ವಿಶ್ವ ಪ್ರಾಣಿಗಳ ದಿನ: ಸೋನಿಯಾಗೆ ನೂರಿ ಹೆಸರಿನ ನಾಯಿಮರಿ ನೀಡಿದ ರಾಹುಲ್‌ ಗಾಂಧಿ

                 ನವದೆಹಲಿ: ವಿಶ್ವ ಪ್ರಾಣಿಗಳ ದಿನದ ಅಂಗವಾಗಿ ಕಾಂಗ್ರೆಸ್‌ ನಾಯಕ ರಾಹುಲ್‌ ಗಾಂಧಿ ಅವರು ತಮ್ಮ ತಾಯಿ ಸೋನಿಯಾ ಗಾಂಧಿಗೆ ನಾಯಿಮರಿಯೊಂದನ್ನು ಉಡುಗೊರೆಯಾಗಿ ನೀಡಿದ್ದಾರೆ. ಇದಕ್ಕೆ 'ನೂರಿ' ಎಂದು ನಾಮಕರಣ ಮಾಡಿರುವುದಾಗಿ ತಿಳಿಸಿದ್ದಾರೆ.

              ಈ ಬಗ್ಗೆ ತಮ್ಮ ಯುಟ್ಯೂಬ್‌ ಚಾನೆಲ್‌ನಲ್ಲಿ ವಿಡಿಯೊವೊಂದನ್ನು ಹಂಚಿಕೊಂಡಿರುವ ರಾಹುಲ್‌ ಗಾಂಧಿ, ನೂರಿಯನ್ನು ಭೇಟಿ ಮಾಡಿದ ಸಂದರ್ಭದ ಬಗ್ಗೆ ಮಾತನಾಡಿದ್ದಾರೆ.

               'ಜ್ಯಾಕ್ ರಸೆಲ್ ಟೆರಿಯರ್‌ ತಳಿ ಬಗ್ಗೆ ವಿಚಾರಿಸಲು ರಾಹುಲ್‌ ಗಾಂಧಿ ಅವರ ಕಚೇರಿಯಿಂದ ನಮಗೆ ಕರೆ ಬಂದಿತ್ತು. ಆಗಸ್ಟ್‌ನಲ್ಲಿ ಗೋವಾಕ್ಕೆ ಭೇಟಿ ನೀಡಿದ ಸಂದರ್ಭ ಇಲ್ಲಿಗೆ ಭೇಟಿ ನೀಡಿ ರಾಹುಲ್‌ ಗಾಂಧಿ, ನಾಯಿಮರಿ ಖರೀದಿಸಿದ್ದರು' ಎಂದು ಬ್ರೀಡರ್‌ ಶರ್ವಾಣಿ ಪಿತ್ರೆ ತಿಳಿಸಿದ್ದಾರೆ.

               ಗೋವಾದಿಂದ ತೆರಳುವ ವೇಳೆ ನೂರಿ ಜೊತೆ ಮೆಟ್ರೊದಲ್ಲಿ ಪ್ರಯಾಣಿಸಿದ್ದರು. ಆ ವೇಳೆ ಪ್ರಯಾಣಿಕರೊಂದಿಗೆ ಸಂವಾದ ನಡೆಸಿದ್ದಾರೆ.

                ಮನೆಗೆ ಬಂದ ವೇಳೆ ತಾಯಿಗೆ ಉಡುಗೊರೆ ತೆರೆಯಲು ಹೇಳಿದ್ದಾರೆ. ನಾಯಿಮರಿ ಕಂಡು ಸೋನಿಯಾ ಎತ್ತಿಕೊಂಡು ಮುದ್ದಾಡಿದ್ದಾರೆ.

                 ರಾಹುಲ್‌ ಗಾಂಧಿ ಮತ್ತು ಸೋನಿಯಾ ಗಾಂಧಿ ಅವರ ಪ್ರಾಣಿ ಪ್ರೀತಿ ಕಂಡು ನೆಟ್ಟಿಗರು ಸಂತಸ ವ್ಯಕ್ತಪಡಿಸಿದ್ದಾರೆ.