ಶೀಘ್ರದಲ್ಲಿಯೇ ತಾಜ್‌ಮಹಲ್‌ಗೆ ಡ್ರೋನ್‌ ನಿರೋಧಕ ವ್ಯವಸ್ಥೆ ಅಳವಡಿಕೆ

ಆಗ್ರಾ: ಸಂಭಾವ್ಯ ವೈಮಾನಿಕ ದಾಳಿಯನ್ನು ತಡೆಯುವ ನಿಟ್ಟಿನಲ್ಲಿ ದೇಶದ ಪ್ರಮುಖ ಸ್ಮಾರಕ ತಾಜ್‌ಮಹಲ್‌ನಲ್ಲಿ ಡ್ರೋನ್‌ ನಿರೋಧಕ ವ್ಯವಸ್ಥೆಯನ್ನು ಅಳವಡಿಸಲು ನಿರ್ಧರಿಸಲಾಗಿದೆ ಎಂದು ಹಿರಿಯ ಅಧಿಕಾರಿಗಳು ಭಾನುವಾರ ತಿಳಿಸಿದ್ದಾರೆ.

ಕೇಂದ್ರ ಕೈಗಾರಿಕಾ ಭದ್ರತಾ ಪಡೆ ಮತ್ತು ಉತ್ತರ ಪ್ರದೇಶ ಪೊಲೀಸ್‌ ಇಲಾಖೆ ಪ್ರಸ್ತುತ ತಾಜ್‌ಮಹಲ್‌ನ ಭದ್ರತೆಯನ್ನು ನಿರ್ವಹಿಸುತ್ತಿದೆ.

ಶೀಘ್ರದಲ್ಲೇ ಸುಧಾರಿತ ರಕ್ಷಣಾ ವ್ಯವಸ್ಥೆಯನ್ನು ಅಳವಡಿಸುವ ಮೂಲಕ ಭದ್ರತೆಯನ್ನು ಮತ್ತಷ್ಟು ಬಿಗಿಗೊಳಿಸಲಾಗುವುದು ಎಂದು ತಿಳಿಸಿದ್ದಾರೆ.

ನೂತನ ವ್ಯವಸ್ಥೆಯು 7ರಿಂದ 8 ಕಿ.ಮೀ. ವ್ಯಾಪ್ತಿಯಲ್ಲಿ ಕಾರ್ಯನಿರ್ವಹಿಸುತ್ತದೆ. ಆದರೆ, ಪ್ರಾಥಮಿಕ ಹಂತದಲ್ಲಿ ತಾಜ್‌ಮಹಲ್‌ ಗೊಮ್ಮಟದ 200 ಮೀಟರ್‌ ವ್ಯಾಪ್ತಿವರೆಗೆ ಭದ್ರತೆ ನೀಡುತ್ತದೆ. ಈ ವ್ಯವಸ್ಥೆಯು ತಾಜ್‌ಮಹಲ್ ಹತ್ತಿರ ಬರುವ ಡ್ರೋನ್‌ಗಳನ್ನು ನಿಷ್ಕ್ರಿಯಗೊಳಿಸುತ್ತದೆ ಮತ್ತು ಅದರ ಸಿಗ್ನಲ್‌ ಅನ್ನು ಸ್ಥಗಿತಗೊಳಿಸುತ್ತದೆ.