ಜಿಲ್ಲೆಯಲ್ಲಿ ಮಂಪ್ಸ್ ರೊಗ- ಸಾರ್ವಜನಿಕರು ಜಾಗ್ರತೆ ಪಾಲಿಸಲು ಡಿಎಂಒ ಸೂಚನೆ

               ಕಾಸರಗೋಡು: ಜಿಲ್ಲೆಯ ವಿವಿಧೆಡೆ ಕೆನ್ನೆಗಳಲ್ಲಿ ಬಾವು ಕಾಣಿಸಿಕೊಳ್ಳುವ(ಮಂಪ್ಸ್)ಕಾಯಿಲೆ ವರದಿಯಾಗುತ್ತಿದ್ದು, ಸಾರ್ವಜನಿಕರು ಈ ಬಗ್ಗೆ ಜಾಗ್ರತೆ ಪಾಲಿಸುವಂತೆ ಜಿಲ್ಲಾ ವೈದ್ಯಾಧಿಕಾರಿ ಡಾ.ಎ.ವಿ.ರಾಮದಾಸ್ ಮಾಹಿತಿ ನೀಡಿದ್ದಾರೆ. ವೈರಸ್‍ನಿಂದ ಉಂಟಾಗುವ ಈ ಕಾಯಿಲೆ, ಲಾಲಾರಸ ಗ್ರಂಥಿಗಳ ಮೇಲೆ ಪರಿಣಾಮ ಬೀರುತ್ತದೆ.

         ಈ ರೋಗವು ಪ್ಯಾರಾಮಿಕ್ಸೊವೆರಿಡ್ ವಿಭಾಗಕ್ಕೆ ಒಳಪಟ್ಟಿದ್ದು, ಗಾಳಿಯ ಮೂಲಕ ಹರಡುತ್ತದೆ. ಸೋಂಕಿತ ವ್ಯಕ್ತಿಗಳಲ್ಲಿ ಲಾಲಾರಸ ಗ್ರಂಥಿಗಳ ಊತ ಪ್ರಾರಂಭವಾಗಿ,  7 ದಿನಗಳ ಮೊದಲು ಊತ ಕಾಣಿಸಿಕೊಂಡು, ಮುಂದಿನ ಏಳು ದಿವಸಗಳ ವರೆಗೆ ಹರಡುತ್ತದೆ.  ಈ ರೋಗವು ಹೆಚ್ಚಾಗಿ ಐದರಿಂದ ಒಂಬತ್ತು ವರ್ಷದೊಳಗಿನ ಮಕ್ಕಳ ಮೇಲೆ  ಕಂಡುಬರುತ್ತಿದ್ದು, ವಯಸ್ಕರಲ್ಲಿ ನೋವು ತೀವ್ರವಾಗಿರುತ್ತದೆ.  ಬಾವು  ಮುಖ್ಯವಾಗಿ ಕಿವಿಗಳ ಕೆಳಗೆ ಕೆನ್ನೆಗಳ ಬದಿಗಳಲ್ಲಿ ಕಂಡುಬರುತ್ತದೆ. ಇದು ಮುಖದ ಒಂದು ಅಥವಾ ಎರಡೂ ಬದಿಗಳ ಮೇಲೆ ಪರಿಣಾಮ ಬೀರಬಹುದು. ಸಣ್ಣ ಜ್ವರ ಮತ್ತು ತಲೆನೋವು ಆರಂಭಿಕ ಲಕ್ಷಣಗಳಾಗಿದ್ದು, ಬಾಯಿ ತೆರೆಯಲು, ಆಹಾರ ಜಗಿಯಲು ಮತ್ತು ನುಂಗಲು ಸಮಸ್ಯೆ ಉಂಟಾಗುತ್ತದೆ. ಹಸಿವಿನ ಕೊರತೆ ಮತ್ತು ಆಯಾಸವೂ ಕಂಡುಬರುತ್ತದೆ. ಹೆಚ್ಚಿನ ದ್ರವಾಹಾರ ಸೇವಿಸುವುದು ಉತ್ತಮ.

          ವಿಶೇಷ ಕಾಳಜಿ ವಹಿಸದಿದ್ದಲ್ಲಿ, ರೋಗವು ಮೆದುಳು, ವೃಷಣ, ಅಂಡಾಶಯ, ಗ್ರಂಥಿ ಮತ್ತು ಪ್ರಾಸ್ಟೇಟ್ ಮೇಲೆ ಪರಿಣಾಮ ಬೀರುವ ಸಾಧ್ಯತೆಯಿದೆ. ರೋಗಲಕ್ಷಣಗಳಿಗೆ ಆರಂಭಿಕ ಚಿಕಿತ್ಸೆ ನೀಡದಿದ್ದರೆ, ಭವಿಷ್ಯದಲ್ಲಿ ಬಂಜೆತನದ ಸಾಧ್ಯತೆಯೂ ಬರಲಿದೆ. ಮೆದುಳಿನ ಮೇಲೆ ಪರಿಣಾಮ ಬೀರಿದರೆ ಎನ್ಸೆಫಾಲಿಟಿಸ್ ಸಂಭವಿಸಿ,  ಇದು ಸಾವಿಗೂ ಕಾರಣವಾಗಬಹುದು. ಮಂಪ್ಸ್ ಪ್ರಸರಣವನ್ನು ನಿಯಂತ್ರಿಸುವುದು ಕಷ್ಟಕರವಾಗಿದೆ ಏಕೆಂದರೆ ರೋಗವನ್ನು ಪತ್ತೆಹಚ್ಚುವ ಹೊತ್ತಿಗೆ ಅದು ಇತರರಿಗೆ ಹರಡುತ್ತದೆ.

        ಈ ರೋಗವನ್ನು ನಿಯಂತ್ರಿಸಲು ಲಸಿಕೆ ಲಭ್ಯವಿದೆ. ಜನನದ ನಂತರ 16 ಮತ್ತು 24 ತಿಂಗಳ ನಡುವೆ ಎಂಎಂಆರ್ ಲಸಿಕೆಯನ್ನು ನೀಡುವ ಮೂಲಕ ಮಂಪ್ಸ್, ಐದನೇ ಜ್ವರ ಮತ್ತು ರುಬೆಲ್ಲಾದಿಂದ ರಕ್ಷಿಸಬಹುದಾಗಿದೆ. ಜನವರಿಯಿಂದ ಮೇ ತಿಂಗಳವರೆಗೆ ಮಂಪ್ಸ್ ರೋಗ ಹೆಚ್ಚಾಗಿ ಕಾಣಿಸಿಕೊಳ್ಳುತ್ತದೆ. ಮಂಪ್ಸ್ ಕಾಣಿಸಿಕೊಂಡಲ್ಲಿ ಸ್ವಯಂ ಚಿಕಿತ್ಸೆ ನಡೆಸದೆ, ವೈದ್ಯರನ್ನು ಸಂಪರ್ಕಿಸುವಂತೆಯೂ ಡಾ. ರಾಮದಾಸ್ ತಿಳಿಸಿದ್ದಾರೆ.