ಬಹುನಿರೀಕ್ಷೆಗಳೊಂದಿಗೆ ಆಯುಷ್ ರಾಷ್ಟ್ರೀಯ ಕಾರ್ಯಾಗಾರ ಮುಕ್ತಾಯ

ಕೊಟ್ಟಾಯಂ: ಕುಮಾರಕಂನಲ್ಲಿ ನಡೆದ ಎರಡು ದಿನಗಳ ರಾಷ್ಟ್ರೀಯ ಕಾರ್ಯಾಗಾರದಲ್ಲಿ ಪ್ರಸ್ತುತಪಡಿಸಲಾದ ನವೀನ ವಿಚಾರಗಳನ್ನು ದೇಶಾದ್ಯಂತ ವಿವಿಧ ಆಯುಷ್ ಸಂಸ್ಥೆಗಳಲ್ಲಿ ಏಕೀಕೃತ ಮಾದರಿಯಲ್ಲಿ ಕಾರ್ಯಗತಗೊಳಿಸಲು ರಾಜ್ಯಗಳು ಸಿದ್ಧತೆ ನಡೆಸುತ್ತಿವೆ. ಇದು ದೇಶದಲ್ಲಿನ ಡಿಜಿಟಲ್ ಅಂತರವನ್ನು ಕಡಿಮೆ ಮಾಡಲು ಮತ್ತು ಆಯುಷ್ ವಲಯದ ಜನಪ್ರಿಯತೆಯನ್ನು ಹೆಚ್ಚಿಸಲು ಸಹಾಯ ಮಾಡುತ್ತದೆ ಎಂದು ಆಶಿಸಲಾಗಿದೆ.

ಕೇಂದ್ರ ಆಯುಷ್ ಸಚಿವಾಲಯ, ರಾಜ್ಯ ಆಯುಷ್ ಇಲಾಖೆ ಮತ್ತು ಕೇರಳದ ಆಯುಷ್ ಮಿಷನ್ ಜಂಟಿಯಾಗಿ ಆಯೋಜಿಸಿದ್ದ 'ಆಯುಷ್ ವಲಯಕ್ಕೆ ಐಟಿ ಪರಿಹಾರಗಳು' ಕಾರ್ಯಾಗಾರವು ಮುಕ್ತಾಯಗೊಂಡಿತು. ರಾಜ್ಯ ಆರೋಗ್ಯ ಸಚಿವೆ ವೀಣಾ ಜಾರ್ಜ್ ಉದ್ಘಾಟಿಸಿದ ಕಾರ್ಯಾಗಾರದಲ್ಲಿ 29 ರಾಜ್ಯಗಳು ಮತ್ತು ಕೇಂದ್ರಾಡಳಿತ ಪ್ರದೇಶಗಳ ಉನ್ನತ ಅಧಿಕಾರಿಗಳು ಮತ್ತು ತಜ್ಞರು ಭಾಗವಹಿಸಿದ್ದರು.

ವಿವಿಧ ರಾಜ್ಯಗಳ ಹಿರಿಯ ವೈದ್ಯರು ಮತ್ತು ಅಧಿಕಾರಿಗಳು ಕಾರ್ಯಾಗಾರದಲ್ಲಿ ಪ್ರಸ್ತುತಪಡಿಸಲಾದ ಅತ್ಯುತ್ತಮ ಮಾದರಿಗಳನ್ನು ಕಾರ್ಯಗತಗೊಳಿಸಲು ತಮ್ಮ ಇಚ್ಛೆಯನ್ನು ವ್ಯಕ್ತಪಡಿಸಿದರು. ಸಾರ್ವಜನಿಕರಿಗೆ ಸೇವೆಗಳನ್ನು ಸುಲಭಗೊಳಿಸುವ ತಂತ್ರಜ್ಞಾನಗಳನ್ನು ಕಾರ್ಯಗತಗೊಳಿಸುವ ಯೋಜನೆಗಳನ್ನು ಸಹ ಅವರು ಮಂಡಿಸಿದರು. ವಿವಿಧ ರಾಜ್ಯಗಳಲ್ಲಿ ಅಸ್ತಿತ್ವದಲ್ಲಿರುವ ಡಿಜಿಟಲೀಕರಣ ಪ್ರಯತ್ನಗಳೊಂದಿಗೆ ಇತ್ತೀಚಿನ ತಂತ್ರಜ್ಞಾನವನ್ನು ಸಂಯೋಜಿಸಲು ಕ್ರಮಗಳನ್ನು ತೆಗೆದುಕೊಳ್ಳಲಾಗುವುದು ಎಂದು ಪ್ರತಿನಿಧಿಗಳು ಹೇಳಿದರು.

