ಶಿಶುವನ್ನು ಮಾರಾಟ ಮಾಡಿರುವ ಶಂಕೆ- ದಂಪತಿಗಳ ಬಂಧನ- ಕುಂಬಳೆಯಲ್ಲಿ ಅಮಾನವೀಯ ಘಟನೆ

ಕುಂಬಳೆ: ಐದು ತಿಂಗಳ ಮಗು ನಾಪತ್ತೆಯಾದ ಬಳಿಕ, ಸ್ಥಳೀಯರು ಪೋಷಕರನ್ನು ಹಿಡಿದು ಪೊಲೀಸರಿಗೆ ಒಪ್ಪಿಸಿದ ಘಟನೆ ಕುಂಬಳೆಯಲ್ಲಿ ವರದಿಯಾಗಿದೆ. ಅವರು ಮಗುವನ್ನು ಮಾರಾಟ ಮಾಡಿದ್ದಾರೆ ಎಂದು ಸ್ಥಳೀಯರು ಆರೋಪಿಸಿದರು. 

ಕುಂಬಳೆ ಪೊಲೀಸ್ ಠಾಣಾ ವ್ಯಾಪ್ತಿಯಲ್ಲಿ ವಾಸಿಸುವ ಅನ್ಯರಾಜ್ಯ ಕಾರ್ಮಿಕರಾದ ಸುಪ್ರಿಯಾ ಮತ್ತು ಅವರ ಪತಿ ವಸಂತ ಕುಂಬಳೆ ಪೊಲೀಸರ ವಶದಲ್ಲಿದ್ದಾರೆ. ಅವರ ಹೇಳಿಕೆಗಳಲ್ಲಿನ ವಿರೋಧಾಭಾಸಗಳು ಘಟನೆಯ ನಿಗೂಢತೆಯನ್ನು ಹೆಚ್ಚಿಸುತ್ತಿವೆ.

ವಿಚಾರಣೆಯ ಸಮಯದಲ್ಲಿ ವ್ಯತಿರಿಕ್ತ  ಹೇಳಿಕೆ:

ಬುಧವಾರ  ಬೆಳಿಗ್ಗೆ ಆಶಾ ಕಾರ್ಯಕರ್ತೆ ಮಗುವಿನ ಆರೋಗ್ಯದ ಬಗ್ಗೆ ವಿಚಾರಿಸಲು ಮನೆಗೆ ಹೋದಾಗ ಮಗು ಕಾಣೆಯಾಗಿದೆ ಎಂಬ ಮಾಹಿತಿ ಮೊದಲು ಬಹಿರಂಗವಾಯಿತು. ನಂತರ ವಿಚಾರಿಸಿದಾಗ, ದಂಪತಿಗಳು ಆರಂಭದಲ್ಲಿ ಮಗು ಮೃತಪಟ್ಟಿದೆ ಎಂದು ಉತ್ತರಿಸಿದರು. ಆಶಾ ಕಾರ್ಯಕರ್ತೆ ಪೊಲೀಸರಿಗೆ ಈ ಬಗ್ಗೆ ಮಾಹಿತಿ ನೀಡಿದ್ದೀರಾ ಎಂದು ಕೇಳಿದಾಗ, ಮಗುವನ್ನು ಸ್ನೇಹಿತೆಯಾದ ನವೀನ ಕುಮಾರಿ ಎಂಬ ಮಹಿಳೆಗೆ ನೀಡಿರುವುದಾಗಿ ತಿಳಿಸಿದರು.

ಮಗು ಮಾರಾಟ ಎಂಬ ಆರೋಪ:

ದಂಪತಿಗಳ ಹೇಳಿಕೆಗಳಲ್ಲಿ ಮತ್ತು ಕಾಣೆಯಾದ ಮಗುವಿನ ಬಗ್ಗೆ ವಿರೋಧಾಭಾಸಗಳಿಂದ ಅನುಮಾನಗೊಂಡ ಸ್ಥಳೀಯರು ಅವರನ್ನು ವಶಕ್ಕೆ ಪಡೆದು ಕುಂಬಳೆ ಪೊಲೀಸರಿಗೆ ಒಪ್ಪಿಸಿದ್ದಾರೆ. ಮಗುವನ್ನು ಮಾರಾಟ ಮಾಡಲಾಗಿದೆ ಎಂದು ಸ್ಥಳೀಯರು ಆರೋಪಿಸುತ್ತಿದ್ದಾರೆ. ಮಹಿಳೆಗೆ ಮೊದಲ ಮದುವೆಯಿಂದ ಮೂವರು ಮಕ್ಕಳಿದ್ದಾರೆ ಎಂದು ವರದಿಯಾಗಿದೆ.

ತನಿಖೆ ಆರಂಭ:

ದಂಪತಿಯನ್ನು ಸವಿವರವಾಗಿ ಪ್ರಶ್ನಿಸಲಾಗಿದ್ದು, ಮಗುವನ್ನು ಹುಡುಕಲು ತನಿಖೆ ಆರಂಭಿಸಲಾಗಿದೆ ಎಂದು ಪೊಲೀಸ್ ಮೂಲಗಳು ತಿಳಿಸಿವೆ.