ಐವಿಎಫ್ ಚಿಕಿತ್ಸೆಗಾಗಿ ಪೆರೋಲ್: ಜೀವಾವಧಿ ಶಿಕ್ಷೆಗೆ ಒಳಗಾದ ವ್ಯಕ್ತಿಗೆ ಗೌರವಯುತ ಜೀವನ ನಡೆಸಲು ಎಲ್ಲ ಹಕ್ಕಿದೆ: ಕೇರಳ ಹೈಕೋರ್ಟ್

                 ಕೊಚ್ಚಿ: ವಿಯೂರು ಕೇಂದ್ರ ಕಾರಾಗೃಹದಲ್ಲಿ ಜೀವಾವಧಿ ಶಿಕ್ಷೆಗೊಳಗಾದ ಖೈದಿಯೊಬ್ಬನಿಗೆ ಐವಿಎಫ್ ಚಿಕಿತ್ಸೆಗೆ ಕೇರಳ ಹೈಕೋರ್ಟ್ ಅನುಮತಿ ನೀಡಿದೆ. ಕಳೆದ 7 ವರ್ಷಗಳಿಂದ ಜೈಲಿನಲ್ಲಿರುವ ತನ್ನ ಪತಿಗೆ ವೈದ್ಯಕೀಯ ಪ್ರಕ್ರಿಯೆಗಳನ್ನು ಪೂರ್ಣಗೊಳಿಸಲು ಪೆರೋಲ್ ನೀಡುವಂತೆ ಆರೋಪಿಯ ಪತ್ನಿ ನ್ಯಾಯಾಲಯದ ಮೊರೆ ಹೋಗಿದ್ದರು. ಐವಿಎಫ್/ಐಸಿಎಸ್ ಐ (ಇನ್ ವಿಟ್ರೊ ಫರ್ಟಿಲೈಸೇಶನ್ / ಇಂಟ್ರಾಸೈಟೋಪ್ಲಾಸ್ಮಿಕ್ ಸ್ಪರ್ಮ್ ಇಂಜೆಕ್ಷನ್) ವಿಧಾನದ ಮೂಲಕ ಮಗುವನ್ನು ಹೊಂದುವುದು ಇದರ ಉದ್ದೇಶವಾಗಿದೆ.

                ದಂಪತಿಗೆ ಮಗುವಾಗುವುದು ಕನಸಾಗಿದ್ದು, ವಿವಿಧ ವೈದ್ಯಕೀಯ ಶಾಖೆಗಳಲ್ಲಿ ಚಿಕಿತ್ಸೆ ಪಡೆದರೂ ಇಲ್ಲಿಯವರೆಗೆ ಏನೂ ಪ್ರಯೋಜನವಾಗಿಲ್ಲ ಎಂಬುದು ಅರ್ಜಿದಾರರ ವಾದ. ಪತಿ ಜೈಲಿನಿಂದ ನಿಯಮಿತ ರಜೆ ಪಡೆದ ಬಳಿಕ ಅಲೋಪತಿ ಚಿಕಿತ್ಸೆ ಆರಂಭಿಸಿರುವುದಾಗಿ ಅರ್ಜಿದಾರರು ತಿಳಿಸಿದ್ದಾರೆ. ದಂಪತಿ ಚಿಕಿತ್ಸೆ ಪಡೆಯುತ್ತಿರುವ ಆಸ್ಪತ್ರೆಯಿಂದ 3 ತಿಂಗಳ ಕಾಲ ತನ್ನ ಪತಿಯ ಉಪಸ್ಥಿತಿಯ ಅಗತ್ಯವಿದೆ ಎಂಬ ಪತ್ರವನ್ನು ಸಹ ಅವರು ಹಾಜರುಪಡಿಸಿದರು.

                     ಕೇರಳ ಕಾರಾಗೃಹಗಳು ಮತ್ತು ತಿದ್ದುಪಡಿ ಸೇವೆಗಳ (ನಿರ್ವಹಣೆ) ಕಾಯ್ದೆ, 2010 ರ ಸೆಕ್ಷನ್ 73 ರ ಅಡಿಯಲ್ಲಿ ತನ್ನ ಪತಿಗೆ 3 ತಿಂಗಳ ಕಾಲ ಪೆರೋಲ್ ಕೋರಿ ಅರ್ಜಿದಾರರು ರಾಜ್ಯ ಅಧಿಕಾರಿಗಳನ್ನು ಸಂಪರ್ಕಿಸಿದರು ಆದರೆ ಅನುಕೂಲಕರ ಪ್ರತಿಕ್ರಿಯೆಯನ್ನು ಸ್ವೀಕರಿಸಲಿಲ್ಲ.

