ಜಿಲ್ಲೆಗೆ ಹೆಮ್ಮೆ ತಂದ ಬೇಳದ ಕಾಸರಗೋಡು ಕುಬ್ಜ ಹಸು ಸಾಕಣೆ ಕೇಂದ್ರ: ಕಳೆದ ಹಣಕಾಸು ವರ್ಷದಲ್ಲಿ 16 ಲಕ್ಷ ರೂ. ಆದಾಯ

ಬದಿಯಡ್ಕ: ಕಾಸರಗೋಡಿನ ವಿಶಿಷ್ಟ ಸಂಪತ್ತಾಗಿರುವ, ರೋಗಗಳಿಗೆ ನಿರೋಧಕವಾಗಿರುವ, ಹವಾಮಾನಕ್ಕೆ ಸೂಕ್ತವಾಗಿರುವ ಮತ್ತು ಕಡಿಮೆ ವೆಚ್ಚದಲ್ಲಿ ಸಾಕಬಹುದಾದ ಸ್ಥಳೀಯ ಹಸುಗಳ ಸಂಖ್ಯೆ ದಿನೇ ದಿನೇ ಕಡಿಮೆಯಾಗುತ್ತಿದೆ. ಸರ್ಕಾರಿ ಯೋಜನೆಯ ಮೂಲಕ ಅವುಗಳನ್ನು ರಕ್ಷಿಸದಿದ್ದರೆ ಅವು ಅಳಿದುಹೋಗುವ ಸಾಧ್ಯತೆಯಿದೆ ಎಂಬ ಅರಿವಿನ ಭಾಗವಾಗಿ, 2015ರ ಸೆಪ್ಟೆಂಬರ್ 29 ರಂದು ಬದಿಯಡ್ಕ ಪಂಚಾಯತಿಯ ನೀರ್ಚಾಲು ಬಳಿಯ ಬೇಳದಲ್ಲಿ ಕಾಸರಗೋಡು ಕುಬ್ಜ ತಳಿ ಹಸು ಸಂವರ್ಧನಾ ಕೇಂದ್ರ ಪ್ರಾರಂಭಿಸಲಾಯಿತು. 

ಆರಂಭದಲ್ಲಿದ್ದ ಹಸುಗಳು 108. ಕೇರಳ ಜಾನುವಾರು ಅಭಿವೃದ್ಧಿ ಮಂಡಳಿಯಿಂದ ಪಡೆದ ಕಾಸರಗೋಡು ಸ್ಥಳೀಯ ಹೋರಿಗಳ ವೀರ್ಯವನ್ನು ಬಳಸಿಕೊಂಡು ಇಲ್ಲಿಯ ಹಸುಗಳಿಗೆ ಕೃತಕ ಗರ್ಭಧಾರಣೆ ಮಾಡಲಾಗುತ್ತದೆ. ಕೃತಕ ಗರ್ಭಧಾರಣೆಯ ಮೂಲಕ ಹೆಚ್ಚಿನ ಸಂಖ್ಯೆಯ ಕರುಗಳು ಜನಿಸಿವೆ ಮತ್ತು 2020 ರಲ್ಲಿ  ಜಾನುವಾರುಗಳ ಸಂಖ್ಯೆ 200 ತಲುಪಿದೆ. ಕರುಗಳು ಮತ್ತು ಹಸುಗಳು ಸೇರಿದಂತೆ ಒಟ್ಟು 150 ಜಾನುವಾರುಗಳನ್ನು ಸಂತಾನೋತ್ಪತ್ತಿಗಾಗಿ ಅಗತ್ಯವಿರುವವರಿಗೆ ನೀಡಲಾಗಿದೆ. ಪ್ರಸ್ತುತ, ಈ ಫಾರ್ಮ್‍ನಲ್ಲಿ ಒಟ್ಟು 148 ಜಾನುವಾರುಗಳಿವೆ. ಇದರಲ್ಲಿ 72 ಹಸುಗಳು, 14 ಗಂಡುಕರುಗಳು ಮತ್ತು 58 ಹೆಣ್ಣು ಕರುಗಳು ಸೇರಿವೆ.