ಮಣಿಪುರದ ಆಯುಷ್ ನಿರ್ದೇಶನಾಲಯದ ಹೆಚ್ಚುವರಿ ನಿರ್ದೇಶಕ ಡಾ. ಬಿಶ್ವನಾಥ್ ಶರ್ಮಾ ಮಾತನಾಡಿ, ಈ ಕಾರ್ಯಾಗಾರವು ಮಣಿಪುರದ 24 ಆಯುಷ್ ಸಂಸ್ಥೆಗಳಲ್ಲಿ ಉದ್ಯೋಗಿಗಳ ಹಾಜರಾತಿಯಲ್ಲಿ ಪ್ರಮುಖ ಬದಲಾವಣೆಗೆ ಪ್ರೇರಣೆ ನೀಡಿದೆ. ಡಿಜಿಟಲೀಕರಣದ ಭಾಗವಾಗಿ, ಆಧಾರ್ ಆಧಾರಿತ ಬಯೋಮೆಟ್ರಿಕ್ ಹಾಜರಾತಿ ವ್ಯವಸ್ಥೆಯನ್ನು ಜಾರಿಗೆ ತರಲಾಗುವುದು ಎಂದು ಅವರು ಮಾಹಿತಿ ನೀಡಿದರು.

ರೋಗಿಗಳು ಆಸ್ಪತ್ರೆಗಳು ಮತ್ತು ವೈದ್ಯರೊಂದಿಗೆ ಒಂದೇ ಡಿಜಿಟಲ್ ವೇದಿಕೆಯಲ್ಲಿ ಸಂಪರ್ಕ ಸಾಧಿಸಲು ಸಹಾಯ ಮಾಡುವ ಏಕ-ವಿಂಡೋ ವ್ಯವಸ್ಥೆಯಾದ ನೆಕ್ಸ್ಟ್‍ಜೆನ್ ಇ-ಆಸ್ಪತ್ರೆ ವ್ಯವಸ್ಥೆಯನ್ನು ಅವರು ಶ್ಲಾಘಿಸಿದರು. ಮಣಿಪುರದಲ್ಲಿ ಈ ಮಾದರಿಯನ್ನು ಜಾರಿಗೆ ತರಲು ರಾಷ್ಟ್ರೀಯ ಮಾಹಿತಿ ಕೇಂದ್ರವನ್ನು ಸಂಪರ್ಕಿಸಲಾಗಿದೆ ಎಂದು ಡಾ. ಶರ್ಮಾ ಹೇಳಿದರು.

ಆಯುಷ್ ವಲಯದಲ್ಲಿ ಹೆಚ್ಚಿನ ಪ್ರಗತಿ ಸಾಧಿಸಿದ್ದರೂ, ರಾಷ್ಟ್ರ ರಾಜಧಾನಿ ದೆಹಲಿ ಇನ್ನೂ ಹೆಚ್ಚಿನ ಸೇವೆಗಳಿಗೆ ಸಾಂಪ್ರದಾಯಿಕ ವಿಧಾನಗಳನ್ನು ಅವಲಂಬಿಸಿದೆ ಎಂದು ದೆಹಲಿಯ ಆಯುಷ್ ಸಲಹೆಗಾರ ಡಾ. ಅಖಿಲೇಶ್ ವಸಿಷ್ಠ ಹೇಳಿದರು. ಇದು ಬದಲಾಗಬೇಕಾಗಿದೆ ಮತ್ತು ಕಾರ್ಯಾಗಾರವು ಅದಕ್ಕಾಗಿ ಹೊಸ ಆಲೋಚನೆಗಳನ್ನು ಒದಗಿಸಿದೆ ಎಂದು ಅವರು ಹೇಳಿದರು.

