ದುಬಾರಿಯ ಎಕೋಕಾರ್ಡಿಯೋಗ್ರಫಿ ಬೇಕಿಲ್ಲ; ಹೃದಯ ದೋಷಗಳನ್ನು ಸ್ಟೆತೊಸ್ಕೋಪ್ ಮೂಲಕ ಪತ್ತೆ ಮಾಡಬಹುದು: ವಿಮರ್ಶಾತ್ಮಕ ಅಧ್ಯಯನ ನಡೆಸಿದ ಕೊಚ್ಚಿಯ ಅಮೃತಾ ಆಸ್ಪತ್ರೆ

             ಕೊಚ್ಚಿ: ಸ್ಟೆತಸ್ಕೋಪ್ ಮೂಲಕ ಹೃದಯ ಬಡಿತಗಳನ್ನು ನಿಖರವಾಗಿ ಆಲಿಸಿ ಆ ಮೂಲಕ ಹೃದಯದ ನ್ಯೂನತೆಗಳನ್ನು ಗುರುತಿಸಬಹುದು ಎಂದು ಕೊಚ್ಚಿಯ ಅಮೃತಾ ಆಸ್ಪತ್ರೆ ನಡೆಸಿದ ಅಧ್ಯಯನವೊಂದು ಪತ್ತೆಹಚ್ಚಿದೆ.
            ಶಂಕಿತ ಜನ್ಮಜಾತ ಹೃದಯ ದೋಷಗಳನ್ನು ಹೊಂದಿರುವ 545 ಮಕ್ಕಳ ಅಧ್ಯಯನವನ್ನು ಬಿಎಂಜೆ ಪೀಡಿಯಾಟ್ರಿಕ್ಸ್ ಓಪನ್‍ನಲ್ಲಿ ಪ್ರಕಟಿಸಲಾಗಿದೆ. ಈ ಅಧ್ಯಯನವು ಮಕ್ಕಳಲ್ಲಿ ಹೃದಯ ವ್ಯವಸ್ಥೆಯ ದೈಹಿಕ ಪರೀಕ್ಷೆಯ ಮೂಲಕ ರೋಗನಿರ್ಣಯದ ನಿಖರತೆಯನ್ನು ವ್ಯವಸ್ಥಿತವಾಗಿ ಪರೀಕ್ಷಿಸುವ ಗುರಿಯನ್ನು ಹೊಂದಿದೆ ಮತ್ತು ಪ್ರಸ್ತುತ ಅತ್ಯಾಧುನಿಕ ಎಕೋಕಾರ್ಡಿಯೋಗ್ರಫಿಯೊಂದಿಗೆ ಹೋಲಿಸುತ್ತದೆ.
          ಹೃದ್ರೋಗ ಚಿಕಿತ್ಸಾ ಕ್ಷೇತ್ರದಲ್ಲಿ ಎಕೋಕಾರ್ಡಿಯೋಗ್ರಫಿ ರೂಪದಲ್ಲಿ ಅಲ್ಟ್ರಾಸೌಂಡ್ ತಂತ್ರಜ್ಞಾನ ಲಭ್ಯವಾಗಿರುವುದರಿಂದ ಸ್ಟೆತಸ್ಕೋಪ್ ಬಳಸಿ ರೋಗಿಯ ದೈಹಿಕ ಪರೀಕ್ಷೆ ಅನಗತ್ಯವಾಗುತ್ತಿದೆ ಎಂಬ ತಿಳುವಳಿಕೆ ಮೂಡಿದೆ ಎಂದು ಡಾ. ಆರ್ ಕೃಷ್ಣಕುಮಾರ್ ಹೇಳಿದರು. ಪಾಶ್ಚಿಮಾತ್ಯ ದೇಶಗಳಲ್ಲಿ ವೈದ್ಯರು ಸ್ಟೆತಸ್ಕೋಪ್ ಬಳಸುವುದನ್ನು ಸಂಪೂರ್ಣವಾಗಿ ನಿಲ್ಲಿಸುವ ಹಂತಕ್ಕೆ ಬಂದಿದ್ದಾರೆ. ಆದರೆ ಭಾರತದಲ್ಲಿ, ಇನ್ನೂ ಅನೇಕ ವೈದ್ಯರು ಸ್ಟೆತೊಸ್ಕೋಪ್‍ಗಳನ್ನು ಬಳಸುತ್ತಾರೆ ಮತ್ತು ನಿಖರವಾದ ರೋಗನಿರ್ಣಯವನ್ನು ಮಾಡುತ್ತಾರೆ. ಗಂಭೀರ ಹೃದ್ರೋಗವಿದ್ದರೆ ಮಾತ್ರ ಅವರು ಎಕೋಕಾರ್ಡಿಯೋಗ್ರಫಿಯಂತಹ ವಿಷಯಗಳನ್ನು ಶಿಫಾರಸು ಮಾಡುತ್ತಾರೆ. ಸ್ಟೆತಸ್ಕೋಪ್ ಬಳಸಿ ರೋಗಿಯನ್ನು ಪರೀಕ್ಷಿಸುವುದು ಮತ್ತು ನಿಖರತೆಯನ್ನು ಮೌಲ್ಯೀಕರಿಸಲು ಎಕೋಕಾರ್ಡಿಯೋಗ್ರಫಿಯೊಂದಿಗೆ ಫಲಿತಾಂಶಗಳನ್ನು ಹೋಲಿಸುವುದು ಈ ಅಧ್ಯಯನದ ಉದ್ದೇಶವಾಗಿದೆ ಎಂದು ಅವರು ವಿವರಿಸಿದರು.          ರೋಗಿಯ ಇತಿಹಾಸ ಮತ್ತು ದೈಹಿಕ ಪರೀಕ್ಷೆಯು ನಿಖರವಾದ ರೋಗನಿರ್ಣಯವನ್ನು ಮಾಡಲು ವೈದ್ಯರು ಅವಲಂಬಿಸಿರುವ ಸಾಂಪ್ರದಾಯಿಕ ವಿಧಾನಗಳಾಗಿವೆ. ಆದರೆ ಎಕೋಕಾರ್ಡಿಯೋಗ್ರಫಿಯ ಆಗಮನದೊಂದಿಗೆ, ಇತ್ತೀಚಿನ ವರ್ಷಗಳಲ್ಲಿ ಹೃದ್ರೋಗ ರೋಗಿಗಳಲ್ಲಿ ದೈಹಿಕ ಪರೀಕ್ಷೆಯ ಪ್ರಾಮುಖ್ಯತೆಯು ಕಡಿಮೆಯಾಗುತ್ತಿದೆ. ಆದರೆ ನಮ್ಮ ಅಧ್ಯಯನವು ಹೊರರೋಗಿ ಚಿಕಿತ್ಸಾಲಯಗಳಲ್ಲಿ ರೋಗಿಗಳನ್ನು ಪರೀಕ್ಷಿಸಲು ದಿನನಿತ್ಯದ ಸ್ಟೆತಸ್ಕೋಪ್ ಬಳಕೆಯು ಪರಿಣಾಮಕಾರಿ ಮಾರ್ಗವಾಗಿದೆ ಎಂದು ಕಂಡುಹಿಡಿದಿದೆ ಎಂದು ಕೃಷ್ಣಕುಮಾರ್ ಪ್ರತಿಕ್ರಿಯಿಸಿದರು.