ಬದಿಯಡ್ಕ ಗ್ರಾಮ ಪಂಚಾಯತಿ ರಾಷ್ಟ್ರೀಯ ಗ್ರಾಮೀಣ ಉದ್ಯೋಗ ಖಾತರಿ ಯೋಜನೆಯಡಿಯಲ್ಲಿ 3.5 ಎಕರೆ ಜಮೀನಿನಲ್ಲಿ ಮೇವಿನ ಹುಲ್ಲನ್ನು ಬೆಳೆಸಲಾಗುತ್ತಿದೆ. ಇಲ್ಲಿರುವ 66 ಅಕೇಶಿಯಾ ಮರಗಳನ್ನು ಕಡಿದು ಆ ಪ್ರದೇಶದಲ್ಲಿ ಮೇವಿನ ಹುಲ್ಲನ್ನು ಬೆಳೆಸಲು ಯೋಜನೆಯನ್ನು ಸಿದ್ಧಪಡಿಸಲಾಗಿದೆ. ಜಮೀನಿನಲ್ಲಿರುವ ಜಾನುವಾರುಗಳಿಗೆ ಅಗತ್ಯವಿರುವ ಸಂಪೂರ್ಣ ಹುಲ್ಲನ್ನು ಜಮೀನಿನಲ್ಲಿಯೇ ಉತ್ಪಾದಿಸಬಹುದಾಗಿದೆ. 

ಕಾಸರಗೋಡು ಕುಬ್ಜ ಹಸುಗಳಿಗೆ ಸರ್ಕಾರಿ ಮಟ್ಟದ ಏಕೈಕ ಸಂರಕ್ಷಣಾ ಕೇಂದ್ರವಾಗಿರುವುದರಿಂದ, ಕೇರಳ ಪಶುವೈದ್ಯಕೀಯ ವಿಜ್ಞಾನ ವಿಶ್ವವಿದ್ಯಾಲಯ, ಡೈರಿ ಸೈನ್ಸ್ ಕಾಲೇಜು ಮತ್ತು ಕೇಂದ್ರ ವಿಶ್ವವಿದ್ಯಾಲಯದ ಅನೇಕ ವಿದ್ಯಾರ್ಥಿಗಳು ಸಂಶೋಧನೆ-ಸಂಬಂಧಿತ ಅಧ್ಯಯನಗಳಿಗಾಗಿ ಫಾರ್ಮ್‍ಗೆ ಭೇಟಿಒ ನೀಡುತ್ತಿದ್ದಾರೆ. 

ಕಾಸರಗೋಡು ಸ್ಥಳೀಯ ಹಸುಗಳನ್ನು ಗುರುತಿಸುವ ಕೆಲಸವನ್ನು ಕೇರಳ ಜಾನುವಾರು ಅಭಿವೃದ್ಧಿ ಮಂಡಳಿಯ ಸಹಯೋಗದೊಂದಿಗೆ ನಡೆಸಲಾಯಿತು ಮತ್ತು ಅದರ ವರದಿಯನ್ನು ಸಿದ್ಧಪಡಿಸುವ ಕೆಲಸ ಪೂರ್ಣಗೊಂಡಿದೆ. ಕಾಸರಗೋಡು ಮತ್ತು ಮಂಜೇಶ್ವರ ತಾಲ್ಲೂಕುಗಳಲ್ಲಿ ಸ್ಥಳೀಯ ಹಸುಗಳನ್ನು ಸಾಕುವ ರೈತರ ಮನೆಗಳಲ್ಲಿ ಆಯ್ಕೆ ಮಾಡಿ ತರಬೇತಿ ಪಡೆದ 30 ಹಸು ಸಹಚರರನ್ನು ಬಳಸಿಕೊಂಡು ಡೇಟಾ ಸಂಗ್ರಹಣೆಯನ್ನು ಕೈಗೊಳ್ಳಲಾಗಿದೆ. 

ಅಭಿಮತ:

-ಕಾಸರಗೋಡು ತಳಿಯ ಸಂರಕ್ಷಣೆಯಲ್ಲಿ ಈ ಕೇಂದ್ರ ಮಹತ್ತರ ಪ್ರಗತಿ ಸಾಧಿಸಿದೆ. ಯಶಸ್ವಿಯಾಗಿ ಮುನ್ಮನಡೆಯುತ್ತಿರುವುದು ಭರವಸೆ ಮೂಡಿಸಿದೆ. ಕಳೆದ ಹಣಕಾಸು ವರ್ಷದಲ್ಲಿ ಹಾಲು, ಸಗಣಿ, ಕರುಗಳು, ಹಸುಗಳು ಮತ್ತು ಹೋರಿಗಳ ಮಾರಾಟದ ಜೊತೆಗೆ, ಜಮೀನಿನಲ್ಲಿರುವ ಮರಗಳ ಮಾರಾಟದಿಂದ ಬಂದ ಆದಾಯ 16,83,572 ರೂ.ಗಳಷ್ಟಿದೆ.

-  ಡಾ.ಪಿ.ಕೆ.ಮನೋಜ್ ಕುಮಾರ್

ಜಿಲ್ಲಾ ಪಶುಸಂಗೋಪನಾ ಅಧಿಕಾರಿ