'ವಿಜೇತರು ಸೋತವರನ್ನು ಗೇಲಿ ಮಾಡಬಾರದು': ವಿಧಾನಸಭೆಗೆ ಅತಿಥಿಯಾಗಿ ಆಗಮಿಸಿದ ಮೂರನೇ ತರಗತಿ ವಿದ್ಯಾರ್ಥಿ ಅಹಾನ್

ತಿರುವನಂತಪುರಂ: 'ವಿಜೇತರು ಸೋತವರನ್ನು ಗೇಲಿ ಮಾಡಬಾರದು' ಎಂಬ ಉತ್ತರದೊಂದಿಗೆ ವೈರಲ್ ಆಗಿದ್ದ ಮೂರನೇ ತರಗತಿ ವಿದ್ಯಾರ್ಥಿ ಅಹಾನ್ ವಿಧಾನಸಭೆಗೆ ಅತಿಥಿಯಾಗಿದ್ದಾನೆ.

ಸ್ಪೀಕರ್ ಎ.ಎನ್. ಶಂಸೀರ್ ಅವರ ಆಹ್ವಾನದ ಮೇರೆಗೆ ಇಂದು ವಿಧಾನಸಭೆಗೆ ಆಗಮಿಸಿದ ಅಹಾನ್, ಮುಖ್ಯಮಂತ್ರಿ ಪಿಣರಾಯಿ ವಿಜಯನ್ ಮತ್ತು ಶಿಕ್ಷಣ ಸಚಿವ ವಿ. ಶಿವನ್‍ಕುಟ್ಟಿ ಸೇರಿದಂತೆ ಇತರರನ್ನು ಭೇಟಿಯಾದ. 

ಮೂರನೇ ತರಗತಿಯ ಪರೀಕ್ಷೆಯ ಅಹಾನ್ ನ ಉತ್ತರ ಪತ್ರಿಕೆಯನ್ನು ಕಳೆದ ಕೆಲವು ದಿನಗಳಲ್ಲಿ ಸಾಮಾಜಿಕ ಮಾಧ್ಯಮದಲ್ಲಿ ಬಹಳಷ್ಟು ಹಂಚಿಕೊಳ್ಳಲಾಗಿತ್ತು. ನಂತರ ಅದು ವಾಟ್ಸಾಪ್, ಇನ್‍ಸ್ಟಾಗ್ರಾಮ್ ಸ್ಟೋರಿ, ರೀಲ್ ಮತ್ತು ಫೇಸ್‍ಬುಕ್‍ನಲ್ಲಿ ದೀರ್ಘ ಟಿಪ್ಪಣಿಗಳಲ್ಲಿ ಸ್ಟೇಟಸ್ ಆಗಿ ವೈರಲ್ ಆಯಿತು. 'ಸ್ಪೂನ್ ಮತ್ತು ಲೆಮನ್' ಆಟದ ನಿಯಮಗಳಲ್ಲಿ ಪರೀಕ್ಷೆಯಲ್ಲಿ ನೆಚ್ಚಿನ ಆಟಕ್ಕೆ ನಿಯಮಗಳನ್ನು ಸಿದ್ಧಪಡಿಸುವ ಬಗ್ಗೆ ಕೇಳಿದ ಪ್ರಶ್ನೆಗೆ ಉತ್ತರಿಸುತ್ತಾ ಅಹಾನ್ 'ವಿಜೇತರು ಸೋತವರನ್ನು ಗೇಲಿ ಮಾಡಬಾರದು' ಎಂದು ಮಹತ್ವದ  ನಿಯಮವನ್ನು ಬರೆದಿದ್ದ. ಸಾಮಾಜಿಕ ಪ್ರಜ್ಞೆ ಹೊಂದಿರುವ ಮತ್ತು ಪ್ರಜಾಪ್ರಭುತ್ವ ರೀತಿಯಲ್ಲಿ ಆಟವಾಡಬಲ್ಲ ಅಹಾನ್ ನನ್ನು ವಿಧಾನಸಭೆ ಸ್ಪೀಕರ್ ಎ ಎನ್ ಶಂಸೀರ್ ಅವರು ಪ್ರಜಾಪ್ರಭುತ್ವದ ವೇದಿಕೆಯಾದ ವಿಧಾನಸಭೆಗೆ ಆಹ್ವಾನಿಸಿದ್ದರು.

ಅಹಾನ್ ಬೆಳಿಗ್ಗೆ ಸ್ಪೀಕರ್ ನಿವಾಸ 'ನೀತಿ'ಗೆ ಆಗಮಿಸಿ ಸ್ಪೀಕರ್ ಅವರೊಂದಿಗೆ ಉಪಾಹಾರ ಸೇವಿಸಿದ. ನಂತರ ವಿಧಾನಸಭೆಗೆ ತೆರಳಿ ಕಲಾಪಗಳನ್ನು ವೀಕ್ಷಿಸಿದ. ಸ್ಪೀಕರ್ ಕೊಠಡಿಯಲ್ಲಿ ಸ್ವಲ್ಪ ಸಮಯ ಕಳೆದ. ಸ್ಪೀಕರ್ ಅಹಾನ್ ಗೆ ಉಡುಗೊರೆಗಳನ್ನು ನೀಡುವ ಮೂಲಕ ಕಳುಹಿಸಿದರು.