ಸಂಸ್ಥೆ ಉಳಿಸಲು ಹೀಗೊಂದು ದಾರಿ: ಸಪ್ಲೈಕೋದಲ್ಲಿ ಮದ್ಯ ಮಾರಾಟ ಅನುಮೋದನೆ ಸಾಧ್ಯತೆ

                 ತಿರುವನಂತಪುರಂ: ಸಬ್ಸಿಡಿ ದರದಲ್ಲಿ ಅಗತ್ಯ ವಸ್ತುಗಳನ್ನು ಪೂರೈಸಲು ವಿಫಲವಾದ ಹಿನ್ನೆಲೆಯಲ್ಲಿ ಸಂಸ್ಥೆ ಉಳಿಸಲು ಮದ್ಯ ಮಾರಾಟ ಮಾಡುವ ಸಾಧ್ಯತೆಯನ್ನು ಸಪ್ಲೈಕೋ ಹುಡುಕುತ್ತಿದೆ.

                 ಆರ್ಥಿಕ ಮುಗ್ಗಟ್ಟು, ಕ್ರಿಸ್ ಮಸ್ ಮಾರುಕಟ್ಟೆ ಆರಂಭದ ಬಗ್ಗೆ ಅನಿಶ್ಚಿತತೆ ಇರುವಾಗಲೇ ರಾಜ್ಯ ಸರ್ಕಾರ ಹೊಸ ನಡೆಗೆ ಸಿದ್ಧತೆ ನಡೆಸಿದೆ.

           ಕನ್ಸ್ಯೂಮರ್ ಫೆಡ್ ಮಾದರಿಯಲ್ಲಿ ಮದ್ಯ ಮಾರಾಟ ಆರಂಭಿಸಲು ಪ್ರಾಥಮಿಕ ಅಧ್ಯಯನ ಆರಂಭಿಸಲಾಗಿದೆ. ಸರ್ಕಾರದ ಕಾನೂನಾತ್ಮಕ ಅನುಮೋದನೆ ದೊರೆತ ತಕ್ಷಣ ವ್ಯವಸ್ಥೆಗೆ ಚಾಲನೆ ನೀಡಲಾಗುವುದು. ಬಿವರೇಜಸ್ ಕಾರ್ಪೋರೇಷನ್ ಔಟ್‍ಲೆಟ್‍ಗಳ ನಂತರ, ರಾಜ್ಯದಲ್ಲಿ ಅತಿ ಹೆಚ್ಚು ಸಣ್ಣ ಮದ್ಯದ ಮಳಿಗೆಗಳನ್ನು ಕನ್ಸ್ಯೂಮರ್‍ಫೆಡ್ ಹೊಂದಿದೆ. ಕನ್ಸ್ಯೂಮರ್‍ಫೆಡ್ ಪ್ರಸ್ತುತ 41 ಚಿಲ್ಲರೆ ಮಾರಾಟ ಮಳಿಗೆಗಳನ್ನು ಮತ್ತು ಮೂರು ವೈನ್ ಶಾಪ್‍ಗಳನ್ನು ಹೊಂದಿದೆ.

              ಎಲ್ಲಾ ಜಿಲ್ಲೆಗಳಲ್ಲಿ ಸಾರ್ವಜನಿಕ ವಿತರಣಾ ಕೇಂದ್ರಗಳನ್ನು ಹೊಂದಿರುವ ಸಪ್ಲೈಕೋಗೆ ಮದ್ಯ ಮಾರಾಟವನ್ನು ಸಹ ಒದಗಿಸಬಹುದು. ಇಲ್ಲಿಯ ಮಾರಾಟದಿಂದ 20 ಪ್ರತಿಶತದಷ್ಟು ಲಾಭವನ್ನು ಪಡೆಯಬಹುದು ಎಂದು ನಿರೀಕ್ಷಿಸಲಾಗಿದೆ.