ಉತ್ತರ ಭಾರತದ ಹಿರಿಯ ಅಧಿಕಾರಿಯೊಬ್ಬರು ಐಟಿ ವಲಯದಲ್ಲಿ ಕೇರಳದ ಪ್ರಗತಿಯನ್ನು "ಅದ್ಭುತ" ಎಂದು ಬಣ್ಣಿಸಿದರು. ರಾಜ್ಯಗಳು ಇಂತಹ ಅದ್ಭುತ ಉಪಕ್ರಮಗಳನ್ನು ಕೈಗೊಳ್ಳಬಹುದು ಎಂದು ನಂಬುವುದು ಕಷ್ಟ ಎಂದು ಅವರು ಹೇಳಿದರು.

ಜಾರ್ಖಂಡ್ ಪ್ರತಿನಿಧಿಗಳು ತಮ್ಮ ರಾಜ್ಯದ ಆಯುಷ್ ಸಂಸ್ಥೆಗಳಲ್ಲಿ ಅಸ್ತಿತ್ವದಲ್ಲಿರುವ ಆಗಿಆಒS (ಔಷಧಗಳು ಮತ್ತು ಲಸಿಕೆ ವಿತರಣಾ ನಿರ್ವಹಣಾ ವ್ಯವಸ್ಥೆ) ವ್ಯವಸ್ಥೆಯನ್ನು ಕೇರಳದಲ್ಲಿ ಅಭಿವೃದ್ಧಿಪಡಿಸಲಾದ ಸಮಗ್ರ Iಖಿ ವೇದಿಕೆ ಂಊIಒS 2.0 (ಂಙUSಊ ಹೋಮಿಯೋಪತಿ ಮಾಹಿತಿ ನಿರ್ವಹಣಾ ವ್ಯವಸ್ಥೆ) ನೊಂದಿಗೆ ಸಂಯೋಜಿಸಿದರೆ, ಹೆಚ್ಚಿನ ಪ್ರಯೋಜನಗಳು ದೊರೆಯುತ್ತವೆ ಎಂದು ಹೇಳಿದರು. ಜಾಖರ್ಂಡ್ ಐಟಿ ಸೆಲ್‍ನ ಅನುಷ್ಠಾನ ಅಧಿಕಾರಿ ಡಾ. ಪ್ರಿಯಾ ನಂದನ್, ಈ ವೇದಿಕೆಯು ಆರೋಗ್ಯ ರಕ್ಷಣೆ ಮತ್ತು ರೋಗಿಗಳ ಆರೈಕೆಗೆ ಸಂಬಂಧಿಸಿದ ಎಲ್ಲಾ ಚಟುವಟಿಕೆಗಳನ್ನು ಪರಿಣಾಮಕಾರಿಯಾಗಿ ನಿರ್ವಹಿಸುತ್ತದೆ ಮತ್ತು ಸಂಪೂರ್ಣ ಕಾರ್ಯಾಚರಣೆಯನ್ನು ಸುಗಮಗೊಳಿಸುತ್ತದೆ ಎಂದು ಹೇಳಿದರು.

