ಉಗ್ರರ ನಂಟು ಶಂಕೆ: ಜಮ್ಮುವಿನಲ್ಲಿ ವಿಶೇಷ ತನಿಖಾ ಸಂಸ್ಥೆಯಿಂದ ದಾಳಿ

                ಜಮ್ಮು: ಜಮ್ಮುವಿನ ಹೊರವಲಯದಲ್ಲಿರುವ ಈ ಹಿಂದೆ ಭಯೋತ್ಪಾದಕರ ಸಹಚರನಾಗಿದ್ದವನ ಮನೆಯ ಮೇಲೆ ವಿಶೇಷ ತನಿಖಾ ಸಂಸ್ಥೆ (SIA) ಮಂಗಳವಾರ ದಾಳಿ ನಡೆಸಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.‌

             ಜಮ್ಮು ಮತ್ತು ಕಾಶ್ಮೀರ ಪೊಲೀಸ್‌ನ ಗಲಭೆ ಪ್ರತಿರೋಧ ವಿಭಾಗವು ಸುಂಜ್ವನ್‌ನ ಪೀರ್‌ ಭಾಗ್‌ ಪ್ರದೇಶದಲ್ಲಿರುವ ಮೊಹಮ್ಮದ್‌ ಇಕ್ಬಾಲ್‌ ಎಂಬವನ ಮನೆ ಮೇಲೆ ಮಂಗಳವಾರ ಮುಂಜಾನೆ ದಾಳಿ ನಡೆಸಿದೆ.

             ಪರಿಶೀಲನೆ ವೇಳೆ ಒಂದು ಮೊಬೈಲ್ ಹಾಗೂ ಎರಡು ಸಿಮ್‌ ಕಾರ್ಡ್‌ಗಳನ್ನು ವಶಪಡಿಸಿಕೊಳ್ಳಲಾಗಿದೆ ಎಂದು ಪೊಲೀಸರು ಮಾಹಿತಿ ನೀಡಿದ್ದಾರೆ.

                  ಇಕ್ಬಾಲ್‌ ಮೂಲತಃ ತೆಹ್ಸಿಲ್‌ ಆಫ್‌ ರೆಯಾಸಿ ಜಿಲ್ಲೆಯ ಮಹೋರ್‌ನ ಖೋರ್‌ ಗ್ರಾಮದ ನಿವಾಸಿಯಾಗಿದ್ದು, ಈ ಹಿಂದೆ ಉಗ್ರರ ಸಹಚರನಾಗಿದ್ದ. ಉಗ್ರ ಸಂಘಟನೆಗಳ ಜತೆ ನಂಟು ಇರುವ ಶಂಕೆಯಿಂದಾಗಿ ಆತನ ಮೇಲೆ ದಾಳಿ ನಡೆಸಲಾಗಿದೆ.