ಮಧ್ಯಸ್ಥಿಕೆ ಸಂಘಟನೆ ಸೇರುವಂತೆ ನೇಪಾಳಕ್ಕೆ ಆಹ್ವಾನ

ಬೀಜಿಂಗ್‌: ಜಾಗತಿಕ ಮಟ್ಟದಲ್ಲಿ ತನ್ನ ಪ್ರಭಾವ ಹೆಚ್ಚಿಸಿಕೊಳ್ಳಲು ತಾನು ರಚಿಸಿರುವ 'ಅಂತರರಾಷ್ಟ್ರೀಯ ಮಧ್ಯಸ್ಥಿಕೆ ಸಂಘಟನೆ' ಸೇರುವಂತೆ ನೇಪಾಳಕ್ಕೆ ಚೀನಾ ಆಹ್ವಾನ ನೀಡಿದೆ.

ಹಾಂಗ್‌ಕಾಂಗ್‌ನಲ್ಲಿ ಶುಕ್ರವಾರ ನಡೆದ ಕಾರ್ಯಕ್ರಮದಲ್ಲಿ ಅಂತರರಾಷ್ಟ್ರೀಯ ಮಧ್ಯಸ್ಥಿಕೆ ಸಂಘಟನೆಗೆ ಚಾಲನೆ ನೀಡಲಾಗಿತ್ತು.

ಈ ಕಾರ್ಯಕ್ರಮದಲ್ಲಿ ಪಾಲ್ಗೊಂಡಿದ್ದರೂ, ಸಂಘಟನೆ ಸೇರುವುದಕ್ಕಾಗಿ ನೇಪಾಳ ಸಹಿ ಹಾಕಿಲ್ಲ.

'ಮೊದಲ ದಿನವೇ ವಿಶ್ವದ 33 ರಾಷ್ಟ್ರಗಳು ಸಂಘಟನೆ ಸೇರಲು ಸಹಿಹಾಕಿದ್ದು, ಸ್ಥಾಪಕ ಸದಸ್ಯ ರಾಷ್ಟ್ರಗಳಾಗಿವೆ' ಎಂದು ಸರ್ಕಾರಿ ಸ್ವಾಮ್ಯದ ಕ್ಸಿನುವಾ ಸುದ್ದಿಸಂಸ್ಥೆ ವರದಿ ಮಾಡಿದೆ. ಆದರೆ ಸದಸ್ಯ ರಾಷ್ಟ್ರಗಳ ಹೆಸರನ್ನು ಬಹಿರಂಗಪಡಿಸಿಲ್ಲ.

'ಕಾರ್ಯಕ್ರಮದಲ್ಲಿ ನೇಪಾಳದ ವಿದೇಶಾಂಗ ಸಚಿವ ಅರ್ಜು ರಾಣಾ ದೇವುಬಾ ಅವರನ್ನು ಭೇಟಿಯಾದ ಚೀನಾ ವಿದೇಶಾಂಗ ಸಚಿವ ವಾಂಗ್‌ ಯಿ, ಚರ್ಚಿಸಿದರು. ನೇಪಾಳವು ಆದಷ್ಟು ಬೇಗ ಸಂಘಟನೆಗೆ ಸೇರಲಿದೆ' ಎಂದು ಪ್ರಕಟಣೆಯಲ್ಲಿ ತಿಳಿಸಲಾಗಿದೆ.