ರಷ್ಯಾದ 19 ಡ್ರೋನ್‌ಗಳನ್ನು ಹೊಡೆದುರುಳಿಸಿದ ಪೋಲೆಂಡ್‌

ವಾರ್ಸಾ (ರಾಯಿಟರ್ಸ್‌): ತನ್ನ ವಾಯುಪ್ರದೇಶ ಪ್ರವೇಶಿಸಿದ್ದ ರಷ್ಯಾದ 19 ಡ್ರೋನ್‌ಗಳನ್ನು ಹೊಡೆದುರುಳಿಸಿದ್ದಾಗಿ ಪೋಲೆಂಡ್‌ ಬುಧವಾರ ಹೇಳಿದೆ. ಈ ಮೂಲಕ ರಷ್ಯಾ ಮತ್ತು ಉಕ್ರೇನ್‌ ನಡುವೆ ಯುದ್ಧ ಆರಂಭವಾದ ನಂತರ, ನ್ಯಾಟೊ ಸದಸ್ಯರಾಷ್ಟ್ರವೊಂದರ ಮೇಲೆ ರಷ್ಯಾ ಪಡೆಗಳು ಇದೇ ಮೊದಲ ಬಾರಿಗೆ ದಾಳಿ ನಡೆಸಿದಂತಾಗಿದೆ.

ಪೋಲೆಂಡ್‌ ಪ್ರಧಾನಿ ಡೊನಾಲ್ಡ್‌ ಟಸ್ಕ್‌ ಈ ಬಗ್ಗೆ ಮಾಹಿತಿ ನೀಡಿದ್ದು,' ಭದ್ರತೆಗೆ ಬೆದರಿಕೆ ಒಡ್ಡಿದ ಡ್ರೋನ್‌ಗಳನ್ನು ಈಗಾಗಲೇ ಹೊಡೆದುರುಳಿಸಿದ್ದೇವೆ. ಇದಕ್ಕೆ ತಕ್ಕ ತಿರುಗೇಟು ನೀಡಲಾಗುವುದು. ಈ ಸಂಬಂಧ ನ್ಯಾಟೊ ಸದಸ್ಯ ರಾಷ್ಟ್ರಗಳೊಂದಿಗೆ ಸಮಾಲೋಚನೆ ನಡೆಸಲಾಗುವುದು' ಎಂದಿದ್ದಾರೆ.

ರಾತ್ರಿ ಕಾರ್ಯಾಚರಣೆ:

ರಾತ್ರೋರಾತ್ರಿ ರಷ್ಯಾದ ಡ್ರೋನ್‌ಗಳು ಪೋಲೆಂಡ್‌ ವಾಯುಪ್ರದೇಶಕ್ಕೆ ಲಗ್ಗೆ ಇಟ್ಟಿದ್ದವು. 10ಕ್ಕೂ ಹೆಚ್ಚು ಡ್ರೋನ್‌ಗಳನ್ನು ಹೊಡೆದುರುಳಿಸಲಾಯಿತು ಎಂದು ಮೂಲಗಳು ಹೇಳಿವೆ.

ಕಾರ್ಯಾಚರಣೆಗೆ ತೊಡಕು:

ರಷ್ಯಾ ಡ್ರೋನ್‌ಗಳ ದಾಳಿಯಿಂದಾಗಿ ಪೋಲೆಂಡ್‌ನ ವಿವಿಧ ವಿಮಾನ ನಿಲ್ದಾಣಗಳ ಕಾರ್ಯಾಚರಣೆಗಳಿಗೆ ಸ್ವಲ್ಪ ಕಾಲ ಅಡ್ಡಿಯುಂಟಾಗಿತ್ತು. ವಾರ್ಸಾದಲ್ಲಿರುವ ದೇಶದ ಅತ್ಯಂತ ದೊಡ್ಡ ವಿಮಾನ ನಿಲ್ದಾಣ ಕೂಡ ಕೆಲ ಗಂಟೆಗಳು ಕಾರ್ಯಾಚರಣೆ ಸ್ಥಗಿತಗೊಳಿಸಿ ಮತ್ತೆ ಆರಂಭಿಸಿತು. ಪೂರ್ವ ಪೋಲೆಂಡ್‌ನ ಲುಬಿನ್‌ ವಿಮಾನ ನಿಲ್ದಾಣವು ದಿನದ ಮಟ್ಟಕ್ಕೆ ಕಾರ್ಯಾಚರಣೆ ಸ್ಥಗಿತಗೊಳಿಸಿತ್ತು.

'ಪೋಲೆಂಡ್‌ ಆರೋಪಗಳು ಆಧಾರರಹಿತ' ಎಂದು ರಷ್ಯಾ ರಾಯಭಾರಿಯೊಬ್ಬರ ಹೇಳಿಕೆ ಉಲ್ಲೇಖಿಸಿ ಸ್ಥಳೀಯ ಮಾಧ್ಯಮಗಳು ವರದಿ ಮಾಡಿವೆ. 'ತಾನು ಹೊಡೆದುರುಳಿಸಿರುವ ಡ್ರೋನ್‌ಗಳು ರಷ್ಯಾಕ್ಕೆ ಸೇರಿದವು ಎನ್ನುವ ಬಗ್ಗೆ ಪೋಲೆಂಡ್‌ ಯಾವುದೇ ಪುರಾವೆಗಳನ್ನು ಒದಗಿಸಿಲ್ಲ ಎಂಬುದಾಗಿ ರಷ್ಯಾ ಅಧಿಕಾರಿಗಳು ಹೇಳಿದ್ದಾರೆ' ಎಂದೂ ಮಾಧ್ಯಮಗಳು ವರದಿ ಮಾಡಿವೆ.