.ಬೆಳ್ಳಿ ಬೆಲೆಯಲ್ಲಿ 307 ರೂಪಾಯಿ ಏರಿಕೆಯಾಗಿ ಒಂದು ಕೆಜಿ ಬೆಳ್ಳಿ ದರ 58,358 ರೂಪಾಯಿಗೆ ಹಿಗ್ಗಿದೆ.
ಸೆನ್ಸೆಕ್ಸ್ನಲ್ಲಿ 100 ಅಂಕ ಕುಸಿತ: ಬಾಂಬೆ ಷೇರು ಮಾರುಕಟ್ಟೆಯಲ್ಲಿ 30 ಷೇರುಗಳ ಬಿಎಸ್ಇ ಸೂಚ್ಯಂಕ 100.42 ಅಂಶದಷ್ಟು (ಶೇಕಡ 0.19) ಇಳಿಕೆಯಾಗಿ 53,134.35 ಪಾಯಿಂಟ್ನಲ್ಲಿ ಕೊನೆಗೊಂಡಿದೆ.ಮಂಧ್ಯತರ ವಹಿವಾಟಿನಲ್ಲಿ 631.16 ಅಂಶ (ಶೇ. 1.18) ಜಿಗಿತ ಕಂಡು 53,865.93 ಅಂಕಕ್ಕೆ ತಲುಪಿತ್ತು. ನಿಫ್ಟಿ ಕೂಡ ದಿನದ ಅವಧಿಯಲ್ಲಿ ಲಾಭಗಳಿಸಿ ಅಂತಿಮವಾಗಿ 24.50 ಅಂಶ (ಶೇ. 0.15) ಕುಸಿದು 15,810.85 ಆಗಿತ್ತು. ವಿಪ್ರೊ, ಆಕ್ಸಿಸ್ ಬ್ಯಾಂಕ್, ಮಹೀಂದ್ರಾ ಆಂಡ್ ಮಹೀಂದ್ರಾ, ಲಾರ್ಸನ್ ಆಂಡ್ ಟೂಬ್ರೊ, ಮಾರುತಿ ಸುಜುಕಿ, ಇಂಡಸ್ಇಂಡ್ ಬ್ಯಾಂಕ್ ಮತ್ತು ಏಷ್ಯನ್ ಪೇಂಟ್ಸ್ ನಷ್ಟ ಅನುಭವಿಸಿವೆ. ಪವರ್ ಗ್ರಿಡ್, ಬಜಾಜ್ ಫಿನ್ಸರ್ವ್, ಹಿಂದುಸ್ತಾನ್ ಯುನಿಲಿವರ್, ಸನ್ ಫಾರ್ವ, ರಿಲಯನ್ಸ್ ಇಂಡಸ್ಟ್ರೀಸ್, ಟಾಟಾ ಸ್ಟೀಲ್ ಮೊದಲಾದವು ಲಾಭ ಗಳಿಸಿದವು.