ಪರೀಕ್ಷಾ ಅಕ್ರಮ ತಡೆಗೆ ಬಯೋಮೆಟ್ರಿಕ್ ವ್ಯವಸ್ಥೆ

                ನವದೆಹಲಿ: ಅಭ್ಯರ್ಥಿ ಬದಲು ಬೇರೆಯವರು ಪರೀಕ್ಷೆ ಬರೆಯುವುದು ಸೇರಿದಂತೆ ವಿವಿಧ ಪರೀಕ್ಷಾ ಅಕ್ರಮಗಳನ್ನು ತಡೆಯಲು ಪರೀಕ್ಷೆಗಳಲ್ಲಿ ಬಯೋಮೆಟ್ರಿಕ್ ದೃಢೀಕರಣ ವ್ಯವಸ್ಥೆ ಅಳವಡಿಸಲು ಯೋಜಿಸಿರುವುದಾಗಿ ಕೇಂದ್ರೀಯ ಪ್ರೌಢ ಶಿಕ್ಷಣ ಮಂಡಳಿ (ಸಿಬಿಎಸ್​ಇ) ಶನಿವಾರ ಹೇಳಿದೆ.

              ದೇಶಾದ್ಯಂತ ಅಂದಾಜು 1,500 ಪರೀಕ್ಷಾ ಕೇಂದ್ರಗಳು ಮತ್ತು 17 ಲಕ್ಷ ವಿದ್ಯಾರ್ಥಿಗಳಿಗೆ ಇದು ಅನ್ವಯಿಸಲಿದೆ. ದೇಶಾದ್ಯಂತ ಆಫ್​ಲೈನ್/ಆನ್​ಲೈನ್ ವಿಧಾನಗಳಲ್ಲಿ ವಿವಿಧ ಪರೀಕ್ಷೆಗಳನ್ನು ಸಿಬಿಎಸ್​ಇ ನಡೆಸುತ್ತದೆ. ಆಯ್ದ ನಗರಗಳಲ್ಲಿ ಪರೀಕ್ಷೆ ಸಂದರ್ಭದಲ್ಲಿ ಮತ್ತು ಪರೀಕ್ಷೆಯ ನಂತರದಲ್ಲಿ ಡಿಜಿಟಲ್ ಫಿಂಗರ್​ಪ್ರಿಂಟ್ ಕ್ಯಾಪ್ಚರಿಂಗ್, ಫೋಟೋ ಕ್ಯಾಪ್ಚರಿಂಗ್, ಅಭ್ಯರ್ಥಿಗಳ ಸ್ಕಾಯನ್ ಮಾಡಿದ ಫೋಟೋಗಳೊಂದಿಗೆ ಮುಖ ಹೊಂದಾಣಿಕೆ ಮೊದಲಾದ ಬಯೋಮೆಟ್ರಿಕ್ ದೃಢೀಕರಣ ವ್ಯವಸ್ಥೆಗಳನ್ನು ಪರೀಕ್ಷಾ ಕೇಂದ್ರಗಳಲ್ಲಿ ಕಲ್ಪಿಸಲಾಗುವುದು ಎಂದು ಸಿಬಿಎಸ್​ಇ ಹೇಳಿದೆ.

                      ಪರೀಕ್ಷಾ ಕೇಂದ್ರಗಳಲ್ಲಿ ಅಭ್ಯರ್ಥಿಗಳ ವಿವಿಧ ಚಟುವಟಿಕೆಗಳನ್ನು ಮೇಲ್ವಿಚಾರಣೆ ಹಾಗೂ ನೈಜ ಸಮಯದ ಆಧಾರದಲ್ಲಿ ಪರಿಶೀಲಿಸುವ ಕಾರ್ಯ ನಡೆಯಲಿದೆ. ಈ ಮೂಲಕ ಪರೀಕ್ಷಾ ಪ್ರಕ್ರಿಯೆ ಸುಧಾರಿಸಲಾಗುವುದು. ಇದಕ್ಕಾಗಿ ಅಂದಾಜು 5 ಕೋಟಿ ರೂ. ವ್ಯಯಿಸಲಾಗುತ್ತಿದೆ ಎಂದು ಸಿಬಿಎಸ್​ಇ ಹೇಳಿದೆ.