ಮಣಿಪುರ: 27 ಎಫ್‌ಐಆರ್‌ಗಳ ತನಿಖೆ ಆರಂಭಿಸಿದ ಸಿಬಿಐ

             ನವದೆಹಲಿ (PTI): ಕಳೆದ ನಾಲ್ಕು ತಿಂಗಳಿಂದ ಮಣಿಪುರದಲ್ಲಿ ನಡೆಯುತ್ತಿರುವ ಸಂಘರ್ಷಕ್ಕೆ ಸಂಬಂಧಿಸಿದಂತೆ ದಾಖಲಾದ 27 ಎಫ್‌ಐಆರ್‌ಗಳ ಕುರಿತು ಸಿಬಿಐ ತನಿಖೆ ಆರಂಭಿಸಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

                ಸಿಬಿಐ ವಿಚಾರಣೆಗೆ ಕೈಗೆತ್ತಿಕೊಂಡಿರುವ ಒಟ್ಟು ಪ್ರಕರಣಗಳ ಪೈಕಿ 19 ಪ್ರಕರಣಗಳು ಮಹಿಳೆಯರ ವಿರುದ್ಧದ ಪ್ರಕರಣಗಳು.

               ಉಳಿದಂತೆ ಸಶಸ್ತ್ರ ಲೂಟಿ ಮತ್ತು ಕೊಲೆಗೆ ಸಂಬಂಧಿಸಿದ ತಲಾ ಎರಡು ಪ್ರಕರಣಗಳು ಹಾಗೂ ಗಲಭೆ, ಕೊಲೆ, ಅಪಹರಣ ಮತ್ತು ಪಿತೂರಿಗೆ ಸಂಬಂಧಿಸಿದ ತಲಾ ಒಂದೊಂದು ಪ್ರಕರಣಗಳಿವೆ.

ಸಂಘರ್ಷಪೀಡಿತ ಸ್ಥಳಗಳಿಗೆ ಭೇಟಿ ನೀಡಿದ ಸಿಬಿಐ ತಂಡ, ಶಂಕಿತರು ಮತ್ತು ಸಂತ್ರಸ್ತರ ವಿಚಾರಣೆ ಆರಂಭಿಸಿದೆ. ‌

                 ಮಣಿಪುರದಲ್ಲಿ ದಾಖಲಾದ ಪ್ರಕರಣಗಳ ತನಿಖೆಗಾಗಿ ಸಿಬಿಐ 29 ಮಹಿಳಾ ಅಧಿಕಾರಿಗಳನ್ನು ಒಳಗೊಂಡ 53 ಜನರ ತಂಡವನ್ನು ರಚನೆ ಮಾಡಿದೆ.

                   ಮೈತೇಯಿ ಮತ್ತು ಕುಕಿ ಸಮುದಾಯಗಳ ಮಧ್ಯೆ ಮೇ 3ರಿಂದ ಸಂಘರ್ಷ ಆರಂಭವಾದಾಗಿನಿಂದ 160ಕ್ಕೂ ಹೆಚ್ಚು ಮಂದಿ ಮೃತಪಟ್ಟಿದ್ದಾರೆ. ನೂರಾರು ಜನರು ಗಾಯಗೊಂಡಿದ್ದಾರೆ.