            ಮಕ್ಕಳಲ್ಲಿ ಹೃದ್ರೋಗವನ್ನು ಪತ್ತೆಹಚ್ಚಲು ಸ್ಟೆತಸ್ಕೋಪ್ ಬಳಸಿ ದೈಹಿಕ ಪರೀಕ್ಷೆಗಳು ಬಹಳ ಪರಿಣಾಮಕಾರಿ. ನಮ್ಮ ಅಧ್ಯಯನದಲ್ಲಿ, ಇದು ಸಾಮಾನ್ಯ ಹೃದಯಗಳು ಮತ್ತು ಅಸಹಜವಾಗಿ ಕಾರ್ಯನಿರ್ವಹಿಸುವ ಹೃದಯಗಳನ್ನು 95 ಪ್ರತಿಶತದಷ್ಟು ನಿಖರತೆಯೊಂದಿಗೆ ಪ್ರತ್ಯೇಕಿಸುತ್ತದೆ ಎಂದು ನಾವು ಕಂಡುಕೊಂಡಿದ್ದೇವೆ. ಸ್ಟೆತೊಸ್ಕೋಪ್ನ ಸರಿಯಾದ ಬಳಕೆಯು ಎಕೋಕಾರ್ಡಿಯೋಗ್ರಫಿಯಂತಹ ದುಬಾರಿ ಪರೀಕ್ಷೆಗಳ ಅನಗತ್ಯ ಬಳಕೆಯನ್ನು ತಪ್ಪಿಸಬಹುದು ಮತ್ತು ಆರೋಗ್ಯ-ಸಂಬಂಧಿತ ವೆಚ್ಚಗಳನ್ನು ಗಣನೀಯವಾಗಿ ಕಡಿಮೆ ಮಾಡಬಹುದು. ಭಾರತದಂತಹ ದೇಶದಲ್ಲಿ ಆರೋಗ್ಯ ಕ್ಷೇತ್ರದಲ್ಲಿ ಇಂತಹ ಸಂಶೋಧನೆಗೆ ಹೆಚ್ಚಿನ ಪ್ರಾಮುಖ್ಯತೆ ಇದೆ ಎಂದವರು ತಿಳಿಸಿರುವರು.
           ಮಕ್ಕಳಲ್ಲಿ ಸಾಮಾನ್ಯವಾಗಿ ಕಂಡುಬರುವ ಜನ್ಮಜಾತ ಹೃದಯದ ತೊಂದರೆಗಳಿಗೆ ಆರಂಭಿಕ ಸ್ಕ್ರೀನಿಂಗ್ ತುಂಬಾ ಪ್ರಯೋಜನಕಾರಿ ಎಂದು ಈ ಅಧ್ಯಯನವು ಒತ್ತಿಹೇಳುತ್ತದೆ. ಹೊರರೋಗಿ ಸೆಟ್ಟಿಂಗ್‍ಗಳಲ್ಲಿ ಸ್ಟೆತೊಸ್ಕೋಪ್ ಅತ್ಯಂತ ವಿಶ್ವಾಸಾರ್ಹವಾಗಿದೆ ಎಂದು ಇದು ಸಾಬೀತುಪಡಿಸಿದೆ. ಇದೇ ವೇಳೆ, ಶಂಕಿತ ಹೃದ್ರೋಗ ಹೊಂದಿರುವ ನವಜಾತ ಶಿಶುಗಳಲ್ಲಿ ಹೃದಯ ಪರೀಕ್ಷೆ ಮತ್ತು ಸ್ಟೆತೊಸ್ಕೋಪ್ ಬಳಕೆಯಲ್ಲಿ ವೈದ್ಯರು ಸಮರ್ಪಕವಾಗಿ ತರಬೇತಿ ಪಡೆದಿರದ ಒಳರೋಗಿಗಳ ವ್ಯವಸ್ಥೆಯಲ್ಲಿ ಅವು ಅನ್ವಯಿಸುವುದಿಲ್ಲ ಎಂದೂ ಡಾ. ಆರ್. ಕೃಷ್ಣಕುಮಾರ್ ಗಮನ ಸೆಳೆದಿರುವರು. ಪ್ರಸ್ತುತ ಸ್ಟೆತೊಸ್ಕೋಪ್ ಗೆ ಅಚಿತಿಮ ಮೊಳೆಹೊಡೆಯುವ ಕಾಲ ಇನ್ನೂ ಸನ್ನಿಹಿತವಾಗಿಲ್ಲ ಎಂದು ಅಧ್ಯಯನ ತಂಡದಲ್ಲಿದ್ದ ಮಕ್ಕಳ ವಿಭಾಗದ ಪ್ರಾಧ್ಯಾಪಕ ಡಾ. ಮನುರಾಜ್ ಕೂಡ ಹೇಳಿರುವರು.