                ಅರ್ಜಿದಾರರ ಪರ ವಕೀಲರು ದಂಪತಿಗಳ ಸಂತಾನದ ಹಕ್ಕು ಅವರ ಮೂಲಭೂತ ಹಕ್ಕು ಮತ್ತು ಅರ್ಜಿದಾರರ ಪತಿ ಐವಿಎಫ್/ಐಸಿಎಸ್ ಐ ಕಾರ್ಯವಿಧಾನಕ್ಕೆ ರಜೆ ತೆಗೆದುಕೊಳ್ಳಲು ಅರ್ಹರಾಗಿದ್ದಾರೆ ಎಂದು ಮನವಿ ಸಲ್ಲಿಸಿದರು. ಆದರೆ ಸರ್ಕಾರಿ ವಕೀಲರು ಈ ಮನವಿಯನ್ನು ವಿರೋಧಿಸಿದರು ಮತ್ತು ಬಂಧನದಲ್ಲಿರುವ ವ್ಯಕ್ತಿಯು ಅಂತಹ ರಜೆಗೆ ಅರ್ಹನಲ್ಲ ಎಂದು ವಾದಿಸಿದರು.

               ನ್ಯಾಯಮೂರ್ತಿ ಪಿ.ವಿ.ಕುಂಞÂ್ಞ ಕೃಷ್ಣನ್ ಅವರಿದ್ದ ಏಕಸದಸ್ಯ ಪೀಠವು, ಕೇವಲ ತಾಂತ್ರಿಕ ಕಾರಣಗಳ ಆಧಾರದ ಮೇಲೆ ನ್ಯಾಯಾಲಯವು ಇಂತಹ ನೈಜ ಅರ್ಜಿಗಳತ್ತ ಕಣ್ಣು ಮುಚ್ಚುವಂತಿಲ್ಲ ಎಂದು ಅಭಿಪ್ರಾಯಪಟ್ಟಿದೆ. ಇದೇ ಸಂದರ್ಭಗಳಲ್ಲಿ 15 ದಿನಗಳ ಪೆರೋಲ್ ನೀಡಿದ ರಾಜಸ್ಥಾನ ಹೈಕೋರ್ಟ್‍ನ ನಿರ್ಧಾರಗಳನ್ನು ನ್ಯಾಯಾಲಯ ಪರಿಗಣಿಸಿದೆ. ಅದರಂತೆ, ಐವಿಎಫ್/ಐಸಿಎಸ್‍ಐ ಕಾರ್ಯವಿಧಾನವನ್ನು ಮುಂದುವರಿಸಲು ಅರ್ಜಿದಾರರ ಪತಿಗೆ ಕನಿಷ್ಠ 15 ದಿನಗಳ ರಜೆ ನೀಡಬೇಕು ಎಂದು ನ್ಯಾಯಾಲಯ ಹೇಳಿದೆ. ಅರ್ಜಿದಾರರ ಪತಿಗೆ ಎರಡು ವಾರಗಳಲ್ಲಿ ಶಾಸನಬದ್ಧ ರಜೆ ನೀಡುವಂತೆ ಜೈಲು ಮತ್ತು ಸುಧಾರಣಾ ಸೇವೆಗಳ ಮಹಾನಿರ್ದೇಶಕರಿಗೆ ಸೂಚಿಸಲಾಗಿದೆ. ಆದರೆ ಪ್ರಸ್ತುತ ಪ್ರಕರಣವನ್ನು ಎಲ್ಲಾ ಪ್ರಕರಣಗಳಲ್ಲಿ ಪೂರ್ವನಿದರ್ಶನವಾಗಿ ತೆಗೆದುಕೊಳ್ಳಬಾರದು ಮತ್ತು ಪ್ರತಿ ಪ್ರಕರಣವನ್ನು ಅದರ ಅರ್ಹತೆಯ ಮೇಲೆ ಪರಿಗಣಿಸಬೇಕು ಎಂದು ನ್ಯಾಯಾಲಯ ಎಚ್ಚರಿಸಿದೆ.