ತ್ರಿಪುರಾ: ಐದು ವರ್ಷ ಕಾಲ ಎನ್‌ಎಲ್‌ಎಫ್‌ಟಿ, ಎಟಿಟಿಎಫ್‌ ನಿಷೇಧಿಸಿ ಕೇಂದ್ರ ಆದೇಶ

              ನವದೆಹಲಿ: ತ್ರಿಪುರಾವನ್ನು ಭಾರತದಿಂದ ಪ್ರತ್ಯೇಕಗೊಳಿಸಿ ಸ್ವತಂತ್ರ ರಾಷ್ಟ್ರವಾಗಿಸಲು ಯತ್ನಿಸುತ್ತಿವೆ ಎಂಬ ಆರೋಪದಡಿ ರಾಷ್ಟ್ರೀಯ ತ್ರಿಪುರಾ ಮುಕ್ತಿ ರಂಗ (ಎನ್‌ಎಲ್‌ಎಫ್‌ಟಿ) ಮತ್ತು ಆಲ್ ತ್ರಿಪುರಾ ಟೈಗರ್‌ ಫೋರ್ಸ್ (ಎಟಿಟಿಎಫ್‌) ಸಂಘಟನೆಗಳನ್ನು ಕೇಂದ್ರ ಸರ್ಕಾರ ಐದು ವರ್ಷ ನಿಷೇಧಿಸಿದೆ.

             'ಈ ಸಂಘಟನೆಗಳು ಹಿಂಸಾಕೃತ್ಯಗಳಲ್ಲಿ ತೊಡಗಿದ್ದವು. ಗುರಿ ಸಾಧನೆಗೆ ಜನರಲ್ಲಿ ಭಯೋತ್ಪಾದನೆ ಮತ್ತು ಹಿಂಸಾ ಮನೋಭಾವ ಬೆಳೆಸಲು ಒತ್ತು ನೀಡಿದ್ದವು' ಎಂದು ಕೇಂದ್ರ ಗೃಹ ಸಚಿವಾಲಯ ಮಂಗಳವಾರ ಅಧಿಸೂಚನೆ ಹೊರಡಿಸಿದೆ.

             ಈ ಎರಡೂ ಸಂಘಟನೆಗಳು ಈಶಾನ್ಯ ರಾಜ್ಯಗಳ ಕಾನೂನು ಬಾಹಿರ ಸಂಘಟನೆಗಳ ಜೊತೆಗೆ ಸಂಪರ್ಕವನ್ನು ಹೊಂದಿದ್ದು, ತನ್ನ ಗುರಿ ಸಾಧನೆಗೆ ಅವುಗಳ ಬೆಂಬಲ ಪಡೆಯಲು ಒತ್ತು ನೀಡಿದ್ದವು ಎಂದು ತಿಳಿಸಿದೆ.

               ಕಾನೂನುಬಾಹಿರ ಚಟುವಟಿಕೆಗಳ (ನಿಯಂತ್ರಣ) ಕಾಯ್ದೆ 1967 ಅನ್ವಯ ಈ ಎರಡು ಸಂಘಟನೆಗಳ ಎಲ್ಲ ಶಾಖೆ, ಮುಂಚೂಣಿ ಶಾಖೆಗಳ ಕಾರ್ಯಚಟುಟಿಕೆಗಳನ್ನು ನಿಷೇಧಿಸಲಾಗಿದೆ ಎಂದು ಗೃಹ ಸಚಿವಾಲಯವು ತಿಳಿಸಿದೆ.