ಚುನಾವಣೆ: ಜುಮಾ ನಮಾಝಿನ ಸಮಯ ಕಡಿತಗೊಳಿಸಲು ಕೇರಳದ ಮುಸ್ಲಿಂ ಜಮಾತ್ ಸಮಿತಿಗಳ ನಿರ್ಧಾರ

                  ತಿರುವನಂತಪುರಂ: ಲೋಕಸಭೆ ಚುನಾವಣೆಯ ದಿನದಂದು ಜುಮಾ ಪ್ರಾರ್ಥನೆಯನ್ನು ಮರು ನಿಗದಿಪಡಿಸಲು ಮತ್ತು ಸಮಯವನ್ನು ಕಡಮೆ ಮಾಡಲು ಕೇರಳದ ಮುಸ್ಲಿಂ ಜಮಾತ್ ಸಮಿತಿಗಳು ನಿರ್ಧರಿಸಿವೆ.

                  ಶುಕ್ರವಾರ ನಡೆಯಲಿರುವ(ಏ.26) ಚುನಾವಣೆಯನ್ನು ಮುಂದೂಡುವಂತೆ ಮುಸ್ಲಿಂ ಸಂಘಟನೆಗಳು ಚುನಾವಣಾ ಆಯೋಗಕ್ಕೆ ಮನವಿ ಮಾಡಿದರೂ ಪ್ರಯೋಜನವಾಗಿಲ್ಲ. ಇದರ ಬೆನ್ನಲ್ಲೇ ಹೊಸ ನಿರ್ಧಾರ ಹೊರಬಿದ್ದಿದೆ.

                 ಜಮಾತ್ ಸಮಿತಿಗಳ ಪ್ರಕಾರ, ಶುಕ್ರವಾರ ಚುನಾವಣೆ ನಡೆಸುವುದರಿಂದ ಅನೇಕ ವಿಶ್ವಾಸಿಗಳು ತಮ್ಮ ಮತದಾನದ ಹಕ್ಕನ್ನು ಚಲಾಯಿಸುವುದನ್ನು ತಡೆಯಾಗಬಹುದೆಂಬ  ಕಳವಳದಿಂದಾಗಿ ಎಂದು ಪ್ರತಿಕ್ರಿಯಿಸಿದೆ.

                    ಜುಮಾ ಪ್ರಾರ್ಥನೆಯು ಸಾಮಾನ್ಯವಾಗಿ 45 ನಿಮಿಷದಿಂದ ಒಂದು ಗಂಟೆಯವರೆಗೆ ಇರುತ್ತದೆ. ಏಪ್ರಿಲ್ 26 ರಂದು ಮಧ್ಯಾಹ್ನ 12.45 ರಿಂದ 1.30 ರವರೆಗಿನ ಜುಮಾವನ್ನು ಮಧ್ಯಾಹ್ನ 1 ರಿಂದ 1.20 ಕ್ಕೆ ಮೊಟಕುಗೊಳಿಸಲಾಗುವುದು ಎಂದು ತಿರುವನಂತಪುರದ ಪ್ರಮುಖ ಪಾಳಯಂ ಜಮಾತ್ ಸಮಿತಿ ತಿಳಿಸಿದೆ.

                   "ಸಾಮಾನ್ಯವಾಗಿ 45 ನಿಮಿಷಗಳ ಜುಮಾ ನಮಾಝ್ ಅನ್ನು ಮತದಾನದ ದಿನದಂದು 25 ನಿಮಿಷಗಳಷ್ಟು ಕಡಮೆಗೊಳಿಸಲಾಗುವುದು. ನಾವು ಸಮಾಲೋಚನೆಯ ನಂತರ ನಿರ್ಧಾರವನ್ನು ತೆಗೆದುಕೊಂಡಿದ್ದೇವೆ ಮತ್ತು ಈದ್ ಪ್ರಾರ್ಥನೆಯ ಸಮಯದಲ್ಲಿ ಅದನ್ನು ಘೋಷಿಸಿದ್ದವು. ಹಲವಾರು ಹತ್ತಿರದ ಜಮಾಅತ್ ಸಮಿತಿಗಳು ಜುಮಾವನ್ನು ಮರುಹೊಂದಿಸಲು ನಿರ್ಧರಿಸಿವೆ. ನಿಷ್ಠಾವಂತರು ಪ್ರಾರ್ಥನೆಯನ್ನು ಬಿಡದೆ ಮತ ಚಲಾಯಿಸಲು ಸಹಾಯ ಮಾಡಿ" ಎಂದು ಪಾಳಯಂ ಸಮಿತಿ ಅಧ್ಯಕ್ಷ ಹಾಜಿ ಶೇಖ್ ಸಬೀಬ್ ಹೇಳಿದರು.

                        ಪ್ರವಚನದ ಅವಧಿಯನ್ನು ಕಡಮೆ ಮಾಡಿ ಮತದಾನದ ದಿನವಾದ ಏಪ್ರಿಲ್ 26 ರಂದು 15 ನಿಮಿಷಗಳ ಒಳಗೆ ಪ್ರಾರ್ಥನೆ ಸಲ್ಲಿಸಲಾಗುವುದು ಎಂದು ಕೇರಳ ಮುಸ್ಲಿಂ ಜಮಾತ್ ಕಾರ್ಯದರ್ಶಿ ಹಾಜಿ ಎ ಸೈಪುದ್ದೀನ್ ತಿಳಿಸಿದ್ದಾರೆ.

                       "ದೇಶದ ನಾಗರಿಕರಾಗಿ, ಮತದಾನದ ಹಕ್ಕನ್ನು ಚಲಾಯಿಸುವುದು ಬಹಳ ಮುಖ್ಯ. ಜುಮಾ ನಮಾಝ್ ಕೂಡ ಕಡ್ಡಾಯವಾಗಿದೆ. ಆದ್ದರಿಂದ ಜಮಾತ್ ಸಮಿತಿಗಳು ಪ್ರಾರ್ಥನಾ ವೇಳಾಪಟ್ಟಿಯನ್ನು ಎಚ್ಚರಿಕೆಯಿಂದ ಮರುಹೊಂದಿಸಿವೆ .ಇದರಿಂದಾಗಿ ಜನರು ಎರಡೂ ಕರ್ತವ್ಯಗಳನ್ನು ಪೂರೈಸಬಹುದು" ಎಂದು ಸೈಪುದ್ದೀನ್ ಹೇಳಿದರು.

                      ಪಾಣಕ್ಕಾಡ್ ಖಾಸಿ ಫೌಂಡೇಶನ್ ಮುಸ್ಲಿಂ ಮತದಾರರಿಗೆ ಸಹಾಯ ಮಾಡಲು ಪ್ರಾಯೋಗಿಕ ಕ್ರಮಗಳನ್ನು ಕೈಗೊಳ್ಳುವಂತೆ ಮಸೀದಿ ವ್ಯವಸ್ಥಾಪಕ ಸಮಿತಿಗಳಿಗೆ ನಿರ್ದೇಶನ ನೀಡಿದೆ. ಪ್ರಾರ್ಥನಾ ಸಮಯವನ್ನು ಪರಿಷ್ಕರಿಸಬೇಕು ಎಂದೂ ಸಮಿತಿಗಳಿಗೆ ಕಳುಹಿಸಿರುವ ಸುತ್ತೋಲೆಯಲ್ಲಿ ತಿಳಿಸಲಾಗಿದೆ.