ಯುವಕ ತನ್ನ ಸಂಬಂಧಿ ಮಹಿಳೆ ಜತೆ ಕುಳಿತು ಪ್ರಯಾಣಿಸಿದ್ರೂ ಸಹಿಸದ ಕಂಡಕ್ಟರ್​! ಬಸ್​ನಲ್ಲೇ ಹೈಡ್ರಾಮ

               ಕೊಚ್ಚಿ: ಬಸ್​ ಪ್ರಯಾಣದ ವೇಳೆ ಯುವ ಪ್ರಯಾಣಿಕನೊಬ್ಬನ ಮೇಲೆ ಹಲ್ಲೆ ಮಾಡಿ, ಅಶ್ಲೀಲ ಪದಗಳಿಂದ ನಿಂದಿಸಿದ ವೆಲ್ಲರಾಡ ಡಿಪೋವಿನ ಕೆಎಸ್​ಆರ್​ಟಿಸಿ ಬಸ್​ ಕಂಡಕ್ಟರ್​ನನ್ನು ಕೇರಳ ಪೊಲೀಸರು ಬಂಧಿಸಿದ್ದಾರೆ.

             ಬಂಧಿತ ಕಂಡಕ್ಟರ್​ನನ್ನು ಸುರೇಶ್​ ಕುಮಾರ್​ (42) ಎಂದು ಗುರುತಿಸಲಾಗಿದೆ.

ಬಲರಾಮಪುರ ಮೂಲದ ಸಂತ್ರಸ್ತ ಪ್ರಯಾಣಿಕ ಹೃತಿಕ್​ ಕೃಷ್ಣ (23) ತಿರುವನಂತಪುರದಿಂದ ವೆಲ್ಲರಾಡಗೆ ತೆರಳುತ್ತಿದ್ದ. ಆತನ ಜತೆ ಮಹಿಳಾ ಸಂಬಂಧಿಕರೊಬ್ಬರು ಇದ್ದರು. ಇಬ್ಬರು ಜತೆಯಲ್ಲೇ ಕುಳಿತು ಪ್ರಯಾಣ ಮಾಡುತ್ತಿದ್ದರು. ಇದು ಕಂಡಕ್ಟರ್​ಗೆ ಇಷ್ಟವಾಗಲಿಲ್ಲ. ಹೀಗಾಗಿ ಮಹಿಳೆಯಿಂದ ದೂರ ಕುಳಿತುಕೊಳ್ಳುವಂತೆ ಯುವಕನಿಗೆ ಒತ್ತಾಯಿಸಿದರು. ಆದರೆ, ಯುವಕ ಒಪ್ಪಲಿಲ್ಲ.

                ಬಸ್​ ಕಟ್ಟಕ್ಕಾಡ ಡಿಪೋಗೆ ತಲುಪುತ್ತಿದ್ದಂತೆ ಮತ್ತೆ ಯುವಕನ ಬಳಿ ಬಂದ ಕಂಡಕ್ಟರ್ ಅಶ್ಲೀಲ ಪದಗಳಿಂದ ನಿಂದಿಸಲು ಶುರು ಮಾಡುತ್ತಾರೆ. ಈ ವೇಳೆ ಇಬ್ಬರ ನಡುವೆ ಮಾತಿನ ಚಕಮಕಿ ಉಂಟಾಗುತ್ತದೆ. ಇಬ್ಬರ ನಡುವಿನ ವಾಗ್ವಾದ ವಿಕೋಪಕ್ಕೆ ತಿರುಗಿದಾಗ ಉದ್ರಿಕ್ತ ಕಂಡಕ್ಟರ್​ ಟಿಕೆಟ್​ ಮೆಶಿನ್​ನಿಂದಲೇ​ ಯುವಕನ ಮೇಲೆ ಹಲ್ಲೆ ಮಾಡುತ್ತಾನೆ. ಅಲ್ಲದೆ, ಆತನನ್ನು ದೂರ ನೂಕುತ್ತಾನೆ.​

ಇದಾದ ಬಳಿಕ ಕಂಡಕ್ಟರ್​ ಪೊಲೀಸರನ್ನು ಕರೆಸಿ ತನ್ನ ಮೇಲೆ ಯುವಕ ಹಲ್ಲೇ ಮಾಡಲು ಯತ್ನಿಸಿದ ಎಂದು ಸುಳ್ಳು ದೂರು ನೀಡಲು ಯತ್ನಿಸುತ್ತಾನೆ. ಆದರೆ, ಬಸ್​ನಲ್ಲಿದ್ದ ಇತರೆ ಪ್ರಯಾಣಿಕರು ಕಂಡಕ್ಟರ್​ ವರ್ತನೆಯನ್ನು ವಿವರಿಸುತ್ತಾರೆ. ಬಳಿಕ ಕಂಡಕ್ಟರ್​ನನ್ನೇ ಪೊಲೀಸರು ಬಂಧಿಸುತ್ತಾರೆ. ಈ ಘಟನೆಯನ್ನು ಸಹ ಪ್ರಯಾಣಿಕರೊಬ್ಬರು ಮೊಬೈಲ್​ನಲ್ಲಿ ಚಿತ್ರೀಕರಿಸಿದ್ದು ಸಾಮಾಜಿಕ ಜಾಲತಾಣದಲ್ಲಿ ವಿಡಿಯೋ ವೈರಲ್​ ಆಗಿದೆ. ಜಾಲತಾಲದಲ್ಲೂ ಕಂಡಕ್ಟರ್​ ವಿರುದ್ಧ ಆಕ್ರೋಶ ವ್ಯಕ್ತವಾಗಿದೆ.

                   ಗಾಯಗೊಂಡಿದ್ದ ಯುವಕನ್ನು ಸ್ಥಳೀಯರು ಕಟ್ಟಕ್ಕಾಡ ಸಾರ್ವಜನಿಕ ಆಸ್ಪತ್ರೆಗೆ ದಾಖಲಿಸಿ ಚಿಕಿತ್ಸೆ ಕೊಡಿಸಿದ್ದಾರೆ. ಅಲ್ಲದೆ, ಕಂಡಕ್ಟರ್​ ವಿರುದ್ಧವೂ ದೂರು ನೀಡಿದ್ದಾರೆ. ಪೊಲೀಸರು ಹೃತಿಕ್​ ಹೇಳಿಕೆಯನ್ನು ಪಡೆದು ಕಂಡಕ್ಟರ್​ ವಿರುದ್ಧ ಪ್ರಕರಣ ದಾಖಲಿಸಿದರು. ಆದರೆ, ಅದೇ ದಿನ ಜಾಮೀನಿನ ಮೇಲೆ ಕಂಡಕ್ಟರ್​ನನ್ನು ಬಿಟ್ಟು ಕಳುಹಿಸಲಾಗಿದೆ.

                ಸುರೇಶ್ ಕುಮಾರ್ ಅವರು ಪ್ರಯಾಣಿಕರೊಂದಿಗೆ ಅನುಚಿತವಾಗಿ ವರ್ತಿಸಿದ ಇತಿಹಾಸವನ್ನು ಕೆಎಸ್‌ಆರ್‌ಟಿಸಿ ಅಧಿಕಾರಿಗಳು ಬಹಿರಂಗಪಡಿಸಿದ್ದು, ಅವರ ವಿರುದ್ಧ ಈ ಹಿಂದೆಯೂ ಕ್ರಮ ಕೈಗೊಳ್ಳಲಾಗಿತ್ತು ಎಂದು ತಿಳಿಸಿದ್ದಾರೆ.