ಕರ್ನಾಟಕದ ರಾಷ್ಟ್ರೀಯ ಆಯುಷ್ ಮಿಷನ್‍ನ ಯೋಜನಾ ನಿರ್ದೇಶಕಿ ಸರಸ್ವತಿ ನವಲ್ಲಿ, ಎಎಚ್.ಐ.ಎಂ.ಎಸ್. ವ್ಯವಸ್ಥೆಯನ್ನು ಮಾನವ ಸಂಪನ್ಮೂಲಗಳ ನಿರ್ವಹಣೆ ಮತ್ತು ಗುತ್ತಿಗೆ ಸಿಬ್ಬಂದಿ ವೇತನಗಳನ್ನು ಮತ್ತಷ್ಟು ಸುಧಾರಿಸಲು ಬಳಸಬಹುದು ಎಂದು ಹೇಳಿದರು. ವ್ಯಾಪಾರ ಸಂಪನ್ಮೂಲಗಳು, ಕಾರ್ಯಾಚರಣೆಗಳು, ಮೇಲ್ವಿಚಾರಣೆ, ವರದಿ ಮಾಡುವಿಕೆ, ಮಾರಾಟ, ಲೆಕ್ಕಪತ್ರ ನಿರ್ವಹಣೆ ಮತ್ತು ಹಣಕಾಸುಗಳನ್ನು ಸಂಯೋಜಿಸಲು ಇಆರ್.ಪಿ. ಸಾಫ್ಟ್‍ವೇರ್ ಸೂಕ್ತವಾಗಿದೆ ಎಂದು ಅವರು ಹೇಳಿದರು.

ಗುಜರಾತ್‍ನ ಅಧಿಕಾರಿಗಳು ಒಪಿಡಿ ಮತ್ತು ಅಪಘಾತ ವಿಭಾಗಗಳಲ್ಲಿ ರೋಗಿಗಳ ನೋಂದಣಿ, ಅಪಾಯಿಂಟ್‍ಮೆಂಟ್ ಬುಕಿಂಗ್ ಮತ್ತು ರದ್ದತಿಗೆ ಇ-ಆಸ್ಪತ್ರೆ ಸಾಫ್ಟ್‍ವೇರ್ ಅನ್ನು ಬಳಸಬಹುದು ಎಂದು ಹೇಳಿದರು. ಕಾರ್ಯಾಗಾರವು ಅವರ ಮಾನವ ಸಂಪನ್ಮೂಲ ಮಾಡ್ಯೂಲ್‍ಗಳಲ್ಲಿ ಹೊಸ ವೈಶಿಷ್ಟ್ಯಗಳನ್ನು ಅಳವಡಿಸಲು ಆಲೋಚನೆಗಳನ್ನು ನೀಡಿತು ಎಂದು ಗುಜರಾತ್ ಆಯುಷ್ ನಿರ್ದೇಶಕ ಜಯೇಶ್ ಎಂ. ಪರ್ಮಾರ್ ಹೇಳಿದರು.

ಕಾರ್ಯಾಗಾರದ ನಂತರ, ಪ್ರತಿನಿಧಿಗಳು ಶನಿವಾರ ಮತ್ತು ಭಾನುವಾರ ಕೇರಳದ ಮೂರು ಜಿಲ್ಲೆಗಳಲ್ಲಿರುವ ಆಯುಷ್ ಕೇಂದ್ರಗಳಿಗೆ ಕ್ಷೇತ್ರ ಭೇಟಿ ನೀಡಲಿದ್ದಾರೆ. ಕ್ರೀಡಾ ಆಯುರ್ವೇದ ಯೋಜನೆ, ಆರೋಗ್ಯ ನೌಕಾ, ಉಪಶಾಮಕ ಆರೈಕೆ, ದೃಷ್ಟಿ ಮತ್ತು ಆಯುರ್ಕರ್ಮದಂತಹ ವಿವಿಧ ಆಯುಷ್ ಸೇವಾ ಮಾದರಿಗಳನ್ನು ಪ್ರತಿನಿಧಿಗಳು ನೇರವಾಗಿ ಅರ್ಥಮಾಡಿಕೊಳ್ಳಲು ಅವಕಾಶವನ್ನು ಒದಗಿಸುವುದು ಇದರ ಉದ್ದೇಶವಾಗಿದೆ.